獨遊72小時京阪神之旅(2) – 抵達日本、福太郎大阪燒

Day 1 : 抵達大阪 –> 福太郎Dinner

其實買機票個陣係有上午出發嘅機揀
但小弟上午學校有堂,而且係一定要上,所以焗住買下午機

2:55pm機,我12點半就到左機場,Check完in就即刻入閘
去Relay用我某張信用卡換返本雜誌先,然後激速跑去Lounge醫肚
無計啦,鬼叫窮撚無錢搭傳統航空咩

去程完全無delay,準時2:55pm出發

然後係機上買左呢個南海Rapi:t卷
(不過如果你打算來回都坐Rapi:t,就要去橙色K字頭個網買有款係寫明來回,最平!)

不過熟悉我嘅各位應該覺得我係咪痴左線,居然買個貴價車飛!!!???
按我平時個性,如果係拖細喼/背囊,絕對會坐平d嘅空港急行
其實係因爲今晚我約左個係較早時間已經抵達大阪而又係自己去嘅朋友食飯,費時人地等太耐啦

準時7點20分落機都好多人排隊等入境
我無行李寄倉,所以可以入境之後即刻去海關,成個過程大約30分鐘
然後即刻去換埋Rapi:t卷就入閘搭車啦

車廂同平時d特急列車一樣啦,座位都係非常寬敞,而且舒服
但車廂内空氣流動感覺非常不足,成段路都非常焗促

半個鐘頭多少少就出到難波站,然後即刻會合我朋友A先生食飯


《福太郎》

呢個旅程第一餐就食大阪燒!
題外話,其實人地個真名叫關西(大阪)風御好燒
而廣島燒就係廣島風御好燒,尤其廣島風御好燒要千萬記住
因爲如果你話廣島燒,會令當地人勾起當年投放原子彈歷史,非常唔舒服(當然其實對方都唔識聽我地用廣東話講)

好,講完題外話
今餐就選擇左係車站附近,都具備相當之名氣嘅《福太郎》
《福太郎》係難波高島屋有分店,而總店就係南海難波同日本橋之間
最大分別係前者禁煙同環境現代化,後者可食煙同環境比較古樸

《福太郎》係比較傳統大阪燒店鋪,無咩花巧野
去到鋪頭門口先係張紙度寫低你個名同人數
之後就會有師傅比menu你睇、落定單

如果師傅見你係旅客比本英文menu你,記得一定要攞埋日文menu
因爲日文menu選擇真係會多dd
如果你係去總店,我印象中應該係無呢個問題

比大家望下第一幅圖個menu
右手邊就係個堆燒餅
上面ねぎ焼其實就係叫蔥花燒;而下面お好み焼則係大阪燒
左手邊焼きそば就係炒麵

我就叫左個豚肉蔥花燒 同 豚肉大阪燒
始終小男生都係中意食肉多d
另外再叫左個有豚肉、蝦(海老)同魷魚(烏賊)嘅炒麵

師傅即刻整

先送上兩個燒餅先

第一個豚肉大阪燒(920Yen)

Um……咁少汁嘅!? 而且仲薄過我面皮啊
It’s fine……好味就得啦

擺入口
麵糊煎得好好,表皮仲帶有少少香脆,而内裏配合雞蛋好夠濕潤
另外底部嘅椰菜都比較淋,而肉方面就無乜特別
但其實我個人比較中意爽脆少少椰菜,咁樣個層次感相對比較好d
而且明顯醬汁可以再多d,有時有d位因爲唔夠汁而無乜味

 

第二個是豚肉蔥花燒(980Yen)

見到呢個款之後,你地覺得似咩呢?
我就覺得似平時上海鋪個d蔥油大餅、牛肉/豬肉餡餅
即刻稍稍失望,希望味道補救

大家可以見到入面好多蔥,呢樣絕對係賣點
基本上我覺得自己食緊煎蔥餅
其實都係表皮少少脆,中間好軟身
另外蔥都好香好多,不過就無椰菜
而且係用鹽調味,所以無大阪燒重口味
但我個塊餅有某d位可以鹽未均勻,所以無味

但老實講,俾接近70蚊食呢個燒餅,我自己心裏面有少少平衡唔到
我會寧願去台灣俾50台幣食個宜蘭三星蔥燒餅
當然味道呢家野好主觀,網上面都有唔少人狂讚《福太郎》
如果之前食過《福太郎》,不如都同我分享下你感受啦

 

最後係雜錦炒麵(1180Yen)
入面有蝦、魷魚條同幾塊肉

炒麵個醬汁調配得好適中,而且都滲透曬係麵條當中
而且咸香得黎帶有少少酸
另外上面再有少少酸薑,令炒麵味道更佳豐富
但其實我本人係唔食酸薑,所以幫大家試左個味之後,淨返嘅都撩走曬

海鮮方面
蝦做得好出色,稍微煎過先再去炒,所以係好爽脆,而且仲保有蝦甜味
魷魚都非常彈牙,而且表面都有少許炒麵醬,唔會感覺上同炒麵係分開

總括而言,呢間大阪燒令我有少少失望
係我角度,無論從醬料調配到食材處理都只屬中等
但我必須要講句,呢間《福太郎》位於千日前嘅總店係屢獲好評
所以如果大家要試,可能去總店會比較穩陣

This entry was posted in 日本 and tagged . Bookmark the permalink.