7日獨遊日本山陽(福岡) (20) – たんや牛舌早餐、博多運河城

10/1 福岡的最後一天,再見日本
(たんや — 博多運河城 — 櫛田神社 — 川端商店街 — 笑樂牛腸鍋 — 柳橋連合市場 — 離開福岡)

呢一日係我日本之旅最後一日,有少少唔捨得

夜晚6點機,所以我最遲4點3都要由市中心準備出發去機場
換言之我8點半起身,就得返7個幾鐘係福岡市區行走

但都無辦法啦,之前個6日成日都太早起身
難得今日無行程,就比自己放肆下8點半先起身

趁Check-out之前,我就先搭地下鐵返到去博多站
去試下福岡市好出名嘅たんや HAKATA牛舌早餐

呢一日都係落雨

牛舌早餐 -《たんや HAKATA》

たんや HAKATA係位於博多站一番街
無論地下鐵定JR站都一樣有指示牌指示你行去

一入去右手邊第二間就已經係たんや
正常情況下就應該要排隊
但因爲係早餐,所以都唔洗排太耐

我9點去到,等左2個字就入到去
大家最好係門口望定menu啦,一入到去就可以即刻叫

最多人叫就當然係500円呢個牛舌定食啦
另外都可以再加配明太子、山藥泥同生鷄蛋等等
當然都有好似咖喱飯呢d選擇

一個定食有6片牛舌、一碗溝左珍珠米同糙米嘅飯、牛尾湯同自助咖啡
另外最抵食係白飯任你食,隨時可以叫Refill,而且比你嘅同樣係兩溝飯
自助咖啡顧名思義就當然係自己黎

個餐好快就送到
望見呢個早餐就覺得好幸福,果然無待薄自己

同日本著名牛舌店利久唔同
利久係厚切;但たんや就係薄切,好似平時燒烤個d
たんや燒得都好香,本身牛味都好重,表面油份都適中,配飯一流!

不過呢,我都係中意利久多d
利久燒厚切牛舌外層係好香帶少少脆,而裏面就好爽
所以利久牛舌口感上係更得我歡心
(不過呢度たんや係早餐,一分錢一分貨,用黎比較係有少少唔公平)

個飯好正,米香又綿,我Encore左一次

個湯就不過不失,望上去濃,但飲落牛味唔重,單純鹹鹹地
所以湯方面利久無得輸


《博多運河城》

食完早餐之後就返酒店Check-out加寄存行李
然後就行過去博多運河城

博多運河城係福岡市其中一個大型購物商場
裏面有好多唔同品牌供顧客選擇

從酒店行去博多運河城其實都係10分鐘内,非常方便

入到去商場入面就一定要打個卡先
因爲商場入面有條小河,係博多運河城最大特色
另外流綫型設計都令呢個商場出名

我其實無咩要買,而且呢度d Brand都唔太適合我
我就只係行左一間運動中心,係由多間連鎖體育用品公司組成
規模大,而且各種運動都有,連我要嘅排球野都有

需要買運動野記得可以去呢度選購啦

This entry was posted in 日本 and tagged . Bookmark the permalink.