7日獨遊日本山陽(山口) (6) – 日本美景《元乃隅稻成神社》及 交通方法

6/1 遙遠的它們  (元乃隅稲成神社 — 角島大橋 — 藤原ラーメン )

上一晚食左藥,所以今日狀態好左好多,但當然都仲係有少少傷風啦
但仍然無礙我今日好心情!
因爲今日要去兩個我夢未以求嘅景點

呢一日我天未光就已經出發,因爲元乃隅稲成神社係超級遠

晨早就去7-11買便當食做早餐

本身係打算買個d鐵路便當,有廣島最出名蠔便當、穴子便當
不過無得叮熱,所以就費事食d凍冰冰便當

就係7-11買左呢個親子丼,即係滑蛋雞飯

個蛋真係好滑,雞都好嫩
仲好食過另一個我最愛嘅麻婆豆腐飯


《元乃隅稲成神社》

元乃隅稲成神社真係一個比較偏僻嘅神社
中港台網上面都唔多人去過,所以都必須做好資料搜集
甚至其實好多日本人都嫌太遠而卻步

呢度曾經被CNN評為日本31處最美景點
好多台灣blog都不斷講咩死前必去等等(台灣blogger成日乜都好誇張)

所以我就係度教大家點樣去啦

要去元乃隅稲成神社有5個方法:

  1. 自駕
  2. 神咁早乘坐JR去到人丸駅轉乘津黃地區共乘車
    (但網上面極少資料,呢篇最後我會詳細說明呢個方法)
  3. 乘搭JR去到長門古市駅再轉乘的士前往(呢個最多無自駕人士選擇)
  4. 踩單車 (超多大上落斜,完全唔建議)
  5. 跟旅行團 e.g. 1day local tour/bus tour

而我就選擇左第三種方法,而且係我第一次係日本搭的士!
大家都知日本係世界其中一個搭的士消費好高嘅國家
所以今次我都已經袋定銀兩準備彈藥

途中d人煙稀少嘅站

一出站就會見到有架的士等候旅客
如果無的士就可以可以去隔離個車房,個度會有人/的士招呼你

好好彩我一出閘個陣已經見到1港男2港女,居然全部都係香港人
我地二話不説即刻話不如一齊share的士

結果單程2400円,最後變左600円,來回total節省左3600円

而且司機會問返你需唔需要返黎接返落JR站,我地就當然係有需要啦
我自己本身就想1240先走,係呢度食埋lunch先走
不過同行三位香港同胞都覺得1145走就夠,咁唔通我自己一個走咩
加上兩位女士同我行程一樣,都係之後會去角島,可以一齊share的士錢Haha
所以就同司機講1145走

所以大家唔好怕羞啊,係長門古市站落車大部分都係去神社
如果3位有緣人都見到呢個post,同我say個hi啦

落車地方其實係一間餐廳前面嘅空地

如果大家同我一樣行程都係先神社後角島,就記得係呢度食少少野先去大橋
因爲大橋附近得一間餐廳,而且價錢都好貴……

落車已經會見到神社
我對眼完全無辦法抽離到,真係超級無敵靚!
神社由好多個鳥居組成一條橙色大道,再配合後面個無敵大海景
雖然唔係話咩絕世佳景,但都非常值得令人讚嘆

而且通過鳥居大道就已經係懸崖,感覺就好似同天地連接

行過去神社入口,都係一個大鳥居,而且兩側有兩隻小白狐

行隔離斜坡上去會見到另一個鳥居
而鳥居上面會有個投錢箱,比參拜者抛錢入箱
相傳一Q入箱就代表呢一年會有好好運
不過真係超難抛得入,我睇左好耐都係得一個人可以一下就成功

而我……就當然抛左幾十下先中

行返落去會見到有個位比大家求籤同買御守

然後就正式行呢條鳥居大道啦!

都有一定斜度,老人家就要小心啦

鳥居起得好密,所以一路行就好似置身係橙紅色天地般,格外耀眼

鳥居真係依山而建,所以大家都要注意安全

每個鳥居都會寫上善長仁翁名稱

行完成條鳥居大道再回首一望,不禁嘩一聲
又係一個好壯觀嘅地方
比埋另一幅有埋太陽嘅,更加璀璨奪目

行完成條鳥居,其實大家已經到達龍宮の潮吹
呢度嘅潮吹就絕對唔係各位巴打諗個種
而係講緊當波浪灌入去水底相連嘅洞窟時,海水會噴到接近三十米高空,有飛龍在天嘅英姿。

不過呢個潮吹就真係非常難見到啦,而且要潮漲先可以見到
睇下大家有無呢個運氣啦

不過就算無潮吹睇,望住呢個一望無際嘅海都已經好舒服

而且海中間仲成日會出現兩個相反方向嘅海浪互相撞擊而噴出嘅水波動
唔知仲以爲下面有鯨魚添


仲有人係下面釣魚,超級牙煙

如果想睇得清楚d,不妨走上去觀景台
居高臨下確實會望得開陽少少

不過,我視綫完全無辦法離開神社
無論從邊一個角度望,由幾十個至百幾個鳥居組成嘅都係非常迷人
老實講,我甚至中意呢度多過京都伏見稻荷嘅千本鳥居,人又少好多

呢兩個角度係我最愛,覺得最迷人

如果中意睇人少嘅靚景,呢度係我山陽第一推介
參觀呢度其實2個鐘已經足夠有餘

其他圖片:

————————————————

共乘車 (前往神社的第二種方法)

其實個共乘車時間表同路線圖我之前都有search到
而家就加埋我搵到嘅資料同大家分享

呢個共乘車平日有3班,而假日只有1班
時間都真係比較早,一般旅客相信都比較難利用1/2便、假日班次
所以3便就係最可行

按時係人丸站上車,不設訂位,先到先得
落車就係津黃/津黃漁港落車,再步行10分鐘就會到

其實架車係會經過神社門口
所以不妨勇敢d請求司機可唔可以係神社前落車
有個別司機見你係旅客甚至會主動問你

回程就自己去返d站等車 / 去我介紹嘅餐廳個度請求老闆幫你打電話call的 / 自己係電話亭call的

不過據我調查所得,平日3便係有當地人使用,係有機會無位 (1/2便因為太早,相對極少人)
如果真係無位,你就可以搭0928JR去到長門古市站d睇下同車有無人同你一齊share的士
如果無而你又想搏,就可以等多半個鐘有另一班JR到達,睇下有無旅客一齊share
但記得如果等到10:10都無,就要自己搭的士啦,因為下一班到長門古市站嘅列車係要等一小時以上

不過講真,要09:07去到人丸站其實都要好早起身,而且住廣島係無可能做到
比較大機會就係住下關搭06:41JR出發,或者住長門市

但係300yen一程真係好抵

而根據時間表,正午都有平日_便,我估計同上午都係一樣做法
而且小弟日文淺薄,解讀左係行車路線內自由落車
換言之就係可以自由係神社前落車
不過就無回程啦,回程就一定要搭的士

而至於點解我search到都唔搭呢
因為網上實在比較少呢種方法嘅資料,而且時間亦都對我唔work
所以我並無選擇去搏呢種方法

This entry was posted in 日本 and tagged . Bookmark the permalink.

2 Responses to 7日獨遊日本山陽(山口) (6) – 日本美景《元乃隅稻成神社》及 交通方法
  1. Samson Luk says:

    RE:共乘車 (前往神社的第二種方法)
    點解回程要搭的士?佢係循環線搭正午平日便上車就可以返回人丸駅

    • 因爲當時我未搭過呢個共乘車,一直處於想搏同唔敢搏嘅階段
      而且可能我唔識日文,見個時間表下面尖嘴無雙向,以爲未必有回程
      再加上我比較幸運遇上兩組旅客都打算一齊搭的士返JR站,所以果斷選擇左的士

Comments are closed.