Hea遊四國 – DAY 4-5

19-5-2018

20-5-2018

Day 4

老老實實 點解日本嘅7仔可以咁好食

今朝嘅早餐又係7仔喇

今日嘅行程都算係好chur

本身我淨係諗住全日去小豆島 所以決定去五日就算

但係我出發前一個禮拜 俾我發現咗一個新嘅四國景點

我份人就係咁貪心 決定放棄小豆島一半行程去新嘅景點

 

食完7仔早餐之後就去咗碼頭搭船

四國嘅JR Pass係包埋搭船去小豆島(土莊港)

所以就唔好咁傻仔自己買船飛啦

高松港

一嚟到高松港就見到小豆島船

呢一種船係可以載埋車

所以非常大 但正因為咁…龜速行駛

用咗一個鐘頭先去到附近嘅小豆島

船艙有好多座位

亦都有小食部買烏冬食

嫌坐船太悶仲可以上去甲板吹風

終於見到小豆島

大約一個鐘之後就來到小豆島 (土莊港)

小豆島嘅交通得兩種 一係巴士一係的士

相信唔會揀坐的士因為真係好貴

嚟到呢度可以搭橄欖巴士 路線覆蓋咗主要嘅景點

但係班次非常之少 所以出發前要睇清楚巴士時刻表

橄欖巴士

同樣都係上車拎飛落車比錢 亦都可以買一日乘車券

小豆島嘅景點包括咗寒霞溪、天使之路、小豆島橄欖公園、醬油記念館、映画村等

因為要配合巴士時間加埋回程船嘅時間

加上我上網睇圖片見到其他景點對我冇乜吸引

所以最後我淨係去咗橄欖公園

亦都係嚟小豆島一定要去嘅景點

 

由碼頭搭巴士去橄欖公園大約要30分鐘

因為巴士班次好少所以勁多人

橄欖公園風車

橄欖公園之所以有呢個名稱 係因為呢度真係盛產橄欖

令呢度更加出名嘅原因係 魔女宅急便取景地

遊客可以去觀光案內所借掃把去風車影相

橄欖雪糕

小豆島對我嚟講真係有啲悶

食完個雪糕就搭車返碼頭

等巴士中

返到碼頭等咗陣就搭返船去返高松港

感覺上嘥咗好多時間

明明淨係去得一個景點

但係等巴士等船嘥咗好多時間

返到高松港已經下午1點

又係時候搵嘢食啦

 

相信所有人都聽過讚岐烏冬

讚岐烏冬嘅起源地其實就係四國

讚岐呢個地方同高松一樣都係位於香川縣

所以嚟到四國唔食烏冬真係對唔住自己

 

食完午餐之後 見到天氣凍咗咁多

即刻沖返去旅館度拎軍褸

衝嘅原因係因為我要趕火車

下一個地方係四國嘅新景點 — 父母濱海岸

之所以咁出名係因為天氣好嘅話可以影到天空之鏡

去父母濱海岸嘅方法就係由高松搭火車去到觀音寺站 再轉每日得4班嘅巴士

沿途貼住海行

搭咗一個鐘就嚟到觀音寺站

一出火車站轉左就係巴士站

由於我去嗰陣算係新景點

所以巴士站得啲日文

check咗好多次先夠膽上車

因為呢度嘅班次實在太疏

同埋留意到呢度部份嘅巴士係普通貨van…

半個鐘之後就嚟到父母濱海岸

來到父母濱海岸嘅時候其實先四點幾

仲未退潮 而且未係影天空之鏡最好嘅時候

無謂喺個海灘食風 可以去隔離間甜品舖度食沙冰

甜品舖門口好多人等位 因為我自己一個所以好快就安排入座

喺等餐嘅時候上網search過呢間甜品舖

先知道呢頭盛產生果 而甜品舖嘅沙冰係用最新鮮嘅生果製造

打開份menu 全部都係日文

得! 睇圖叫餐

後尾叫咗個士多啤梨沙冰 好食到我想叫埋其他食

不得不提日本人嘅細心 一入舖頭嘅時候係熱到出曬汗

喺香港嘅話應該會畀人鬧 嗰種熱同埋焗係真係好趕客

但原來係最熱嘅情況下 食沙冰先係最爽

真係好佩服日本人

 

食完沙冰之後已經黃昏

係時候去試影倒影

但係試咗勁耐都影唔出最好嘅效果

因為前一晚落大雨 加上今日刮風

啲水影全部矇曬

影到對鞋都入曬沙入曬水

最後決定放棄走人

回程嘅時候 往觀音寺方向嘅巴士已經過咗尾班車

唯有搭詫間站方向嘅尾班車 再轉火車返高松

返到高松站已經8點 對鞋又濕又凍 都廢事搵嘢食

於是求其入咗間拉麵店 叫做德島拉麵

價錢非常之平而且好好食

食完就返旅館

 

 

Day 5

來到最後一日 大家都知我會食啲咩早餐㗎啦

冇錯 又係7仔飯團

我都唔想 但係真係好好食…

食完早餐之後就返去旅館check out啦

因為陣間去完個景點就直接出機場

告別一間最舒服嘅hostel

尼幾日都搭咗幾次琴平電鐵去高松站同高松港

今日要搭到反方向嘅尾站 – 琴電琴平

做咗個locker擺低行李之後就準備去做運動啦

點解我會形容係做運動? 因為要行一公里上山

來到琴平站得一個原因 就係要拜訪金刀比羅宮

金多比羅宮雖然係位於山上面 要行一公里樓梯先可以去到

但依然吸引無數嘅日本人嚟

因為金刀比羅宮被譽為日本最神聖嘅宮殿寺廟

更被日本人認為一生必定要嚟一次

歷史嘅嘢我唔介紹啦 好好咁欣賞沿途上山嘅相啦

購物街可以租借拐杖

金刀比羅宮

許願板

落山嘅時候先係最多人上山

行完山就要去趕飛機…

四國之旅完結!!

 

This entry was posted in 日本 and tagged , , , , , , , , , , , , , , , . Bookmark the permalink.