2-2-2017 DAY 1 緬甸 — 我最喜愛的國家 原來緬甸嘅旅程已經係接近2年前 對尼個國家嘅印象已經越嚟越淡 趁仲有少少記憶 都係寫返篇不完整的遊記 (可能少圖多字 haha) 2年前嘅緬甸 仲係一個非常冷門嘅國家 仲記得嗰陣嘅仰光 四處地盤 香格里拉酒店仲興建梗 到我去完返嚟 就見到緬甸政府向中國買咗幾百部新巴士 一直都想去多次尼個充滿神秘感嘅國家 無奈又想探索多啲國家 相信到有朝一日再到訪時 已經面目全非⋯⋯ Hello Myanmar 依家要直航緬甸 就得返緬甸國家航空同埋國泰港龍 而我以前就係撘香港快運 仲記得兩年前嘅快運減價真係好平 來回連稅唔使500蚊 簽證 以前拎特區護照入緬甸要搞簽證 喺金鐘嘅領事館整 大約270蚊 但今年(2018) 10月開始 特區護照終於免簽證 緬甸紙幣 2年前去大約 1美金=1300緬幣 要帶美金去當地機場換 美金要新淨到完全無摺痕 對美金o既要求好高 仰光國際機場 (網上圖片) 緬甸有兩大國際機場 一個係仰光 另一個係曼德勒 以前嘅快運都有直航呢兩個航點 但我就揀咗飛仰光 而我嘅旅程都冇去到曼德勒 因為唔夠時間 所以而家嘅我一直都好想再去多一次 聽人講烏本橋日落好靚 上面張相嘅國際機場好舊 亦都係兩年前嘅樣貌 到我走嗰陣已經見到機場不斷翻新同埋興建新航廈 而家嘅仰光機場連GUCCI都有 緬甸的士 香港飛緬甸大約兩個鐘頭鬆啲 所以眨下眼就已經去到 喺過關搞咗好耐之後 終於正式踏足緬甸國土 要由機場出市區 只有兩種方法 巴士: 號碼同地點都係緬文 所以幾高難度 的士: 最快最方便 但一定要殺價 仲要確定會開冷氣!! 尼到嘅司機會獅子開大口 一開始叫價好貴 所以要起碼殺到四分一價錢 同埋開冷氣好重要 尼到好多司機唔開冷氣 中午嘅緬甸係三十幾度 加上塵多塞車 你係會坐的士坐到中暑 火車路線圖係完全冇英文 因為我第一日喺仰光係冇行程 要等到夜晚先坐巴士 為咗消磨時間 我揀咗一個特別嘅方式出市區 好少遊客會咁做 鄉郊火車站 我係機場食完嘢就搭的士去咗最近機場嘅一個火車站 然後再轉火車出市區 緬甸曾經係英國人嘅殖民地 當時英國人係到打造咗一條環城鐵路 坐曬全程要四個鐘 而機場附近嘅火車站大約係半程左右 ~2個鐘 咁我為咗hea時間 就決定坐火車出市區 火車飛 係咪睇唔明呢? 唔知而家嘅緬甸多啲英文未 haha 2小時o既半程 約六毫子港幣 售票處 喺度要買火車飛簡直就係雞同鴨講 因為售票處職員係唔識英文 所以我都要督個地圖畀佢睇 後來發現好多本地人都冇買飛 因為無人會check 火車上的眾生相 緬甸嘅火車好污糟 車上充斥著臭味 車長見你係外國人通常都會指你去坐最後面個卡 而緬甸人亦都知道潛規則 唔會坐喺最後個卡 所以對遊客嚟講係安全啲 不過兩個鐘火車真係太悶呀 所以我就行咗去前面嗰啲車廂坐 其實都係好安全 緬甸人仲好有禮貌同我打招呼 係埋站嗰陣有小販出入 要小心D財物!! 日本捐贈的70年代JR列車 穿梭田野的線路 中途停站 市中心的大站 一個好殘舊嘅火車站 亦都係仰光最靚嘅火車站 尼到無閘口 完全係靠自律 走在大街上 入面一部一部白色嘅車就係緬甸嘅的士 仰光嘅塞車係世界級嚴重 好多時候行路仲快過搭車 穿梭美食攤 呢度出名食豬牛內臟 同埋魚湯米 但啱啱嚟到我就驚肚痾 所以無食到 獨立廣場 有個意大利人以為我係本地人 用英文嚟問我路...之後 dead air 蘇雷塔 仰光市政廳 行到就嚟中暑 食番件炸雞先 往翁山市場途中 翁山市場 翁山市場係仰光好出名的玉石市場 仲有好多手工藝品店同埋cafe Aung Mingalar Highway Bus Station 係市區hea咗幾個鐘後 就搭的士去咗長途巴士站 仰光其實係一個好悶嘅城市 真正要玩嘅地方 其實好遠 同樣哋有兩種交通方法 內陸機: 單程約HKD1200 但1個鐘飛到第二個城市 太貴...通常旅行團先選擇 瞓夜車: 單程約HKD80-130 由於多山路 城市之間車程約8-12小時 身為一個背包客 就當然揀後者啦 平得o黎又可以慳返一晚住宿錢 仰光 - 茵萊湖 12hrs車程 準備開車啦 信譽最好嘅 JJ Express Bus 隨車附送小食、蛋糕、汽水 休息站 旅程嘅第一程車辛苦啲 因為要搭12個鐘 (6p.m. - 6a.m.) 但係每4個鐘就會停一次休息站 每次停大約20分鐘 比人去廁所 拉筋 買嘢食 職員會叫醒曬所有人落車 包括司機 並且鎖門 防止有人偷野 12個鐘車程除咗屎忽痛 其實都係一個幾好嘅體驗 因為JJ Express每架車會有2位職員照顧客人 又有兩個司機輪流駕駛 所以非常安全 要留意o既係...巴士嘅總站並唔係茵萊湖(Inle Lake), 而係東枝(Taunggyi) 所以要問清楚職員先好落車 ***JJ Express 係最好嘅巴士公司...出發前記得係官方Facebook留位*** ***更新: 2017-8-4後已經唔可以FB留位, 可以直接係官網訂位*** 終於抵達Inle Lake啦 DAY 2 待續