回憶中的緬甸 – DAY 2

3-2-2017

DAY 2

本身由仰光去茵萊湖嘅車程大約12個鐘

但係通常都會早到

而我就早到咗個半鐘

Day 2 嘅凌晨四點半已經去到

Inle lake zone ticket

喺進入茵萊湖區域前 巴士會稍微停一停

之後每個遊客都要比10蚊美金買入場門票

其實都係發展用途

 

天都未光

買完飛過多半個鐘就會到站 問清楚職員先好落車

嚟到Inle lake嗰陣天都未光

雖然喺架車到斷斷續續都瞓咗5個鐘

但其實都好攰 所以就想搵間hostel休息下先

但係我出發前並冇book到hostel 因為覺得呢啲旅行變數好大

所以我而家就要即刻搵hostel

 

友善的叔叔

呢度四圍都黑蚊蚊 所以我都唔夠膽亂咁行

喺我最徬徨無助嗰陣 前面出現咗位成身酒氣嘅阿叔

佢話可以幫我搵hostel 加上呢度嘅網絡收得好差(限速3G…有好多地方仲要斷網)

所以我就決定信佢

是日早餐

成條大街上面淨係得一間舖頭有開 阿叔就叫我陪佢一齊食早餐

佢幫我點咗個炸花生餅 同埋緬甸奶茶

緬甸奶茶其實就係等於香港嘅茶走 所以我好中意飲

期間仲同佢傾咗一陣計

到最後賣單嗰陣佢仲請埋我 其實尼餐剩係3蚊港幣

但佢死都唔畀我賣單

食完之後佢就真係帶咗我去搵hostel

尋找hostel的途中

尋找hostel的途中

Inle Lake hostel

行咗十分鐘左右 佢就帶我嚟咗一間幾乾淨hostel

由於我係好chur行程 夜晚又會搭夜車離開

所以我入住嗰陣淨係同host講淨係住早上

個價錢真係平到你唔信 40蚊港幣 住12個鐘

間hostel無碌架床 全部都係單人房 廁所係共用

茵萊湖同蒲甘大部分hostel都係冇冷氣 因為夜晚可以跌到得返10度

之後我一擺低個背囊就瞓死咗 haha

 

茵萊湖支流

瞓咗幾個鐘之後就醒咗啦

趁朝早hostel冇人 就即刻去咗沖涼同刷牙

執番好個背囊就出發

凌晨嗰陣周圍都黑蚊蚊 乜都睇唔到

朝早出門就發現原來我住間hostel係對住條河

 

天氣好到不得了

出湖啦

上面講講下就冇再提到阿叔…阿叔幫咗我咁多我梗係好感激佢啦

食早餐嗰陣 佢同我講佢屋企人有揸艇仔接遊客去茵萊湖玩

既然見佢肯幫我 加上我朝早其實都要出去搵艇仔

所以我都廢事煩 同佢講幫我安排坐佢屋企人架艇

所以朝早去返條大街到搵佢

而係到包架艇仔對於香港人嚟講其實唔貴 大約70蚊港幣半日

一架艇仔可以坐到6-8人  如果我朝早6點嚟碼頭嘅話

其實好容易搵到人一齊夾船 除返開每人10蚊港幣

不過我想瞓覺多過睇日出 所以就唯有自己包一架

行程就唔多講喇 因為都係跟住船家o既路線行一圈

我嘅要求好簡單 有得睇長頸族就得

 

見唔見到有人搭熱氣球?

呢個日出靚到不得了

呢度嘅漁夫識得用隻腳嚟划船
再用手嚟捕魚

水上村落

終於嚟到呢度

長頸族

要睇真正嘅長頸族 只有泰北同緬甸睇到

見唔見到我包到成隻粽咁

因為未去到中午  只係得十幾度

加上茵萊湖係一個位於山上o既湖

所以啲風吹埋嚟真係好凍

用植物整工藝品嘅工場

貓廟

水上市集

喺度買咗支高露潔牙膏

無聊到影人剪頭髮

個市集其實好大 行咗成個鐘都未行完…

行完個市集之後仲去咗淘金同埋開珍珠嘅地方

之後再嚟咗一個整船嘅工場

呢個時候其實已經一點

我都開始肚餓啦

雖然船家諗住停係個水上餐廳 等我食完嘢再繼續遊覽茵萊湖

但係睇完長頸族之後 我已經冇心情再去第二度

所以我叫佢取消下午嘅行程返去

回程

總括嚟講 70蚊港幣大約可以包到8個鐘 好抵!

因為茵萊湖好大 仲有好多地方可以去

不過睇完長頸族我已經心滿意足

所以我就返去啦

好彩我一個人搭船先可以咁彈性

 

返到碼頭嗰陣已經兩點幾

之後我返一返hostel掉低個背囊

就即刻衝去搵嘢食

打開TripAdvisor 見到有間法國人開嘅餐廳好似好好食

所以諗都冇諗就去咗食

呢餐包埋嘢飲食咗80蚊港幣

對於當地真係好貴 不過啲嘢食水準幾高

 

可能有啲人會覺得因為會好悶

但旅行唔一定要多嘢玩

有時慢慢感受下都幾舒服

喺半個台北市咁大嘅湖上面漂流半日

的確地心曠神怡

 

食完嘢之後就周圍行下

再返hostel瞓咗一陣

同大叔告別後   就出發去巴士站

夜晚7點半開車  出發去萬塔之城

蒲甘

 

 

Day 3-5 待續

.

 

 

 

 

 

 

 

 

This entry was posted in 緬甸 and tagged , , , , , , , . Bookmark the permalink.