Hea遊四國 – DAY 2

17-5-2018

Day 2

晨早流流就要孭埋個背囊check out啦

因為今日玩完之後會去第二個縣

七仔早餐是常識吧

 

四國旅行如果唔係自駕遊

一定要睇清楚曬火車同巴士嘅時間表

因為一日可能淨係得幾班

而今日我就會坐往高知方向嘅火車去山區hea

 

搭咗個半鐘左右 就嚟到大步危站

火車中途經過咗好多山同田嘅地方

特別係行鐵橋穿過河流個陣

真係好靚

大步危站有條迷你蔓橋

將個行李寄存喺火車站locker之後就出發

一出到去巴士站就見到架巴士走咗

之後幾個台灣人就自己包咗架的士去景點

咁我得返一個人就唯有行路去啦

因為呢度嘅巴士一日得幾班

下一架巴士要等兩個鐘

而行路去第一個景點只係需要20分鐘

終於見到要去嘅地方

大步危遊船

第一站就去咗大步危峽遊船河

呢度係四季都有唔同嘅景色

但係5月份去嘅時候就好一般

聽聞要落雪嘅時候或者紅葉開嘅時候去先靚

入到去啲員工唔係幾識英文

不過佢有好多種語言嘅小冊子畀客人

等咗幾分鐘就可以落去上船啦

 

清澈

老實講…其實我都覺得好一般

所以揀啱季節係好重要

游完船河之後就去咗附近嘅巴士站等巴士

 

一日得四班車真係少到喊

所以唔係自駕遊嘅話

好難可以去到多景點

巴士飛

上車拎飛落車還飛比錢

西祖谷只可以依賴巴士

所以出發之前唱定多少少散紙

 

嚟到日本點可以唔浸溫泉呢

坐咗20分鐘巴士之後 就嚟到祕境祖谷之湯

下一班巴士要等成三個鐘 即係我可以慢慢咁樣浸溫泉

正常浸溫泉嘅地方係唔準影相 但係我5月係淡季

加上尼到係一啲山卡拉嘅地方

所以成個溫泉得我自己一個……

留意返呢度浸一次溫泉係1000 Yen

即係70蚊港幣包咗成個場 haha

聽講女湯個景靚D

浸完溫泉之後仲有個半個鐘先有巴士

本身諗住喺溫泉旅館食懷石料理

但係可能冇客所以餐廳就關咗

呢頭附近一啲嘢食都冇

我就諗住行一個鐘去下一個景點

好彩行咗3個字就見到成座山o既唯一一間餐廳

呢間餐廳嘅老闆係一對夫婦

老公係外國人 老婆係日本人

結咗婚之後就喺度開間餐廳隱居

極度推介呢間餐廳嘅日式咖哩!!!~

 

食完嘢就行咗去餐廳附近嘅巴士站等車

 

坐咗十分鐘巴士 嚟到西祖谷嘅最後一個景點

祖谷蔓藤橋

蔓橋係四國必嚟嘅景點

睇人哋行嗰陣就好似好簡單

但D空隙其實可以夠你sip隻腳入去 我都有啲淆底

當我行完條橋嘅時候 有兩架旅遊巴停咗喺出面

好彩我早咗嚟…….

 

又到咗等巴士嘅時候

5點半o既車

一日得四班巴士

5點半已經係尾班車

下一班係聽朝8點

得我一個自由行遊客夠膽博尾班車走

趕唔切都幾大鑊

返到去火車站嗰陣發生咗件事嚇死我

我行到入火車站先醒起我跌咗個銀包喺巴士

好彩個司機冇走到……

今日一口氣跨咗三個縣 夜晚八點終於來到高知縣

高知市內交通可以依賴電車 因為jr pass都包埋

但係以我嘅經驗就係最好唔好搭

因為啲班次唔準 同埋唔係幾識搭

行路可能仲快過等電車

 

今晚唔住hostel

去咗酒店放低行李之後就即刻出咗去食嘢

 

高知縣有兩種名物 其中一樣就係燒鏗魚

我去咗最出名嗰間食 真係好食到不得了

加上收咗工之後好多日本人來居酒屋消遣

成間店舖好有氣氛

 

食完燒鏗魚之後

就去咗搵第二種名物 —— 屋台煎餃

高知縣最出名嗰間先屋台叫做 屋台安兵衛

但係排隊要等差唔多一個鐘 所以我都係放棄

喺酒店附近有條屋台街 有好多間屋台

我就求其咁樣入咗一間都食煎餃

味道都唔錯 加上係我第一次體驗最地道嘅屋台

 

返到酒店食埋個布甸就瞓覺!!~

 

Day 3 待續

This entry was posted in 日本 and tagged , , , , , , , , , , , , , , , , . Bookmark the permalink.