趁住秋高氣爽,天朗氣清、溫度適中,所以一個人出去郊遊。突然好想重遊舊地,於是就plan咗今次「石澳、鶴咀天涯海角遊」。記得中學時代,石澳同赤柱簡直就係我嘅遊樂場,嗰時真喺喺度留低咗好多笑聲與腳印。無論學校旅行、學會郊遊、聯校gathering,九成都係嚟呢兩個地方,一年閒閒地嚟幾次,連我媽媽大人都忍唔住話我哋毫無新意。 石澳(英文:Shek O)位於港島南區末端,赤柱以東,景色優美,環境清靜。除咗石澳山仔嘅豪宅區之外,全區幾乎冇高樓,甚至比大澳和梅窩更近似郊野。 石澳泳灘水清沙幼,有救生員當值,鄰近唔少食肆同燒烤場,所以以前經常一大班人嚟燒烤。另外,沙灘附近嘅峭壁更加係運動攀登嘅好地方,吸引咗唔少愛好者嚟到挑戰。 作為港島人,嚟石澳非常方便容易,所以唔使倒塔咁早起身出發。只要喺筲箕灣巴士總站搭9號巴士或者搭紅色小巴,大約25mins左右都可以直達石澳。嚟到石澳時都未到中午12點,喺石澳總站落車後經過迴旋處就可以到達石澳泳灘。 大家望住下圖1點方向,就會看到一座燈塔,就係我一陣要去嘅鶴咀半島喇! 石澳泳灘全景(下圖)-(由右至左) 鶴咀半島、宋崗、橫瀾島、五分洲、石澳山仔 天氣咁好而且清風送爽,玩滑翔傘一流~龍脊係香港最熱門嘅飛行場地,交通方便,風景優美。而且嚟得龍脊飛嘅,技術有一定水準,否則唔可以喺度玩! 離開插滿太陽傘、放滿太陽櫈同泳客不絕嘅沙灘,首先第一件事當然就係醫下個肚。去石澳如果唔燒烤,咁食嘢只有兩個選擇,一係就去洪記士多,一係就去石澳樂園。是日我揀咗去洪記士多食lunch! 石澳是個美麗的地方,石澳村如歐洲小鎮,充滿色彩的建築物,像每戶人家都為房子悉心打扮,與鄰居爭艷鬥麗。 洪記士多位於石澳村內,地址係石澳村326號。想去就先行,經過一排充滿繽紛色彩嘅屋(我哋亦會叫呢度做彩虹路),到見到休憩處準備轉右前,喺左邊橫街口就會見到洪記嘅牌。 見到洪記嘅牌,跟住箭咀方向就會見到洪記士多&洪記麵店。 洪記瑟縮於小巷一側,天后廟旁邊。看到洪記歲月斑斑嘅門面裝潢,就知歷史悠久。剛好LUNCH TIME,都坐到爆爆地。 洪記主打係粉麵食,除咗一般牛腩、丸類等,鴨脾更加被大家大力推介。飲品係自助式,大家可以自行到飲品櫃揀鍾意嘅。 我急不及待先點一碗燒鴨脾瀨粉。阿姐話要問下廚房先,非常Lucky,我係有鴨脾食嘅! (由於洪記好有性格,規定賣完一隻燒鴨,先再開另一隻。所以即使你願意俾多少少錢食鴨脾都好,如果輪到你係其他部位,咁就只可以食其他部位喇!) 鴨脾瀨一嚟到,梗係試下個湯底先啦!味道好清、好簡單,有喺屋企整嘅感覺。燒鴨雖然唔係自家燒嘅,但來貨質素好好,唔油膩,啲皮真係脆皮,好有口感,完全值$30一碗。另外想點一碟菜($12),點知已經唔賣通菜,於是再點一碟雞腎($12),雞腎就令我好失望,又乾又韌,早知叫其他菜啦!加埋玻璃樽裝大可樂(個人覺得玻璃樽裝可樂特別好飲),午餐一共$49! 石澳村內除咗有好多好靚、充滿歐陸風情嘅屋之外,亦有唔少古老嘅特色建築:屬於香港三級歷史建築嘅巴士總站、石澳健康院、居民協進會、文武廟、天后古廟等等,都低調訴說着石澳嘅歷史。 食飽飽繼續旅程,前往石澳海角–大頭洲。沿著石澳村路一直向前行,然後就連接住上斜嘅石澳山仔路,整段路大約7分鐘左右,行到盡頭會見到通向大頭洲嘅小路入口。 呢個時候,好多人都會即刻被左邊嘅大頭洲吸引住。但其實右邊都有靚景㗎! 喺右邊觀景台喺可以眺望鶴咀半島!好彩嚟咗石澳先,因為鶴咀嗰邊天色麻麻地囉! 以前從來都冇留意過,竟然喺度都可以見到鶴咀燈塔!望住呢個景色,完全唔似身處香港嘅感覺。 走下石梯轉左會有另一條通往大頭洲嘅石梯。 石澳風景得天獨厚,既享無邊海景,又有怡人海灘。正灘背後,仲有大自然留下嘅鬼斧神工。海角郊遊區嘅花崗岩經歷一億四千萬年浪花侵蝕,形態各異,有好似人手砌成嘅工整立方巨石,有像麵包塊般嘅片片切開,紋理縱横交錯,係難得一見嘅自然奇景。 由於我係雨神,可以喺出遊時遇到大晴天嘅機會率接近零。當我見到呢幅海天一色配上無數岩石所構成嘅美景時,真係忍唔住讚嘆大自然嘅神奇。(不枉我睇足兩個星期天氣預測嚟plan行程,影出嚟嘅相唔使執已經好靚。) 大頭洲與夢幻粉藍情人橋~ 呢條粉藍色石橋係將石澳同大頭洲相連~ 記得細個時,條橋仲係白色嘅。後嚟到咗中學某次嚟燒烤時,驚覺變咗粉藍色,當時覺得好靚,而大家都呢條橋做「藍橋」。 後嚟唔知點解又被稱為「情人橋」。有解說指因為橋嘅寬度啱啱夠兩個人行過,所以浪漫化而命名為「情人橋」。唔知喺咪因為「情人橋」個名,呢度變成咗婚紗攝影勝地。當日遊玩時,就有3對新人喺度影婚紗相。(雖然我攞嘅角度有D衰,但上圖橋右仲有好出名嘅「鼠吻豬石」。) 我個人比較念舊,都係比較鍾意「藍橋」呢個名多D。嗰日有微風所以影唔到天空之鏡~ 藍橋下嘅石灘可以通往另一邊嘅石澳山仔路同石澳後灘。 潮退時,石灘會完全露出水面,可以走出石灘外;潮漲時,石灘會被水完全淹沒,大家只能夠通過石橋走到大頭洲。 當時正好潮退,所以我就衝落石灘影相。正好有對情侶嚟到,見到我喺石灘玩,又影得咁開心,於是佢哋都走落埋嚟。 走過石澳藍橋,直達石澳連島沙洲-大頭洲!再一直向前走,會看見兩條分叉小路,無論邊一條,目的地都係相同,走到頂就係大頭洲嘅最高點。 石澳後灘~天氣晴朗,就連海水都呈現不同嘅藍色。 位於香港島東南面嘅大頭洲,係香港一個島嶼,位於石澳山仔東部附近,大頭洲西岸有一連島沙洲與石澳陸地相連。呢度係除咗狗髀洲外,喺港島可見嘅連島沙洲。 由於大頭洲地處於香港東面,受東北信風影響,島上有著好多奇岩異石,而且島嘅四面多為峭壁,與香港地質公園嘅島群相似。 「大頭洲」呢個名嘅由來,原來係有一塊大岩石,企喺某一個位置睇,就好似人嘅側面。大家下次去到不妨試下搵唔搵到喇! 我喺左邊小徑上山,經過岩石壁,沿途真係見到有唔少奇形怪狀嘅大石。 島上開闢咗多條行山路徑,方便遊客到大頭洲遊覽。喺大頭洲上可以眺望遠處景色。上圖10點方向係大浪西灣,11點方向係歌連臣角。大家又估下隔海對望嘅係邊度呢? 好喇!為大家開估!前面12點方向就係將軍澳,喺度可以清楚見到 CCTBB電視城同日出康城。 踏上過億歲嘅石頭,企係呢個天涯海角,欣賞海天一色美景。 近年香港嘅污染愈趨嚴重,嚟到大頭洲上,見到海水嘅顏色,突然令我想起鄭梓靈小姐寫嘅《海不再藍》,更深刻體會到香港大部份嘅海水都不再藍呢個事實。 面前一大片深藍海洋,左右都環繞著無數被海水浸蝕和經風化而形成不同外型和形狀嘅岩石,整個畫面真係震撼人心。 大頭洲係屬於石澳海角郊遊區嘅主體部份,並喺同石澳之間嘅連島沙洲上興建一條粉藍色嘅行人橋。 喺大頭洲半山腰望落去,見到有隻犀牛想爬上山。不過又有D人話似一條毛毛蟲,個人覺得從下而上望又真係幾似毛毛蟲嘅!由於沿途太多奇形怪石,大家可以自己嚟發掘一下。 大頭洲嘅東面、南面和北面都係面向。上圖1點方向就係東龍洲南堂尾喇! 而南面就係五分洲同再後面嘅鶴咀半島。五分洲得名係以為好似被砍咗4刀,分成5份。 海中之城-石澳,仲背靠龍脊,正! 鶴咀半島、五分洲、石澳、龍脊、大頭洲盡收眼底! 沿住另一條小徑落山。樹木糾纏生長,恍如拱門。 大頭洲上嘅燒烤爐,除非嚟睇星,否則日曬雨淋,點會喺度燒烤啊? 好似懸浮半空嘅天空之城,靚到暈~所以千歧唔後影完藍橋就走人!俗語有云:企喺山腳嘅人永遠唔會明白企喺山頂嘅人所見到嘅風景,所以嚟到一定要登上大頭洲先會見到咁多美景。(因為太多人喺橋度打完卡就走人,覺得好可惜囉!) 沿住來時路離開呢個充滿回憶嘅海角~ 最後趁住整個海角只有我一個人嚟番張全景,超圓滿!大滿足! 離開石澳,準備出發去下一個目的地-鶴咀!