梅夫人婦女會係本港其中一幢我最鍾意嘅建築物。記得早兩年仲未開通西港島線,每次搭23號返U, 都一定會經過The Helena May。當時喺巴士上望見呢座充滿歐陸風格嘅大宅,好似我小時候住嘅嗰座古老大宅,當時就已經好想可以入內參觀。再加上梅夫人婦女會實行會員制,只招待會員,充滿神秘色彩,一直都未能成行,今年終於有機會,當然絕對唔可以錯過。 梅夫人婦女會(The Helena May Institute)由香港第十五任總督梅含理爵士嘅夫人(Lady Helena May)成立,於1974年易名為 “The Helena May”,為途經香港而短暫留港嘅單身職業婦女提供住宿,同時為會員舉辦教育及社交活動。 梅夫人婦女會主樓(The Helena May main building)位於中環花園道35號,建於1916年,至今啱啱100週年,呢個就係點解我今年一定要嚟嘅原因。建築物主樓喺1993年10月被政府列為法定古蹟。 十八世紀歐洲興起婦女運動,名媛貴族流行投身慈善服務。1898年,英國人Lucy Eyre在港成立基督教女青年會(Young Women's Christian Association,後稱Hong Kong Women's Institute),早期曾在柏拱行(Beaconsfield Arcade)、大律師普樂(Edward Pollock)辦事處和皇后大道中嘅樓宇運作。1912年更想為外籍女子籌建女青年宿舍,可惜計劃未成便病逝。 梅夫人婦女會前身就係基督教女青年會,前港督梅含理夫人繼承Lucy遺願,於1913年倡建梅夫人婦女會大樓,用3,600元買座港督府斜對面花園道嘅土地,再由埃利·嘉道理、劉鑄伯、陳啟明、何東及何甘棠捐贈15,000元,於1914年興建,1916年9月12日正式落成啟用。1937年10月加建天台。 香港開埠初期,外商來港發展,並為外籍員工提供宿舍。當時嘅僱主可限制單身員工婚期,政府部門規定來港頭四年唔可以結婚,只有少部份高級官員可獲半山獨立屋作宿舍。嗰個年代維多利亞城內男女比例嚴重失衡,來港工作嘅單身女子除咗寂寞外,更係一宿難尋。 直到Helena May欖橄綠色大門嘅打開,為單身女子提供宿位,成為香港首座為外籍單身女士而設嘅女子宿舍與會所,亦開啟呢個百年故事。 梅夫人婦女會主樓屬維多利亞及愛德華古典復興式建築風格,並糅合了藝術學院式、巴洛克及風格主義嘅建築特色。建築物呈凹字形,樓高三層,另設有一層地庫。面向花園道嘅主立面左右對稱,正中為入口門廊,地下及二樓均設有設有前廊,分別建有圓拱形和弧形遊廊。入口門廊上方嘅弧形圓拱山牆以花形紋飾點綴,山牆由兩條具新古典風格愛奧尼克式圓柱支撐,廊柱上嘅水果流蘇裝飾,係二十年代新古典建築嘅標誌。每扇門上嘅穹型窗花裝飾都有充滿中國色彩、「天圓地方」嘅銅錢形狀,完全係中西合璧嘅結合。而呢個銅錢形狀亦成為咗梅夫人婦女會嘅代表標誌。 主大樓由當時著名設計師樓 Denison.Ram & Gibbs 設計,與極具空間感嘅明德國際醫院(Matilda Hospital,1906)、好有氣勢嘅香港大學「明原堂」(The Old Halls,1913-1915)及古典雅緻嘅淺水灣酒店(Repulse Bay Hotel,1920)一脈相承。上面兩層係房間,底下兩層係餐廳及會議室。咁嘅設計喺嗰個年代係非常質樸平實,很舒適、很家庭式嘅平民級建築。大門外那條小長廊,因為英國人不適應香港潮濕悶熱嘅天氣,所以會多建一面外牆,隔開悶熱與陽光,落雨時又可以擋雨。香港大學、茶具博物館都有嘅設計,然後再影響英國建築,成為一代標記。 建築物曾於香港日治時期(1941-1945年)被日軍佔用作為宿舍、會所和馬廐,樓內傢俬及圖書館內嘅古董書籍盡失,僅餘現在大門外的兩張長木椅。1944年用作香港公共圖書館,英文小說變成日本書籍,宣揚日本嘅仁義禮智信,但冇市民肯去睇。1945年日軍投降後,英國皇家空軍短暫徵用建立總部,翌年撤走。 建築物於1946年重開,但16位股東都疏散回國,會員亦由700個變400個,無法運作。1947年,剩下嘅會員重新召集及籌款。一個個老員工、舊會員帶着新會員,再次推開橄欖綠大門。 首先嚟到地下嗰層嘅Garden Room (花園廳) ,之所以叫Garden Room係因為出面就係花園喇。1948年,Carol Bateman來港辦首間芭蕾舞學校Carol Bateman School of Dancing,因為好鍾意Garden Room嘅環境,以每月20元租用做舞蹈室(當年24堂學費300元)。多位本地著名舞蹈家和名人如王仁曼、毛妹、陳寶珠等都係佢哋嘅學生。1954年,Joan Campbell加入並帶來「英國皇家芭蕾舞學院」(Royal Academy of Dance)考試課程。 Garden Room除咗定期舉辦幼兒芭蕾舞班,亦有成人社交舞班等等。 會所設施包括7間宴會廳、辦公室、圖書館、閱讀室、餐廳、休息室、課室、舍監宿舍及客房。有24個單人及雙人房,可為28人提供住宿服務,並設有圖書館、閱讀室、課室等設施。 從Garden Room外就係花園,綠樹林蔭,環境優美。 Garden Room隔離就係圖書館。圖書館擁有超過二萬五千本藏書,歡迎會員隨時借閱。 圖書館好有名,因為當時完全係「淑女」嘅世界,任何含有親密、接吻場面嘅書籍都被禁。後來館裏出現經典愛情小說《The Blue Lagoon》,書中難得嘅大膽場面令呢本書成為館裏搶手書。當年呢個地方完全係小說中嚴格嘅淑女學校一樣。 戰後本來喺二樓嘅圖書館搬到地下,向着陽光明媚嘅花園。 圖書館內設有兒童圖書角~ 個人對典雅嘅英式裝修情有獨鍾,大宅到處散發着迷人嘅古典美。 樓梯仍然保有木扶手。 每層樓梯口都有個小銅鐘,以及透過銅管傳話嘅「話筒」,俾唔同樓層嘅工作人員及住客通話。 好懷舊嘅信箱 拱形窗戶-原本外牆嘅窗全部都係木製,大約二三十年代時先換成鐵窗。 (俾我搵到個全木嘅~) 嚟到2樓嘅房間外,長廊充滿氣派。 單人標準房有八呎超高樓底,每日有女僕換毛巾床單,包早餐,仲可以享用會所裏面嘅設施。200呎單人標準房每日房價$580,每月唔使$12000,就可以住係呢座古蹟裏面。所有房間都有落地大窗及小露台,採光及育風充足。 時至今日,The Helena May依然能夠保持初心,堅持為大眾提供afford到嘅宿位。 另一間房間嘅擺設明顯比較名貴,細問之下先知,有好多房客住完後會將自己入住時購入嘅物品捐獻俾The Helena May~ The Helena May主樓只有外部列入法定古蹟,而主樓內部只被評作二級歷史建築。所以政府只管理外觀維修,而內部損耗全部由會員負責。歷史層層叠叠,令The Helena May得以延續,就係靠會員與員工嘅執着,讓它逃過翻新成「古典優雅」但失去內涵嘅命運。 從房間露台望到另一幢我亦好鍾意嘅建築物-Saint Joseph's College 記得中學時經常同佢哋有Joint School Activities,所以對呢座建築物好熟悉、好有親切感。 參觀完2/F,落返嚟 G/F嘅Main Lounge(主樓大廳) 整個寬敞嘅主樓大廳散發百年典雅氣息,但最受大家歡迎,最吸引我嘅一定係呢度嘅餐飲服務。因為呢度供應酒店級嘅國際菜式!賣相並唔花巧,但絕對選用真材實料同用心製作,餐牌菜式約三個月轉一次,更因應唔同節日炮製特別佳餚。 每天下午3時至5時,餐廳大堂會供應傳統英式下午茶。睇睇時間,又到咗Tea Time,梗係要食Afternoon Tea啦! 是日提供The Helena May Platter同1916 Platter兩款下午茶。1916 Platter係素食版,對菌類敏感嘅我絕對唔會揀。所以我同好友都揀The Helena May Platter~ The Helena May Platter ($100) (Scone, Scottish Salmon Open Face Sandwich, Quiche Lorraine, Mango Filo Roll, Carrot Cake & Raspberry Macaron) 每一樣食物都非常好食,話到明下午茶,scone一定要有水準!去過唔少餐廳同酒店食tea,一係就scone做得唔錯,但cream & jam就完全唔掂,一係就掉番轉。呢度當然做得好味道,連cream & jam都好講究!平時Quiche Lorraine呢種鹹pie真係唔係我杯茶,但呢個真係好味,令我眼前一亮。Mango Filo Roll真係好少食,充滿驚喜嘅好味道。Macaron我自問食唔少,而呢度嘅Macaron一食入口,即刻令我腦中浮現出Macaron嘅意思-「少女的酥胸」,即係口感外脆內軟,入口即化。就連下午茶奉送嘅朱古力都好好味,再加上只係$100,真係完全超值。 最後竟然仲收到行政總廚K. K. Leung特別做嘅cookies,好味到令人感覺好幸福。原本我帶番屋企珍而重之同家人分享,點知太好味,食完晚飯話飽嘅Daddy一個人食咗半包!!! 大廳內有座大鋼琴,歡迎會員即興演奏一曲。沿住樓梯行,會去到Green Room (綠廳)。 Green Room感覺好雅緻,從窗口望出去,可以見到紅色嘅山頂纜車緩緩駛過。 Green Room裏面仲有一個小房間-Card Room(橋牌室)。會員可以租借活動室舉辦音樂會、打麻雀或橋牌活動。 Main Lounge外就係大露台。大家留意地下嘅拼花瓷磚,依然係二三十年代流行嘅式樣,感覺好摩登時代。 從大露台望落花園,好寧靜、好舒服。 最後嚟到個人最鍾意嘅Blue Room,Blue Room亦係住客最愛嘅交誼室。Blue Room寬敞優雅,穹型窗花係二十年代以前英式建築嘅特色,喺半世紀後終於重見天日。 多年來每有節日或同居人生日,大家就會喺交誼室開party慶祝。 Blue Room牆上掛有好多好有紀念價值嘅相片,包括香港第十五任總督梅含理爵士同夫人Lady Helena May、當年The Helena May嘅開幕等等。 Blue Room亦處處見到中西融合嘅風格,因為Lady Helena May嚟到香港,接觸到中國文化,於是將中西合璧概念放到設計入面。 坐係Blue Room真係非常舒服,完全可以hea足一個下午。 The Helena May附近有唔少同樣富殖民地色彩嘅歷史建築(茶具博物館、聖約翰座堂等),大家可以好似我咁隨即嚟一趟殖民地建築之旅。 梅夫人婦女會平日只招待會員,而每年會有一次開放日。除此之外,每月其中一個星期六早上,梅夫人婦女會亦會提供中、英文導賞團俾公眾人士參觀。 提提大家,今年最後一次導賞團就喺下星期六(12月17日)舉行,有興趣嘅朋友可以到梅夫人婦女會網站查看詳情: http://www.helenamay.com/Public/20_public_access_general_public.php 梅夫人婦女會 地址:中環花園道35號 電話:2522 6766 網址:http://www.helenamay.com/