體驗日本酒場文化，不醉無歸嘅消遣好去處 係人都知遊博多一定要去中洲屋台，而去上野就一定要去勁熱鬧超好味串燒酒場，體驗日本大眾酒場文化！一齊感受入夜後嘅東京下町風情 ！ 每年一到櫻花季，上野都會堆滿賞花嘅人潮，連帶令上野動物園及阿美橫町等景點都比平常更熱鬧。近年呢個老區周邊亦新增了不少概念特別嘅商業設施，無論文青、foodie又或者一家大細都可以找到啱心水嘅目的地，好好感受下町風情！ 混雜熱鬧嘅上野係感受東京下町風情最佳地點。不過要提提大家，雖然上野交通方便、消費平、各式店舖林立，要美食有美食、要藝術有藝術、要公園有公園，最啱我呢D咁多心嘅遊人。 但大家要多加留意，入夜最好不要獨自到公園、暗巷等人少嘅地方，再加上附近有好多酒場、居酒屋，亦要小心醉漢，一定要提高警覺，千歧唔好以為日本治安好就可以毫無戒心。 上野除咗有好多歷史悠久嘅餐飲老舖，亦有好多可以豪邁吃喝嘅大眾酒場、居酒屋同立食店。呢D食店大部份都聚集在上野嘅高架鐵路下面，環境條件唔算好好，但入夜後人潮卻從未間斷。 今次特登同好友嚟體驗日本大眾酒場文化，之前有日本節目曾介紹TSGG（Tokyo Systematized Goodwill Guide Club），呢個絕對係上野一大特色，就好似去博多一定要體驗中洲屋台一樣。嚟得上野一定唔可以錯過去酒場食串燒、飲番杯，所以就帶咗好友嚟呢間喺上野超出名嘅酒場－もつ焼き大統領 支店！（聽個名就夠晒霸氣啦，haha！） 上野區最多酒場、食店嘅地方位於「御徒町駅前通り」同「上野御徒町中央通り」一帶。周邊一入夜就會便變成了附近上班族嘅消遣好去處。 建議大家可以喺上野駅廣小路出口，只要直接過馬路，走進對面的「上野御徒町中央通り」，裏面有超多酒場、食店。 而我要去嘅大眾串燒酒場～もつ焼き大統領 支店就沿著「上野御徒町中央通り」直行，然後喺右邊第二條巷轉入去行到一半就會見到。 之前睇日劇，見到好多日本人放工都會去呢D酒場飲番杯、吹下水、應酬下，就好想去吓日本嘅大眾酒場！喺日本去呢D酒場大多數都係以男性客人居多，比較少年輕女性自己或同女性友人幫襯（會幫襯嘅多數都係日劇女主角）。 我唔係日本女仔所以唔介意去酒場，但比較擔心酒場煙霧瀰漫會令我氣管敏感。去到店內係見到有人食煙，不過唔算好多，加上店內通風系統唔錯，竟然冇事！ 嚟到勁墟冚熱鬧嘅大眾串燒酒場－もつ焼き大統領 支店，店外擺放住露天座位，我一去到門口就有店員帶我走入店內，原本以為咁好唔使排隊，點知原來係喺店入面排，不過係有得坐嘅。原因係當有客人一離開，店員收拾好就可以即刻請下一組客人入座。 一入到大統領就感受到店內一片歡樂嘅氣氛，長長嘅Counter席全部坐滿晒人，好壯觀。Counter席後面就係排隊座位，所以座位空間唔多，因為兩者之間仲要留條通道俾其他客人過。 一般嚟講，如果去食嘢我都鍾意去本店，但今次嚟大統領，我反而揀咗支店。其實大統領 本店同支店距離好近，但女仔去嘅話去支店會好D，因為支店店面比較大（上下層加起來有超過80個座位），而且環境比較整齊乾淨。晚市時段都經常滿座。 餐牌方面，單是串燒已經有超過30款，肉類、魚類、內臟、野菜都有，價錢十分親民。識日文有着數，因為menu係冇圖。 由於大統領真係好出名，不時有外國客人嚟，所以設有英文Menu，但款式比日文Menu少好多。 身為酒場女漢子，既然嚟得酒場咁就梗係一定要叫酒飲啦！除咗Drink Menu之外，店內牆上亦掛滿酒牌。唔你揀唔到，最驚唔知揀邊款好。 我哋點咗杯生啤同Hoppy啤酒燒酎，配串燒一流。 喺日本，燒酎又被稱為日本燒酒，係一種產自日本嘅傳統蒸餾酒。名稱嚟自古代漢語，與燒酒同源。燒酎係很有個性嘅酒，日本各個地區都有出產，而每個地區因為水質、原材料、氣候不同，會釀製出不同風味嘅燒酎。燒酌比起清酒更平民、又更具有變化性，價格亦較平。 其實近年日本人對酒嘅喜愛有所改變，居酒屋最受歡迎嘅杯中物已由日本酒變成燒酎，喜歡燒酎嘅人不再只係大叔，就連年輕女生亦愛上燒酎。唔似得清酒飲法咁單調，燒酎可以配埋其他飲品：例如綠茶燒酎（之前飲過，味道有怪，唔多中意）、烏龍茶燒酎（味道ok），仲有果汁燒酎（超中意，成日飲）。不過女仔要小心，果汁燒酎係好易入口，但酒精度依然係高，酒量一般要小心。好似我fd就咗一半都未夠就high咗••• 好多人以為飲酒一定要食D 好濃味嘅食物，但好多日本女性都鍾意配上蔬菜漬物（soak），所以點咗茄子漬物，原本都驚幾酸，因為我唔中意食酸嘢，但呢款唔會，幾清爽醒胃。（漬物簡單嚟講即係日本泡菜。） イカ焼（400円） 每次飲酒，叫燒魷魚食可以話係常識。去居酒屋食燒魷魚，好驚會將魷魚燒到太乾身，咁魷魚就會變到好韌。大統領嘅燒魷魚做得好好，表面燒到好香，但肉質保持爽脆彈牙。正！ 鶏ソーセージ （名古屋コーチン使用）－（380円） 好友想食腸仔，所以叫咗雞肉腸。呢款雞肉腸使用咗「日本三大美味雞」之一嘅名古屋コーチン雞肉，仲加埋雞軟骨製成，好有質感，好味！ 牛ギアラ塩焼（牛の第四胃袋） －300円 因為腸胃唔好，所以我好多嘢都唔多食。其中一樣就係牛雜，從來冇喺街邊買過牛雜食，而喺屋企亦唔多食。雖然全部都應該有食過，但真係冇研究。嚟到日本，我比較放心，所以點咗呢個第四個胃試下。牛嘅第四個胃叫牛傘肚，又可以叫做沙瓜。意外地竟然好爽口，有少少似食緊雞腎，幾特別幾好味，但可能落多咗鹽去燒，鹹咗少少。 特上馬刺し（圖右） 580円 竟然見到有馬肉刺身，對我呢種鍾意食新嘢嘅人又點可以錯過呢？！於是我問好友夠唔夠膽食，佢話冇問題，所以就叫咗喇！馬肉肉質似牛肉，不過韌D，冇生味、冇雪味、亦冇血腥味，只係有一股馬獨有嘅味道。其實冇想像中咁特別，就好似食緊普通厚生牛肉片，冇我之前喺日本食鹿肉咁印象深刻。大家應該接受得到，真係可以食下，話晒唔係周圍都有得食。 牛テール焼（圖左）350円 話說呢款燒牛尾，我之前喺睇一個飲食節目介紹韓國某間餐廳有得食，嗰時就話遲D去首爾食。點知嚟到大統領，見到隔離有人叫咗，當時我完全唔記得係牛尾，於是就叫咗一份，點完先問侍應係咩嚟，佢就話我知係燒牛尾。我一食就超級鍾意，牛尾肉燒到勁香，牛尾骨中間仲有骨髓，肉味加上油香喺嘴入面爆發。記得擠少少檸檬汁，味道仲更加正！ 日向地鶏の塩焼き(400円) 日本嘅地雞出名嫩滑結實，某D地方仲有地雞刺身食，對於生食雞肉，我就暫時仲未可以突破心裏關口喇！日向地雞串燒燒製時間同爐火大小掌握得超好，地雞肉質外脆內滑，仲有好有肉汁、好鮮甜，Ichiban！我覺得係呢餐最好味嘅！ もつ焼き盛合せ －450円 呢個豬拼盤係店內招牌食品之一，幾乎每檯都叫一份。拼盤一共有5串唔同嘅豬部位，每次都唔一樣。今次我食嘅有（從左至右）：豬脷、豬小腸（粉腸）、豬肉串、豬大腸、豬肝。所有豬串燒都可以揀醬油燒或者鹽燒。因為其他係冇得揀醬油燒定鹽燒，所以豬拼盤特登揀咗醬油燒，個醬油不得了，真係每樣都咁好味。大統領嘅燒內臟做得好好。 食到6-7成飽，我突然好想食拉麵，於是同好友講話不如去食拉麵，點知好友話佢都正想提議食拉麵。於是兩個人就決定去下場，續攤食拉麵。日本人都好鍾意時完再去下場。 由於唔知附近有咩好味拉麵店，所以我就喺埋單時細細聲問下serve我哋嗰位侍應哥哥，佢都幾為難咁望住我，跟住就話轉頭話我知。其實我明白，如果真係未飽就應該繼續叫嘢食，但無奈我哋嗰刻真係超級想食拉麵。侍應哥哥找完錢俾我都冇講，我覺得無謂要佢難做，喺附近行下實會見到拉麵店。點知佢突然心軟，細細聲話我知，向本店方向行（出門向右行就有好味拉麵店）。我多謝完佢，就出發去拉麵店。 「御徒町駅前通り」右邊小路去試「麺屋武蔵 武骨相傳」嘅沾麵同拉麵，點知所有麵已經賣晒。於是我又行返去「御徒町駅前通り」，就見到「味の時計台」 拉麵店。 「味の時計台」拉麵店喺最具人氣拉麵名店之一，我去札幌時都有食過。 「味の時計台」上野店有兩層，我哋坐喺樓下嗰層，隔離竟然都係香港人，好難得，因為咁多日嚟真係冇咩見到香港人，仲要帶住個小朋友。個男仔好似好鍾意我，不斷同我玩 ，仲要唔捨得走，搞到最後佢爸爸要抱走佢。 呢度食麵係要先俾錢買咗食券，再交俾店員。 好友要咗一碗赤味噌拉麵，個人覺得味道一般。 我超鍾意食擔擔麵，無論中式定係日式。竟然俾我見到有，咁就一定要食喇！果然冇令我失望，真係好味，麻、辣、香、濃全部有齊。好友食完都覺得我個擔擔麵好食太多喇！ 仲有當然唔少得食拉麵良伴－餃子，韭菜餃子係普通貨色，但因為煎得好好，都ok。 下次嚟上野記得體驗日本酒場文化，飲完、食完再去下場。 もつ焼き大統領 支店 地址：東京都台東區上野6-13-2 電話：81-3-3834-2655 營業時間：10am-12nn（Last Order 11:30pm） 交通：JR 線上野站正面出口或地鐵銀座線或日比谷線上野站4號出口步行約5分鐘 「味の時計台」上野店 地址：台東區上野東京6丁目 電話：13-703-5812-2208 營業時間：週一至週六的11:00至3:00，和節日假日11:00至23:00
