除咗將軍澳站最近開咗好多新食市,坑口站嘅東港城係裝修完都多咗好多餐廳,今日就同大家試下呢間韓國餐廳啦! 呢間餐廳殺入香港嘅時候有好高人氣,因為佢地有國民主持劉在鍚做代言,依家係旺角、葵芳同元朗都有分店,今次打入住宅為主嘅將軍澳,實吸引唔少家庭嚐新,都吸咗我呢隻犀犀牛。 同一個鋪位,但份咗兩邊,另一邊係主打爐邊蛋第一家嘅麻浦BBQ。呢個設計幾聰明,等人覺得有兩間餐廳兩種韓式食物選舉,可以吸多啲客,但其實廚房同樓面係同一班人,咁令佢地嘅分工好混亂,係導致我今次用餐經驗變得好差好差嘅其中一個原因。 ✓✓第一印象當然係環境啦。入面設計得幾靚嘅,好年輕化,一定引到唔少韓粉! ✘✘但認真啲睇個場其實好多野都未執得好,係side-work 隔離出口燈位係咁滴水☂☂,坐入面嘅客必經之路!我咁啱坐係佢前面,眼見幾個客同員工都跣到。因為當日係星期六下午,有好多大人細路一家人黎食,如果抱住個小朋友跣親都咪話唔大獲!☹ 提咗員工個度滴水之後,佢地拎咗兩塊布放地下,一嚟吸水,二嚟等啲人知道地下濕可以兜路。但其實都好危險! 我建議佢放個桶裝水,咁啲水又唔會滴出黎,再拎一塊「小心地滑」嘅板提醒客人同員工。可惜佢地太忙,而且員工太新,餐廳配套不足,佢地都做唔到啲咩。 環境睇完,以下係一間餐廳嘅靈魂 ☞ 食物。佢地嘅午餐下午茶價錢都商宜,雖然餐點不多,但都叫每樣有啲,可以比你試唔同款式。 我地就揀咗午餐嘅韓式牛肉飯同芝士炒年糕配拉麵,沙律各一,飲柚子蜜同凍檸茶,心諗最普通嘅菜式就食得出佢地有冇♥Heart♥ 有冇功架,都唔易整得難食,點知真係好伏。 ✘✘首先,速度奇慢!仲落錯哂單!客人只有6枱,有4枱已經食緊,我地點餐先,但係15分鐘後,遲過我地入座嘅已經有主食,我地乜都冇!我地問侍應,先知佢地全張單漏哂!得,再落多一次,過咗10分鐘先同我地講無牛肉飯... ಠ_ಠ 好,叫第二樣。 ✘✘等咗15分鐘,第一樣野終於到 ☞ ☕熱柚子蜜 (其實係1:99暖柚子蜜)。只係柚子醬開水,竟然可以咁難飲! (◣_◢) 明明叫咗熱嘅,但佢只係暖...仲要係偏凍....只可以話係比室溫暖少少 (¬_¬)凸 仲要超‧級‧淡。心諗我叫熱水好過。飲咗第一啖,講咗一個X,就冇再掂過佢。 ✘✘第二樣 ☞ 凍檸茶。因為我地左邊個枱係我地入座個時已經吹單,佢杯凍檸茶係佢食哂個餐都未到,係佢吹咗4次之下,終於到,佢地都算係好脾氣嘅一對中年夫妻。多謝佢地,帶歇我地有得飲。一樣,飲咗第一啖,講咗一個X,都冇再掂過佢。勁甜,好似康師傳冰紅茶,翻版個隻。重點係佢冇檸檬 )0( 係一杯冇檸檬嘅凍檸茶。我地冇同侍應講,因為一嚟水吧同樓面都明顯冧檔,二嚟佢加番塊檸檬杯野都係會咁難飲。 芝士蛋配泡菜炒飯 $78 ☞ 又名芝士 + 蛋 + 泡菜炒飯 + 紫菜 (??)。芝士冇乜味,又唔夠熱溶唔哂,泡菜炒飯冇乜辣味泡菜味,兩樣野完全唔夾,如同陌路人。係得啲紫菜好食...( ´Д`) 芝士炒年糕配拉麵 $78 ☞ 呢個就好辣啦,I Like❣。有芝士、年糕、魚糕、公仔麵、鵪鶉蛋。雖然個味就係普通你買到嘅韓式辣椒醬,但起碼唔伏,我已經心滿意足。芝士都好多,但都係一塊塊,唔可以完全融入同啲年糕公仔麵一齊食,稍有敗筆。 ✘✘服務 ☞ 員工超級新!又好似冇一個炒開場嘅人帶住,個個一舊雲☁☁咁。星期六下午唔多人已經冧哂檔,夜晚點炒場啊?點一個人睇7-8張枱啊?落單、吹單、埋單,每次都要叫多過3個人以上,等多過10分鐘先有啲反應。睇得出侍應都好辛苦,態度尚可,但真係力有不逮,而且餐廳人手安排同系統都好差,服務效率極低。如果你係無業遊民,我極力推薦你嚟呢間餐廳食飯,慢慢消磨你嘅光陰,再食啲問號落肚。 埋咗單,終於可以離開伏地。精明眼嘅你可能會發現『咦?跟餐唔係冇兩個沙律嫁咩?』無錯,我地走咗都未見呢兩碟仔就咁夾落碗仔就有嘅前菜。不過我地冇問啦,姐我累了......唔想等,都唔想老娘嘅口腔再有受到啲咩刺激。 $173.8,得到了一個教訓。 但我以為都會繼續周圍雜食食食,因為我雜食犀犀牛要食過哂先知咩係寶,推介比大家;咩係草,幫大家下地獄。(゚∇^*)v 味道:★✰✰✰✰(1/5) ☞ 食咗飲咗咁多野落肚,得一樣冇驚嚇咋 外表:★★★✰✰(3/5) ☞ 睇落去人模人樣,但犀犀牛教你食物不可以貌相 環境:★★✰✰✰(2/5) ☞ 表面睇好靚,但內裡千瘡百孔,仲有危機添 價錢:★★★✰✰(2/5) ☞ 價格商宜,學生同小資一族都適合 服務:★★✰✰✰(2/5) ☞ 完全做唔到野囉......不過總算有禮,所以我都接受啦唉...... 速度:★✰✰✰✰(1/5) ☞ 超級慢!廚房同樓面七國咁亂 總分:★★✰✰✰(2/5) ☞ 本身都想黎再試炸雞,話哂招牌野,但睇其他客食完嘅樣同餐廳配套後......我希望唔好浪費個位,快啲開第二間餐廳啦! NeNe Chicken 地址:將軍澳重華路8號東港城2樓225號舖 營業時間:仍在試業,時間未定,但見到佢4pm - 6.30pm好似有落場 電話:3468 2990 付款方式:Visa, Master, 現金 優惠:特定時間有9折優惠同午餐買3送1,但還在試業,記得問下啲員工先啊 泊車:東港城泊車優惠 (http://www.eastpointcity.com.hk/parking-2/) 即日消費滿 小時 HK$200 1 小時 HK$400 2 小時 HK$600 3 小時 顧客凡於本商場消費滿以上指定金額(最多累積2張不同商戶的即日機印發票),即可於一樓’顧客服務中心’辨理換領免費泊車優惠。 有關免費泊車優惠詳情,請往顧客服務中心查詢。 Facebook: @EatingJournet2West 雜食犀牛記 https://www.facebook.com/EatingJourney2West/