將軍澳站附近開左好多新鋪,有人氣餐廳進駐,都有啲新開業嘅店鋪黎試一試水溫。 當然啦!淨係一個將軍澳站已經有N咁多個私人屋苑,都未計坑口寶琳調景嶺...... 加上依家咁多「無飯家庭」,餐廳無論係好食唔好食,只要近水樓台,晚市假期都一定不乏人流。 而我 ── 乜都食嘅雜食犀犀牛最愛試新野,睇下經過我一輪雜食之後你仲有冇得留底 !✌ 本牛甚喜茶餐廳,價廉物美又有效率,但好食嘅茶餐廳唔係咁易搵嫁!呢度就有一間扮日式嘅玉子主題茶餐廳啦。 其實位置都算便利,位於將軍澳中心,將軍澳站B出口行大約8分鐘就到,但唔熟路就麻煩啲,因為要係商場中穿梭。店鋪環境開揚,枱與枱之間空間都算足夠,下午茶時間去試,得3-4枱客人。我坐圖左嘅梳化位,旁邊有小朋友係咁郁係咁跳,搞到我全場坐四驅車咁...... 但係菜式十‧分‧少!同我上網睇嘅Menu唔一樣。 小食都係啲好普通嘅雞翼薯條,甜品係依家好流行嘅日式Pancake,飲品類別除咗花茶之外比茶餐廳少。 主食仲衰,得6-8個選擇,來來去去都係咖哩汁、白汁以及蕃茄汁,加少少肉,再自行選配咩「玉子」 溫泉蛋 (見到其實客嘅溫泉蛋同我係台灣7-11買嘅一樣 (* ̄- ̄) ,感覺無驚喜) 旋風玉子 (見個名咁勁咪試下囉,下面再慢慢講) 水煮蛋 Poached egg (我叫咗但係話冇貨...都係蛋黎啫,邊會無貨,唔識整咋呱,除非其他蛋嘅菜式係用粉溝出黎或者溫泉蛋來貨,而佢地又無入到佢地嘅招牌日本直送無菌蛋( ・ิω・ิ)) 以上,就係專食「玉子」嘅玉子造屋裡面可以食到嘅所有玉子菜式。_:(´ཀ`」∠):_ 另外,旁邊仲寫着「試業期間為保障食物質素,上菜時間可能較長」.......Maybe人手唔夠啦~ 但當日人少少上菜速度都快嘅,5分鐘內上飯,10分鐘內上雞翼。 七味炸雞翼 $38 ☞ 呢個價位以為都算抵,仲有6塊嫁!但原來雞翼一開二黎炸,所以其實得3隻左右,味道一般,微微辣,啱啱炸起好香口好脆身。 咖哩豬軟骨飯配旋風玉子 $82 ☞ 「碟頭飯黎啦喎!」一上菜我同朋友異口同聲咁講。而且....呃...嗯......呢個唔似咖哩汁囉,似燒汁。豬軟骨好冧好上色但唔入味。玉子係滑,但係無乜味,可能日本無菌蛋唔洗落鹽呱 :P 真心茶餐廳早餐嘅炒滑蛋咁,分分鐘人地仲好味。 白汁波菜三文魚飯配旋風玉子 $85 ☞ 白汁唔算濃稠,所以唔太會有飽滯感。三文魚煎得幾香口,仲有少少三文魚嘅油甘味。可惜配個無味滑蛋飯,整碟飯仍然偏淡口。 滑蛋中嘅飯都有啲心思嘅,係有加木魚落去一齊煮,但木魚係無味嫁,所以都係淡。不過的確為成件事倍增日式風味。 因為食物完全滿足唔到犀犀牛個4個胃,只好同朋友係呢個唔錯嘅環境中飲水傾計...咁就差不多3個小時啦。 枱上會有一樽暖水(類似Pizza Hut咁但冇檸檬),所以唔怕口乾。 最後要讚佢啲員工都細心嘅,我去廁所個時無留意係租戶廁所,冇拎鎖匙,個員工過咗一陣就拎過黎比我,雖然當時得3枱客,而廁所係餐廳10步距離之內,但都要有心先會咁幫我嘅。 味道:★★★✰✰(3/5) ☞ 蛋係好滑嘅,但係佢主題係玉子,只係做到咁我好唔滿意囉 外表:★★✰✰✰(2/5) ☞ 咪係普通小食同碟頭飯囉 菜色:★★✰✰✰(2/5) ☞ 好少!所謂嘅玉子就係每個飯都加太陽蛋/滑蛋/溫泉蛋...WHAT!? 環境:★★★★✰(4/5) ☞ 開揚,我下午茶時段去都靜嘅,舒服同朋友傾計 價錢:★★★✰✰(3/5) ☞ 貴價日式碟頭飯 服務:★★★★✰(4/5) ☞ 一張枱一枝水,我自己服務得自己唔錯嫁 xd 不過員工都醒目有禮嘅 廁所:★★★★✰(4/5) ☞ 好近,係商場嘅租戶廁所,冇人用梗係好乾淨啦!但記得拎鎖匙 總分:★★✰✰✰(2/5) ☞ 唔會後悔嘅,但試一次就夠啦,食物一般嘅話其他野幾好都係廢 玉子造屋 地址:將軍澳唐德街9號將軍澳中心地下B03C號舖 營業時間:星期一至日 12:00 – 15:00 18:00 – 23:30 付款方式:Visa, Master, UnionPay, 現金 犀犀牛推介 ☞ 食物環境景色一流嘅日式餐廳→→→Ka Ma Do火間土 https://blog.ulifestyle.com.hk/blogger/journey2west/2017/07/火間土 Facebook: @EatingJournet2West 雜食犀牛記 https://www.facebook.com/EatingJourney2West/