【俄羅斯】2019走入摩爾曼斯克睇極光 !~

當問人去邊到睇北極光時,通常人地都會話去芬蘭,挪威和冰島等等地方。其實原來俄羅斯都可以睇到,而且當地的物價不算高,還很便宜。俄羅斯有個城市叫摩爾曼斯克,它位於北極圈裏,與芬蘭比較近。我係買了香港來回莫斯科和莫斯科來回摩爾曼斯克的機票,如果在香港出發到摩爾曼斯克係要在莫斯科轉機的,假設買香港來回摩爾曼斯克機票,這樣價格係會大約貴幾百元,所以如果去俄羅斯睇極光的話,就建議在莫斯科玩幾天,之後再係莫斯科搭飛機到摩爾曼斯克睇極光,最後回到莫斯科搭飛機回香港~


我和女朋友一齊去了8日俄羅斯,以下是大約行程:
旅行日期:12月4-11日 (香港人去俄羅斯不需要簽證)
Day1-3 莫斯科 3日2夜
Day3-5 Lovovero 3日2夜
Day5-7 Teriberka 3日2夜
Day8 莫斯科 1日夜晚機回程

當時我的匯率:1HKD=8P (我在香港兌換了才出發)
機票:$2583,10kg手提和23kg行李(香港來回莫斯科)
機票:$1508,10kg手提和23kg行李(莫斯科來回摩爾曼斯克)
機票+住宿+飲食+玩樂:大約$10000/人

在摩爾曼斯克追光,很多游記都會介紹去Lovozero或Teriberka這兩個鄉村,因爲這兩個地方的光污染比較少,在這兩個地方邊個較爲容易看到極光其實視乎天氣,我看網上資料就話9-4月係有極光,而11-2月睇到極光既比例係比較高。Lovozero係位於山多樹多的地方,而Teriberka就位於比較北的位置,面對巴倫支海,在住宿附近就可以看到個大海洋,我地兩個地方都有去,因爲兩個地方睇極光的景色都不同,難得去到摩爾曼斯克應該兩個地方都要見識下才滿足的。 Let’s go 吧!~

落機取完行李再走出黎就會見到這個地方,你一定會在這裏見到幾個司機在等候的,他們十分主動地走過來問你要不要車的。上方的牌有指示左邊是有得寄存行李,右邊是走出機場搭巴士或的士的地方,而前方就有餐廳,便利店,郵局和賣手機等等的店。

這裏有寫住機場交通,巴士和地鐵的價錢等等的資料

行到中間會見到好多人等巴士的。
機場門口有巴士851開去Rechnoy vokzal,只需55P就能搭到,到Rechnoy vokzal後就能搭地鐵,地鐵每程都係55P,可以搭到去你想落既站(它是計你搭1程車的錢,不似香港搭去唔同既站收唔同既價錢)。如果搭公共交通由機場到紅場區,其實一共只需要110P。

Day 1:(在莫斯科住3日2夜)
由香港出發大約飛11小時到達莫斯科,這航空公司有提供2餐給乘客。飛咁長的時間有什麽好做呢?當然是睡覺啦,不過如果唔想訓的話,飛機上有得看電影和玩游戲。飛機到達莫斯科後,我打算在機場買了上網卡才出發到市中心(我的住宿在紅場區附近),取完行李走到機場大堂時就見到很多的士司機問你要不要車,我地在機場遇到的兩個司機:
第一個:
司機開價10000P,我地當然不了啦,實在太貴,他就話平少少比我地9000p,我地當然還是覺得太貴了啦!最後說No,thank you 了~
第二個:
司機問我要不要車,我話我要買了上網卡先,暫時不要住,佢就話佢有張上網卡,好似話4G無限16日任用,收我1000P,我覺得唔錯幾好咁,最後我買了佢張上網卡(張卡我用了2日就冇數據了,建議上網卡在香港買去算了,幸好女朋友在香港買了張上網卡8日都能上到網)。買完佢張上網卡後就再問我地要不要車,我地當然都會問問價錢先,佢話10000P,我地就話太貴了,之後佢減價到5000P話佢就離收工,接埋我地呢單生意就收工了。我地見到個價錢幾好就搭了這架的士啦(其實莫斯科搭巴士和地鐵係超平,都係55P一程,第一次到俄羅斯,對路唔係好熟,所以就搭的士去住宿啦。)。我地到達住宿已經是晚上了,就擺放好行李,之後就到住宿附近Ulitsa Arbat食晚餐。


香港飛莫斯科第一餐

香港飛莫斯科第二餐

飛機上既娛樂 (Films and Games )




這是在莫斯科的住宿:Guest House on Znamenka 13


我的晚餐150p,裏面好似有豬肉,洋葱和青瓜等等。

Day2:
我地大約11am才出門,俄羅斯大約下午3點就開始天黑了,可能天氣,月份或地理的問題吧,我地今日主要去幾個景點打打卡,食食好西就一日了。路綫:基督救世主主教座堂=>紅場附近玩和食。
教堂附近有地方維修中。

莫斯科河

聖瓦西里主教座堂

《Бургерная #FARШ》漢堡包餐廳,好好食!

這個位比較冇咁多人停留,可以盡情打卡~

Day3:(出發到Lovozero)
我地要係莫斯科飛去摩爾曼斯克了,我地買了0930的航班。早上5am就出門了,到了地鐵站才知道它0530才開門,幸好時間上剛剛好,還有2-3分鐘就開門了。我地由住宿到機場是搭地鐵到Rechnoy vokzal站再轉巴士851到機場,大約用了2小時吧。莫斯科到摩爾曼斯克要飛3小時,我地在訂住宿的同時順便向房東訂了來回接送的車,去程和回程的價錢都是5000P/1車。司機在機場送我地到Lovozero和房東會合,房東帶我地去佢既飯廳食午餐,一日3餐都應該係佢媽媽親手做的,用膳完之後就同我地講有乜活動和活動的價錢,我地就參加了當晚去追光的活動,價錢是4500P/人。之後房東送我地去住宿的地方,到晚上8點才接我地去追光,距離8點還有4小時,所以我地在住宿附近行下超市,買少少零食回住宿。到了8點房東來接我地,之後我地要坐雪車去追光,因爲當晚的天氣不太好,十分之多雲,到了12點都還是太多雲,估計都係看不到極光了,最後沒有收穫咁回到住宿休息了。

地鐵服務時間0530-0100

 地鐵收費
買完拍卡入地鐵,出閘時呢張卡就冇用嫁啦,算係廢紙一張了。


摩爾曼斯克機場唔大

摩爾曼斯克機場到Lovozero要2小時車程

Lunch~


Lovozero住宿:Lovozerotur


一邊BBQ一邊等極光
當晚見到有隻狐狸在不停望我地

Day4:
我地參加了駕駛雪車去遊覽Lake Seydozero,早上9點半食完早餐之後,我地就要穿上更厚既衫先出發,房東會教我地如何駕駛雪車,十分簡單,10秒就學識啦~咁樣就玩左1日。到晚上時,房東會視乎當晚的天氣再決定帶唔帶我地去睇極光,佢話如果晚上9點天氣轉好的話就會過黎接我地去附近地方睇極光,但最後佢都係冇黎到。都係因爲太多雲,又係睇唔到極光既一日。
食飽早餐等出發!~





活動完之後就回到飯廳食Lunch。

在Lovozero的3日2夜,2人共用35550P

Day5:(出發到Teriberka)
1pm司機送我地去摩爾曼斯克市中心既McDonald’s(好似係全球最北的McDonald’s),本身想係市中心食少少野先再出發,但到市中心已經3pm了,個天都黑了,我地就直接係附近揾的士到Teriberka,個司機開價要7000P,我問佢可以平少少嗎?,佢就話Teriberka好遠,條路又黑又崎嶇,咁都冇辦法啦,我地就上了佢架車。5pm到住宿後就到附近超市買了食材翻去整,食飽後調好晚上12點的鬧鐘再冲涼休息。到我地醒來的時候,聽到附近很多游客話今晚有極光,我地即刻精神了,換上裝備就出門!~人生的第一次看極光呀!

很多司機都開價7000p(網上好多游客都講呢個價錢)

住在2樓,房間不大,價錢平~


女朋友煮的,冇佢我應該食杯麵啦哈哈


原來極光用肉眼好難睇到,用相機慢快門才拍到有顔色的極光。(iPhone11能拍到極光)

Day6:
今日就比較多雲又不時大風起來,我地只在附近行下,影下相。之後遇到只貓超可愛,佢唔怕人,又不停咁走埋黎我地身邊係我地脚下圍住轉,女朋友抱起佢時,我便用快門拍下來了,到我抱佢時佢就唔俾我抱啦,可能我抱佢唔係太舒服哈哈。。。大約3pm就天黑了,所以呢日過得好快。晚上不用說了,都係一樣多雲睇唔到極光。
Teriberka住宿:Guest House Kovcheg 51

海邊有餐廳和有1個好大既鞦韆


北極既貓!~太可愛啦,不停走埋黎圍住我地轉。

3pm個天黑了,還下雪中。。。。

Day7:
早上個天好靚,夜晚不知能否看到極光,不過我地下午就要回到摩爾曼斯克機場了,只能盡情感受下Teriberka既白天吧,在俄羅斯差不多每天都是得5小時白天,之後就入夜了。Checkout前一晚房東問我地要不要車去市區,剛好我地未訂到車就問佢幾多錢,佢答5000P,咁我地當然話要啦~哈哈哈!我地來的時候是7000P,現在回程只需5000P~
(送我地到Teriberka的司機有留低卡片比我地,佢話去程和回程都係收7000P,幸好Day6的時候沒有打通佢電話。)




我以爲是狼。。。



摩爾曼斯克機場就係怎麽大,有手信店,有賣魚子醬店,有行李寄存。

Day8:(回到莫斯科Shopping)
回到莫斯科就將行李寄存在機場(價錢500P/1件行李),之後就出發到Mega Khimki大型購物中心,一樣都係在機場搭巴士851就到,這一日當然是超級休閑的買野和食野。回機場我地是搭的士,價錢好像600P。
9am到IKEA

IKEA餐廳



Auchan超市

晚上7點半在莫斯科飛香港,第二天的10am才到達。
~~~~~~~~~~~~~~~完了~~~~~~~~~~~~~~~~~

再補充補充【Lovozero】和 【Teriberka】這2個地方吧:
【Lovozero】有2種住法:
1.住在村裏,附近有超市,在住宿附近看不到極光,要參加追光團,機場到村裏只需1程車就到。(我地係呢個)
2.住基地,位於lovozero村再遠少少既地方,光污染極少,在附近應該能看到極光,但住宿附近沒有超市,飲食由房東提供,而機場到基地係要2程車,普通車到村後要轉雪車再入去基地。
【Teriberka】有2邊地方:(我分A和B來講解)
1.A是海灘果邊既地方,有超市,有餐廳,住宿附近睇到極光,有tour可以到B睇景點。
(我地係呢個)

2.B是唔係海灘果邊既地方,較多主要景點,有超市,唔知有冇餐廳,住宿附近睇到極光。

我地係呢個行程得4晚可以追光,4晚得1晚先睇到極光我都覺得自己都算好好彩嫁啦!
如果成個行程都睇唔到極光,咁真係要等下次啦。我當睇極光係一種緣分,時機到就會睇到你所期待既野,當然如果你係摩爾曼斯克住多幾晚都會大機會睇到極光既,不同日子不同月份都會影響你追光,真係好睇天氣情況,祝你地都可以睇到極光!~睇極光好多地方都可以睇到,你去旅行都唔會只係去俄羅斯吧,今次睇唔到下次可能係其他國家都會遇到極光呢~但要係北極圈或南極圈既地方先有得睇極光哦!不過如果今次睇唔到極光,下次再去俄羅斯睇極光都係唔錯既,因爲價錢方面真係好值得,去8日$10000就可以搞掂全部。我都好想再去睇多次極光,不過我唔會爲了睇極光而咁快又去多次俄羅斯,因爲我仲有好多個國家都想去~我個旅行清單仲有好多個地方未去呢,話唔定將來我係冰島或其他地方都會見到極光呢,我都好期待我下一個地方既旅行呀!

多謝跟小矮人去旅行啊,下次再分享其他旅行啦~

This entry was posted in 住宿, 俄羅斯, 其他, 觀光, 酒店 / 度假村 and tagged , , , , , , . Bookmark the permalink.