起中環上班多年, 起不同的食肆留下不少手毛腳毛 但大家都知道, 中環的上班一族, 做咩都好似好急趕, 行慢d都會比人踩甩鞋, 對於午飯時間得一小時, 排隊等位都無左幾個字 除咗趕之外, 仲有就係貴! 經常要諗去邊度食到平正快都幾苦惱 最近上Openrice搵到間新嘢, 決定一試! 位於蘭桂芳街口, 一上就會見到的Grill ขุนทอง 見到有泰文就知係食泰國嘢啦 起Grill ขุนทอง係無座位的, 是立食泰國串燒店 對於趕住番公司, 黎蒲之前的必食推介 先望望Menu, 豬牛海鮮蔬菜都有, 每串$15-$70 仲有啤酒供應, 喂....售價比pub平平平好多囉, 都係廿幾蚊 去老蘭好多人都係拎住枝酒企街咁飲啫 Lunch Set仲有2款飯供應, $60包飲品, 係咪唔貴先? 小店有個開揚的位置比客人睇到各款燒物 有玻璃隔住, 比起泰國的街邊串燒來得衛生之餘, 又唔怕啲油彈到客人身上 我哋2個人點咗8串+1枝斐濟水 (最近睇咗方東昇節目, 好想試下) 埋單每人都係百多元, 其實因為係隻大花蝦提高咗成張單既價錢 唔係整體都很便宜喔 點完後侍應會問要唔要辣, 食泰國嘢加辣 (醬汁)先係靈魂嘅所在!! 由於是即燒的關係, 等待數分數是必要的 斐濟水同普通的礦泉水無分別呢, 叫試過同埋消辣嘛 店舖的右手邊有個角落可以供客人立食, 我哋見有時間就食埋先走人 串燒陸續的新鮮送上, 肉還肉, 蔬菜還蔬菜的分開紙袋上 紙袋是不會漏油的, 就算邊行邊食都唔會搞到周身油 牛仔骨$40, 有3件, 計落都唔貴 (推介!!) 味道甜甜的, 燒得剛好, 加埋燒牛肉醬都幾辣喎 (好彩叫咗枝水) 雞翼($20)唔係生長起非洲果d無肉雞, 2隻都肥嘟嘟架! 雞肉都鮮嫩, 食完辣之後, 好似食咩都覺得辣, 朋友話想噴火 後尾聽到其他人點, 原來係可以少辣架!!! 蠢咗 豬頸肉$20 同埋泰國魚餅 $25 每串都有3件, 豬頸肉打開都唔細片, 加埋芫茜酸辣醬勁惹味 魚餅就唔太特別, 同平時食泰菜嘅差不多, 都咬到入面有辣椒碎 邊食要邊飲水...如果係夜晚黎食, 我一定會點啤酒 雞肉同豬肉串嘅肉質都鮮嫩, 唔會燒到鞋恰恰無哂肉汁 佢地加嘅醬汁都好大方, 絕不輕手 邊食邊叫辣, 但又真係好好味! 主角的大花蝦($70)出場啦, 呢個等得耐啲 睇下值唔值$70先 Wow, Size已經有我隻手掌咁長, 個身都幾厚肉下 呢個配咗燒蝦酸辣醬, 因為食到條脷Keep住辣, 所以邊殼都無"損"過, 其實我知都係精華嘅所在 燒嘅功夫唔差, 蝦肉無痴殼又無燶 大蝦啖啖肉又爽口, $70係值得嘅!! 雖然望落份量好似唔多, 但我都夠飽 (2個人share) 一早留定菠蘿$20作最後的解辣飯後果 一串有4大粒, 上面應該係加咗咖哩醬, 雖然菠蘿是酸甜的生果, 但加埋又唔會覺得難食 菠蘿係新鮮不是罐頭的, 一粒都塞爆我口腔, 成粒食唔會嘥, 因為佢係爆多汁, 又甜又juicy!! 都真係有啲解辣作用! 地址: 中環蘭桂坊德己立街17-19號地下 電話: 2530 1022 希望你們喜歡我的分享 如有問題, 可留言或電郵給我 issiyyi@gmail.com Add my Instagram: ★http://issiyyi.theztyle.com ★http://beauty.qooza.hk/u/IssiYyi