扇火鍋 地址:觀塘觀塘道414號One Pacific Centre2樓205號舖 電話:2780 7028 呢間扇火鍋响One Pacific Centre 新開, 之前去食和民,見到旁邊呢間扇火鍋次次都好多人等位,價錢又唔貴,一直都想試下。今日約好咗同一班朋友慶生, 想食shabu shabu 放題, 就黎咗扇火鍋。 怕等位麻煩,當日下午就打電話book定枱,7點後已經full booking, 唯有book 6:30入座,食1個半鐘。 扇火鍋提供自選放題,湯底選擇都幾多,有6款,我地叫咗普通Dge 意大利蕃茄鍋同豚骨鍋。我地4個人, 一人一個小火鍋。叫咗最平嘅套餐 「穀飼牛火鍋套餐」$148/位。本來以為多數shabu shabu 放題,都只係配菜放題,但呢度可以任加牛肉、豚肉片! 呢度鍋夠細、夠薄好快就水滚。牛肉一開始每人一碟,食完可以叫佢加,我地另外叫埋豚肉片。因為牛肉、豚肉切得好薄,基本上一放落湯就淥熟,所謂穀飼牛入口係幾香,但少D雪花。 推薦食蕃茄湯底,本身湯底好足料,好香蕃茄味,D肉唔落醬汁都好好食。豚骨鍋相對比較肥膩D,好濃豬骨味。 配菜方面,選擇好多。有D似牛陣,有腸仔、脆皮腸、芝心丸、獅子狗等等、連龍蝦丸都有! 另外蔬菜類有油麥菜,唔洗次次都食生菜咁悶。仲有飯可以添,有白飯、炒飯揀。旁邊有日本咖喱,可以撈白飯。 飲品方面多選擇,唔會迫人一定要飲汽水機嘅汽水。有三個大雪櫃,普通D有可樂、雪碧,芬達,jolly shandy,仲有韓國梳打,成日睇韓劇見到D綠色罐「樂天牛奶忌廉梳打」都有!仲有士多啤梨奶梳打、蘋果奶梳打、唔想飲有氣嘅,可以揀100%芒果汁。 甜品只得雪糕機出嘅雪糕同frozen yogurt, 有topping加。不過食咗個半鐘shabu shabu已經好飽,試唔到。 總結:7分/10 抵食! 餐廳闊落,坐得舒服,服務OK。肉類、湯底都中規中矩,配菜同飲品選擇多係預計之外。整體同牛陣差唔多,比較失望嘅係雪糕係雪糕機出嘅,冇咁衛生。