正宗韓國燒肉 喜來稀肉

一直好想試「喜來稀肉」,終於今日放假得閒黎到!今日星期日,「喜來稀肉」開5點,我地6點正黎到都要等10個。太爆場喇!成條韓國街都唔太多人,其他餐廳仲好冷清,「喜來稀肉」已經要等位,仲排到出門口!等10個 起碼等一個鐘,周圍逛完再番黎等位時間啱啱好。在下層等多一陣,邊等位邊聞到陣陣烤肉味~~

上樓梯到上層,這裡的環境十足十去咗韓國!不過抽風唔夠,一上到去煙霧灕漫….
我地三人被安排去坐石牆的四人卡座,坐位好闊落。雖然多客,但店員用洗潔精抹得張枱好乾淨,唔會肥淋淋。座位特別設計,掀開座位,可以放背包等個人物件入去,令客人舒舒服服享受烤肉,又避免個袋吸味!
2014-06-14 07.35.38 1
點菜後,店員在爐邊倒入蛋漿、泡菜絲、大蒜,可以响爐中間一邊烤肉,一邊慢慢烤蛋。保留本土韓國烤肉店的傳統,「喜來稀肉」配菜任加,肉才是逐碟計錢。

2014-06-14 07.32.30 1無限供應的包括:包烤肉的生菜、泡菜、芽菜、蛋漿、韓式醬料、海帶湯及冰水。
我地叫咗五花腩、招牌護心肉、海鮮大醬湯、2豌白飯。

必食招牌護心肉!
招牌護心肉$150

2014-06-14 08.13.23 1
店內D餐牌、poster 等等分別以中文、韓文介紹護心肉。「護心肉是我們的招牌食物,有別於一般肉頖,是較罕有的韓國料理。一般成年豬隻只有400-500克的護心肉,位於豬橫隔膜和肝之間的肌肉肉筋,是非常稀少的部位。另外,護心肉不含油份,口感柔和且有嚼勁而被視為珍貴肉質。配合Seorae秘製醬料,非常惹味。」
2014-06-14 08.32.09 1
簡單將護心肉輕輕烤一陣,一小片護心肉夾生菜、洋蔥、泡菜、芽菜一起捲起來點少少韓式醬料吃,非常惹味。一口一片護心肉剛剛好。
2014-06-14 08.04.23 1
五花腩一碟有三大塊,輕輕烤一陣再剪開一小片夾生菜食。
海鮮大醬湯一大碗夠3個人分享,湯料好足料,有蜆肉、原隻蟹捧、蔬菜等等,用黎撈飯、烤蛋、泡菜一流!

總評:7/10
三個人$390, 平均$130一位。好抵食,幾乎每個細節都保留韓式烤肉風味,肉、配料、主菜等等食物質數好好,唯一不足之處係抽風唔夠,開舖2小時已經煙霧灕漫。

喜來稀肉
地址: 尖沙咀金巴利道79-81號金栢閣1樓連地下
電話: 2723 6692

This entry was posted in 自助餐/放題, 韓國菜. Bookmark the permalink.