去過N次泰國嘅你,無論係曼谷、芭堤雅、清邁定華欣,對坐車方面…小巴、的士、tuktuk定包車,可能已經好熟識,係時候試下喺泰國揸車周圍玩下喇! 拎「國際駕駛許可證」 基本上如果你持有香港有效駕駛執照,去運輸處申請「國際駕駛許可證」就可以喺外地指定地區或國家揸車,申請手續勁簡單,申請費用80蚊,可郵寄或於牌照事務處(正常即時有得拎)申請,唔詳細講,上運輸處個網自己睇: 申請詳情:http://www.td.gov.hk/tc/public_services/licences_and_permits/vehicle_and_driving_licences/how_to_apply_for_a_driving_licence/general_information_on_driving_licence/index.html 申請表格:http://www.td.gov.hk/filemanager/common/td51(rev7.2015)-fillable_leaflet_chinese.pdf 網上預約:https://abs1.td.gov.hk/tdab2/tdabs_external/AdminServlet?cmd=cmdWelcomeAction&lang=tchinese# 先講重點,係人都知「塞車」根本係曼谷嘅象徵,所以呢篇野只會建議大家喺曼谷以外地方揸車。 租車 最重要睇你去邊度玩(城市及地點),大致有2個選擇: 選擇1 : A地點租車, A地點還車 曾經選擇過曼谷機場租車,行高速直剷去芭堤雅,回程喺曼谷市中心還車,亦試過華欣市中心租及還車 選擇2 : A地點租車, B地點還車 呢個選擇一般會比選擇1貴啲,但就可以唔駛走回頭路 Avis: http://www.avis.com Hertz: http://www.hertzthailand.com/ Budget: http://www.budget.com/ Bizcar Rental: http://www.bizcarrental.com/ Rentals car (租車公司agency): http://www.rentalcars.com/zh/ 主要有以上3間租車公司,頭2間係國際最知名租車公司,不過一樣有唔少人撞過板,例如去到未有車拎、冇GPRS等等 所以建議大家出發前一個月上網BOOK定車,仲可以先考慮以下因素: 1. 租車地點,選擇完城市,記得對比唔同車公司嘅租車地點(部分車公司同一城市都有幾個租車地點),例如係咪喺正機場、市中心、近酒店等等 2. 車款,普通5,7人車、HONDA JAZZ, CRV, TOYOTA自動波定棍波、行李位 3. 價錢,如果選擇1租車方法,平均$250-500蚊每日 Bizcar Rental2015年12月價目表 4. GPRS,幾間公司都須要額外加錢,大約每日$25蚊,建議租,下面再講點解,試過幾次明明租埋GPRS,但去到先話冇,記得堅持爭取(次次佢都變到個出黎) 5.保險,有部分公司租車已包第三者保險及基本汽車意外保險,有啲額外加錢,如架車損壞、被偷車、財物被偷等…雖然泰國幾安全,不過唔係一萬,真係要買個安心 拎車要準備 1.國際駕駛許可證 2.護照 3.信用卡俾按金(約THB20,000-30,000) 揸車 1.放心,同香港一樣,右軑揸車 2.好多人都擔心問路時語言不通,但根據多次經驗,高速公路及幾個旅遊城市路牌有清晰英文指示 3.公路收費,由曼谷出發公路,好多時都要收費,喺某啲位會俾張卡你,離開公路交卡交錢,唔記得幾多錢,總之好平。 4.GPS全部都係英文版本,部分更加有繁體中文,租車公司提供嘅基本上已經SET咗主要景點,一Click就已動帶你去到目的地,有埋語音導航,都算幾準下。不過穩陣起見,建議大家買定電話卡,用GOOGLE導航,可以話埋俾你知咩地方塞車。唯一喺泰國部分道路喺GPS顯示行得,但你轉彎o個陣就會發覺,條街應該只係夠tuktuk行。 5. 由曼谷出發,公路大部份路段都好闊, 3-4線行車. 大部分路段限速120km 6. 如果行錯路或過左龍,公路有好多U-Turn 位,拍最右線掉頭就OK 7.同其他地方一樣,公路上有唔少中途站休息,記得早啲拍左線 7. 有時感覺當地人比香港更禮讓,極少情況聽到有響按聲,唯獨小心電單車! 8.主要行車距離: 曼谷->芭堤雅約2小時 曼谷->清邁約8小時 曼谷->華欣約3小時 泊車 大部分分酒店都有提供免費泊車,另外,旅遊區大部分商場都係FREE PARKING或消費後3小時免費(就算要俾,都係雞碎咁少) 除左禁區外,好多地方泊街都OK,但要注意行人路旁冇紅白間條即係唔可以停車,黃白間條就唔可以泊車、最多可以停 2 分鐘! 離開車輛時,記得將財物跟身,收埋 GPS 其他要留意: 入油,同其他地方一樣,還車要入滿油,記得叫職員寫定俾你入邊隻油 額外駕駛人,如有多一位司機,記得登記,通常每日免費或$25蚊 嬰兒座椅,通常每日$25蚊 講咗咁耐,,可能你會話“咁鬼煩,包車咪算lo”,呢個諗法未必係錯,但如果你有車牌又鍾意揸車,去一個自己唔熟嘅地方揸下車,其實真係好爽嫁!