Day 2 – 登錄後既第一天 2016.03.28 Day 2 Seoul 當我打完第一篇文章後,有朋友們問我究竟呢個係遊記 (分享自己遊歷比大眾睇) 定日記 (純粹自娛,紀錄自己感受)呢 ? um,,,,,,我答唔到出來,其實應該兩樣都有。(係咁架啦~好出奇呀?) 所以呢個 blog (可能)有時會有好多圖 (地點、食物及節慶介紹) ,又有時會純文字抒發個人感受。 以下呢段就容許個人抒發下吧! 上篇提過出發時個人其實無咩感覺,好似去公幹咁 (利申: 未試過公幹) 不過第二日個人感受非常差。 其實前一晚出發已經有少少病,凌晨12點行出首爾站排隊等的士真係凍到入心 (無記錯得5ºC)第二朝訓左十幾個鐘起身個人好頭暈同流鼻水,可能係咁既情況下特別易亂諗野。 出發前朋友們都問其實係個邊可以打咩工,而經我專業調查後 (其實只係facebook 揾工專頁碌左輪……….)我發覺基本上不外乎都係民宿助理、化妝店店員etc…. 首爾呢度法定最低工資為時薪 6,030 won 。(港紙約39元/ 台幣約160元) 多數上網揾到既工係韓語程度要求唔高下都係 6,030 won。 (鬼叫你唔學好d 先來!)物價方面,食野來講大致同香港無異但交通費頗貴。(如果你熟悉巴士路線就好d,地鐵就要撘得遠先抵) 係咁既情況下,以我微薄的工資,而且仲要交房租,其實內心係相當不安……… 而不安既情緒就係感冒病發時湧現出來…. (有人可能問﹕乜你出發前唔係已經知咩? 到左埗仲係度驚呢d ?大佬啊!係人第一次玩過山車前都知係會驚同好刺激啦!咁你係咪一坐上去就個人可以好安定先~~) 我只會話知道一樣野係一回事,身處其中感受又係另一件事。(我任何時候都話”知道”同”明白”係兩樣野來。) 呢個我深信係每個 WH 既人都會有既感受 (跳出舒適圈後對未來不確定所產生的不安感)。希望有同感既朋友可以留言分享~ 雖然不安還不安,但地球唔會因為你而停止自轉,日子還是要過。 呢間屋雖然格局唔錯,但好多個人物品都唔包。(連棉被都無,前一晚好彩同屋roommate 借左張比我度過5ºC 既晚上)。所以o個日決定全日買哂日用品。(而且可以唔比自己亂諗野) 我住係地鐵新堂站 (신당) 附近,係一個老區,格局就好似深水埗。由於只係係屋企附近買野,所以無乜好值得影。 其實個環境唔錯,地方好廣闊。 點擊圖片放大 客廳窗外的日與夜 補返前一晚宿舍的門口照 附近一個小型熟食市場,兩旁都係熟食檔,其中有售賣冷藏狗肉。(篇幅所限,稍後詳述) 係美式快餐廳lotteria食既漢堡包餐,港紙約38元。 (Lotteria 格局超似老麥(無相,細心既朋友可留意圖中地下階磚),而且係首爾 lotteria 分店數目遠多於老麥) 當然,今日都有開心既事。 今晚小弟會同5年前 exchange時所認識既 best friend食晚飯 (shabu shabu)。 出發前好興奮,當然上枱個陣見到圖中畫面難免有點失望……(算啦,做人唔好咁計較,話哂佢請ma~) 不過食野其實都係其次,最主要都係同舊朋友見面。心入面有種莫名其妙既興奮感覺。(相信你要同一個好耐無見既朋友重逢先會明我感受)。而且同朋友分享係 wh 係最重要既一環,尤其係一開始你朋友數目唔多個陣。 朋友總會係你感到無力時,給予鼓勵同關懷。 而且再錯都有人聆聽,微風吹、任得你、更率性~(唔小心打多兩句) 今日篇幅有點長,下回再續……….