眼睛係「靈魂之窗」,一個人靚唔靚,好大程度取決於對眼,包括睫毛、眉毛。小妹皮膚唔好,好少化妝,但係一定堅持畫眉先出街,因為畫咗已經大大紓緩殘樣!而用眼線筆畫眉係小妹嘅無意開心大發現,畫咗幾個月,次次話畀專櫃哥哥姐姐知都令佢哋好驚訝╮(╯▽╰)╭。 小妹嘅眉毛生得濃密,素顏未至於係「無眉娘」,但都有以下問題:高低眉、長短眉、粗幼眉、眉尾雜亂。 本身小妹用開普通開架品牌眉筆,只要有一邊係刷頭就得。 至於畫眼線就用眼線液,因為想畫得幼啲、個尾尖啲,自己用眼線液比用眼線筆容易handle——同樣無指定牌子。半年前身痕想學個friend咁畫,所以求其買咗支media自轉式眼線筆(Eyeliner Pencil),係當時見到最平嗰支,只需HK$35。 有3個顏色,印象中係黑色、深啡和淺啡,呢支BR自然茶色應該係深啡。通常眼眉顏色要同髮色配合——小妹素來喜愛自然黑髮,不過由於唔係化妝高手,用黑色好易畫重手,所以揀咗深啡。 小妹記得,一買返嚟個頭已經係咁粗⋯⋯ 畫細力啲就淺色啲。 如小妹所料,佢比眼線液難上色,但無諗過畫上眼皮係咁難——可能怪小妹手殘吧,不過真係刮到眼皮好痛(>_<)! 反覆幾筆先畫到咁嘅效果⋯⋯而且無法完全貼近睫毛,點畫都係有窿窿,不但唔似眼線,反而似卸唔乾淨嘅眼影。 眼皮係臉上最薄嘅皮膚,眼妝產品一定要揀易上色、易推、易blend嘅。結果佢梗係被打入冷宮啦。 有一次,小妹條眉有個細空隙要補,但係眉筆太粗,畫極都出界⋯⋯靈機一觸!就用呢支眼線筆嚟補,效果又唔錯啵,反正佢幼啲,顏色又一樣。自此,就用佢嚟做眉線筆。 後來有日發覺支眉筆唔見咗,唯有試下用眼線筆頂住檔⋯⋯一用就用咗半年,小妹都懶得買新眉筆了( ´ ▽ ` )ノ。 小妹嘅眉毛左高右低,畫眉嘅第一步要令兩邊平衡返——喺左眉(影出嚟嘅右邊)下面加粗。 右邊眉毛比較雜亂,睇唔到眉峰、眉尾,所要幫我拉返長,令兩邊嘅眉型對稱。 再補一補上眉線,同埋眉毛較淺色嘅位置。 左邊眉頭嘅眉毛較長較密,比右邊眉頭深色,既然無法減色,只好加深另一邊。 而家只係畫咗基本眉型,但眉毛顏色又黑又啡好唔均勻,而且太實。 無咗眉刷,小妹就喺屋企搵到另一個好幫手——ETUDE HOUSE Play 101 Pencil Multi Brush 4 Way (HK$84),係一支四合一多功能化妝掃,分四個頭,好適合化日常眼妝。 喺呢度,小妹會用2號掃捽返鬆眉頭補咗嘅顏色。 然後用4號掃blend返開成條眉嘅筆痕,令顏色睇落柔和啲、勻循啲。 平時小妹就係咁出門啦~ 人人習慣唔同,小妹唔係專業化妝師,呢個方法未必個個適合。幼眉或疏眉嘅朋友如果驚唔夠自然,可以化濃妝時先咁畫,或者用淺一個色試下。為咗唔浪費失寵嘅化妝品,大家不妨做下實驗!