Lancôme主打抗皺提膚嘅RÉNERGIE MULTI-LIFT立體塑顏緊緻系列一向畀小妹嘅印象係潤、好潤、好鬼潤,總之就係唔啱用。 今次,Lancôme推出全新嘅RÉNERGIE MULTI-CICA系列,以無香料配方研創,針對乾燥、泛紅等敏感肌膚問題,同時幫助修復肌膚、延緩衰老。 喺字典搵唔到「cica」呢個字,但大部份除疤抗痘產品嘅包裝上都會出現呢個字。 好多抗衰老產品名稱只會用「anti-wrinkle」、「contour」、「lifting」等字眼,新系列以「cica」命名,令一臉暗瘡傷痕嘅小妹迫不及待想試用! 幾款新產品全部採用擠壓式包裝,比較衛生,有助控制份量。 立體塑顏緊緻修護啫喱 Rénergie Multi-Cica Gel Apaisant (HK$700/3ml*7)係1盒7支小瓶裝啫喱面膜,可以連續7日敷嚟急救,或者定期使用。 密封包裝令甘油、維他命原B5等保濕鎮靜嘅活性成份keep得更新鮮。搣開蓋之後要即刻用哂,千祈唔好諗慳住用可以敷多次啊。 啫喱呈淡黃色,有陣木瓜雪耳糖水嘅香味(⁎⁍̴̛ᴗ⁍̴̛⁎)。質感輕盈得嚟又唔容易流動、移位。 啱啱敷完個發熱嘅深層清潔面膜,而家塊面又紅又乾,最好試下呢款新啫喱面膜。 一搽上面,啫喱立刻為皮膚降溫,乾燥引致嘅痕癢好快消退。就算啫喱接觸到暗瘡傷口,都唔會感到刺痛。曬完一日、進行光學美容療程後都可以用佢嚟舒緩保濕。 敷咗10分鐘,塊面終於變返同頸一樣色。 而面頰嘅紅印係暗瘡發炎引致,要用返相關產品處理——特別想提一點,大家要對產品有基本了解,唔好對佢抱有錯誤期望——所以小妹不會認為啫喱唔可以減退暗瘡紅印就判斷佢無用。 已經用咗5支啦! 第二件新產品係立體塑顏緊緻修護乳霜 Rénergie Multi-Cica Anti-aging Repair Crème (HK$820/50ml),係RÉNERGIE系列中最得小妹歡心嘅! 首先因為佢含有積雪草萃取物——一種有效加速傷口癒合、消炎、保濕、防敏、抗皺嘅美容成份。連老虎打架受傷後,都會喺積雪草上打滾嚟療傷㗎(⊙o⊙)。 另一賣點係佢加入咗由Lancôme同國際太空生物科技專家Alain Colige教授共同研發出嘅嶄新[Up-Cohésion](TM)科技。太空人由於執勤期間長期處於微重力環境,皮膚會衰老得特別快。Colige教授通過喺實驗室內模擬太空嘅微重力條件,發現[Up-Cohésion](TM)高科技複合物有助將覆蓋穩固肌膚結構表面積提升70%咁多,從而增強細胞與肌膚基質嘅凝聚力。 小妹暗瘡多、傷口多、疤痕多,唔喺太空都衰老得極快(╥﹏╥)。 抗皺面霜通常比一般保濕面霜濃稠,但喺手背皮膚上又吸收得幾快。 每次搽完佢,用對滑潺潺嘅手去扭蓋,往往會跣手,整到個蓋好污糟。後來直接將乳霜擠落塊面,更方便╮(╯▽╰)╭。 乾性皮膚可以搽厚啲。 乳霜唔係好滑好易推嗰種,所以小妹唔會打圈搽,反而會用掌心輕輕按壓,可令乳霜喺面上分佈得更均勻、輕薄。 搽上面嘅感覺比想像中好耶!啱啱搽完會覺得好笠到好似無洗過面咁!但唔好絕望!只要唔多過2分鐘,再摸一摸塊面,已經完全吸收,皮膚變得非常清爽!呢點太令人驚喜! 最正係日頭用都一樣唔會泛油光!小妹已經用咗2星期,早晚都用緊♪(´ε` )。 最後係原有系列嘅新產品立體塑顏緊緻面膜 Rénergie Multi-Lift Masque ($700/75ml),亦係小妹試過嘅睡眠面膜中比較接受到嘅一款——只係試,無用開,實在討厭塊面黐笠笠。 同市面上大部份睡眠面膜相比,佢更傾向似好潤嘅面霜。雖然比立體塑顏緊緻修護乳霜再濃稠啲,推開後佢都係會畀皮膚吸收,唔會留一層黏膜喺皮膚表面。 小妹喺10pm完成所有護膚程序,包括搽面霜,臨瞓前先再加上立體塑顏緊緻面膜。唔敢搽太多,先小試牛刀。 視覺上分別唔大,唔會油光滿面。面部出油多,當然無搽喺手背咁清爽,但都只會黏住幾條頭髮,唔會黏枕頭。 過咗一晚就無咁黏,用清水洗面時都唔覺好多面膜停留喺皮膚表層。不過始終唔慣面膜敷過夜,瞓醒發現谷咗粒痘。 隔幾日,再試下厚敷15分鐘。 厚敷能更清楚見到面膜畀皮膚迅速吸收。 將面膜沖洗乾淨後,皮膚依然存留被面膜包圍住嘅滋潤感,即時滑咗,眼下嘅毛孔細緻咗,膚色提亮咗。厚敷嘅效果相當明顯耶! 立體塑顏緊緻修護乳霜同立體塑顏緊緻面膜係少數適合小妹用嘅滋潤型抗皺產品,可能同氣候轉變、皮膚開始乾燥有關。 趁住出少咗暗瘡嘅秋冬好好抗皺就啱啦~ 以上產品已於2018年10月喺香港率先發售,內地仲未有得買㗎~ Lancôme 官方網頁: https://www.lancome.com.hk/zh_HK/home Lancôme Facebook專頁: https://m.facebook.com/lancomehk/ *** 產品和資料由品牌提供 *** cafchiu@gmail.com https://www.instagram.com/happychiu/