喺BIG C買齊手信後,就要準備去今次旅程既尾站 — 峴港機場。 由BIG C搭的士黎到機場,咪錶顯示收費為VND80,000 (已包埋進入機場範圍收費,大約係HK$27,大家可以將個價錢作為一個參考)。 入到黎機場入境大堂既第一眼,發現點解好似有D怪怪地咁。望多一陣,終於知答案。 原來係成個機場眼見得十幾個人咋﹗行多一陣,更加發現e度原來真係靜到喊。我真係未試過日光日白搞Check In係可以唔駛排隊,即到即刻有得Check In (信我,我並唔係一個會提早2個鐘去搞Check In既人黎)。 可能因為個機場仲算係新開幕,再加上國際線航班少,就搞到成個機場靜嚶嚶咁。如果即將或諗住會黎峴港既朋友,就要注意下,可以預遲少少先黎Check In都大把時間。 比多張遠境圖大家望下先,航空公司櫃位一眼就望晒。 再加上e個機場又無咩餐廳 (下圖係入境大堂入面唯一一間可以算係餐廳既舖頭)。 入境大堂既賣手信舖相信就係得e間。(下圖) 所以唔好諗住入黎機場e度做咩最後衝刺喇 (真係可以死左條心佢)。 真心,如果臨離開峴港前有咩想買,就盡可能預返喺出面市區搞掂佢啦,e個機場真係好難會令到各位打開到個銀包洗錢嫁。 入到去禁區範圍,情況好少少,多返3-4間舖頭仔。不過都係安心等上機好過。 今次4日3夜既峴港之旅就此結束。 去過峴港後,覺得e度比想像之中乾淨、安全、低消費,真心值得一試。