上次跟過長沙灣地膽黎過保安道街市嘅市政大廈食蒸氣火鍋,性價比超高! 所以今次又黎食過返尋味啦~ 而家疫情關係, 店家會入座前先幫我地量體溫, 再比熱水我地自己洗碗筷,感覺更衛生! 雞煲任食火鍋都只係$138/位, 蒸氣海鮮任食火鍋 $218/位, 支裝汽水任飲, 平時飲一支都要十幾廿蚊啦, 任飲青島純生啤酒都只係加$20/位, 啱晒一大班人聚會互劈, 餐廳仲要唔收加一,真係好抵呀! 點擊圖片放大 +3 先來一盤是日精選海鮮拼盤先~ 有鮑魚、海蝦、大元貝、貴妃蚌、大蜆、桶蠔、蟲草滑雞、美國牛小排等, 我地仲額外加碼$20/位,每位多隻龍蝦~ 果然係街市裏面,海鮮都好新鮮啲! 龍蝦幾肥美,有好多蝦膏, 肉質鮮甜爽彈,正! 海蝦新鮮,肉質爽彈, 重點係可以無限encore,必點之選! 鮑魚雖然上枱嘅時候唔識郁,但食落軟腍鮮味。 貴妃蚌和大元貝大大隻,肉質爽甜, 桶蠔好大隻,有半隻手掌咁大,味道鮮甜! 美國牛小排幾新鮮,肉香味美。 食完呢盤海鮮拼盤, 就可以追加其他火鍋配料啦! 可以揀繼續蒸,或加粥底,或轉打邊爐~ 有超過70款嘅任食火鍋配料, 海鮮如海蝦、沙白、帶子、大獅蚶、大魚頭、魚卜、鱔片、脆肉鯇魚片等都係任食, 獅蚶幾大隻,肥美多汁。 帶子鮮甜,值得一試! 上次食過「林洪記」嘅海鮮呀魚呀,全部都好新鮮, 今次脆肉鯇魚片,新鮮爽脆! 自家手打嘅墨魚滑, 味道鮮香,口感爽彈,必試! 鐘意食蟹嘅不妨試下香辣炒蟹, 連殼都炸到超脆,甚至係可以食, 蟹肉都幾飽滿,味道亦幾惹味~ 不過始終覺得有啲浪費左隻蟹, 因為蟹肉有啲炸得太過,冇晒蟹本來嘅味道和口感, 如果可以就咁提供生蟹用黎蒸煮,可能仲好! 新鮮雞腸 超新鮮嘅雞腸,味道鮮香,正! 整體來說, 唔知係唔係始終近街市有近街市好,材料全部都新鮮過人, 價錢亦都好街坊價,性價比超高! 地址: 林洪記 (長沙灣) 長沙灣保安道325號保安道街市3樓CFS4號檔 營業時間: 星期一至日:18:00-3:00