荃灣友一定唔會唔識「金坊」呢間泰國菜館, 每次去到路德圍, 都會見到好多人排隊等位, 究竟係咪真係咁正!? 咁就要試下先知啦! 而家仲做緊優惠, 逢星期一至五9:30pm後宵夜優惠,指定菜式有七折優惠,都幾抵! 不過我地今次黎太早啦,等唔到宵夜先食。 齊心抗疫下,6:00pm後外賣自取仲可以全單八折, 最正係本身餐廳就免加一,公眾假期就除外。 「金坊」嘅海南雞係最出名, 不過其實燒雞名氣都唔弱架! 我地叫左半隻($98),兩個人食就啱啱好, 用明火炭爐燒烤, 外皮燒至微脆, 加上雞皮本身好薄,沒有太多嘅肥膏, 雞件厚肉得黎又夠嫩滑,肉汁豐腴, 蘸上自家製嘅酸辣醬汁,好惹味! 小妹最鐘意食豬頸肉, 見到呢度豬頸肉好似燒得好靚咁,就試吓啦! 果然冇令我地失望! 燒豬頸肉有兩種口味款式可以揀, 有淨燒和青檸汁燒, 唔想咁滯就要試下青檸汁燒豬頸肉($96)啦! 嘩,豬頸肉堆砌到好似一座山咁,份量好足呀! 豬頸肉肥美爽嫩,配上酸甜嘅青檸汁,好醒胃! 仲有超多芽菜墊底,吸晒醬汁嘅精華,咁就冇咁膩啦! 平時我地倆口子去食泰國菜都係食炒金邊粉, 不過見到呢度嘅炒粉麵都幾多種類可以揀, 所以就試下香辣炒粉絲($90), 可以任選一款肉類,雞、牛或豬, 同雞有仇嘅我地揀係揀雞啦! 配料好豐富,有好多時令菜蔬, 雞肉都算嫩滑, 炒粉絲炒得夠乾身,微辣惹味! 馬拉盞炒椰菜苗($92) 份量都幾多, 馬拉盞炒得幾香幾惹味,不錯吃! 最後,食完泰國菜梗係飲番個椰青啦! 點擊圖片放大 +7