媽咪最鐘意得閒飲茶食個包! 所以今次小編就帶媽咪去左旺角雅蘭中心新開、主打新派和懷舊點心嘅「點心廊」, 餐廳係由喜來登前大廚、入行50年嘅名廚陳小麒師傅主理。 「點心廊」着實像個畫廊一樣, 裝潢採用清幽嘅日式茶室風格, 值得一提嘅係, 餐廳嘅壁畫、蒸籠上嘅圖案等, 全都出自陳師傅嘅手筆, 由美食到畫作,將每件點心都打造成為藝術品~勁! 點擊圖片放大 先嘆個靚茶先~ 唔止只係有普洱、觀音、菊花等傳統嘅茗茶, 仲有比較特別嘅玫瑰荔枝茶~ 想一次過試晒餐廳嘅招牌點心, 必點創作六式拼盤(每款兩件)($198) 一上菜,已經被佢粉紅色嘅蒸籠所吸引左~ 啱晒相機食先! 店員先介紹用紅菜頭汁噴染上色嘅蒸籠,好有心思呀! 仲為點心逐件介紹,好貼心呀! 金箔墨汁蟹粉鮮蝦餃 烏黑嘅墨汁皮,加上金箔嘅點綴, 營造出畫龍點睛之效。 蝦餃製作講究, 坊間嘅蝦餃普遍都只有8摺, 但呢到嘅就有10摺,皮更薄更美觀~ 咬開蝦餃, 就見到有好大隻鮮蝦肉係裏面, 橙黃色的蟹粉也清晰易見,真材實料喔! 海膽鳳眼餃 海膽鮮甜, 蝦餃皮煙煙韌韌, 底下嘅蝦餃仲有原隻鮮蝦係裏面,爽口彈牙, 正! 黑白芝麻流心煎堆仔 用黑白芝麻混合炸成煎堆仔嘅外皮, 味道更香更濃, 芝麻流心真流心!香味十足! 有個細心位值得一讚, 就係每件熱氣野如鹹水角、煎堆仔底下, 都有一塊生苦瓜比你清清熱~ 黃金啤梨鹹水角 啤梨造型鹹水角好精緻! 外層炸得香脆, 內裏餡料有豬肉碎、蝦米、冬菇等, 鹹香味美! 原隻鮑魚雞粒酥 預先炆住過嘅鮑魚鮮香軟腍, 雞粒(撻)同鮑魚都幾夾! 一口燕窩蛋撻 好矜貴嘅蛋撻! 燕窩份量毫不吝嗇! 曲奇撻皮鬆化,仲有蛋香,不錯吃! 翡翠日本帶子腸粉($78) 腸粉皮晶瑩剔透, 未食已經透視出裏面嘅餡, 日本帶子鮮甜有嚼勁, 雖然價錢有點貴, 不過用了確實有質素, 可能係小編食過最好味嘅腸粉~ 沙薑北菇蒸滑雞飯($68) 呢度嘅蒸飯係用石頭鍋, 可以做到飯焦嘅效果,又可保温, 咁就可以慢慢食,唔驚蒸飯好快凍唔好食啦! 材料豐富, 雞件厚肉嫩滑, 仲有好多沙薑粒喺裏面, 令到個米飯好香, 最重要係粒粒分明, 唔會黐埋一舊舊! 整體來說, 平時食個下午茶, 都要百幾二百蚊一位, 而呢到嘅創作六式拼盤都只係$200一set, 二人分享都夠食,真係好抵食, 絕對要食過返尋味! 點擊圖片放大 +2 地址: 點心廊 (旺角) 旺角彌敦道639號雅蘭中心2樓201號舖 營業時間: 星期一至日:11:30-23:00