今次係小編第三次食「同人鍋」了! 來「同人鍋」的原因是因為$288就可以嘆齊雞煲和海鮮火鍋,仲要係任飲任食,性價比很高呢! 平日火鍋仲無限時, 星期五、六、日或公眾假期限時2.5小時,另外每位加$10。 餐廳在裝潢上是簡潔實戰型, 沒有花巧的裝修,只有木製桌子和膠椅子。 我們被安排坐到靠牆坐位, 坐位寬敞舒適,更設有抽風系統, 食完就唔怕成身一陣雞煲味啦! 飲品方面, 除了啤酒以外,汽水、各款罐裝果汁和茶都是任飲的, 值得一提的是店家很有心思, 連自家煲製的菊花薑蜜和蜂蜜菊花露都有,低糖又健康! 小編每次來都必喝蜂蜜菊花露,清甜潤喉, 打邊爐咁熱氣,梗係要飲返杯清熱解毒一下! 先食雞煲, 雞煲有五種辣度可以選擇, 因為朋友不吃辣,所以我們便選了唔辣。 雖然唔辣,但秘製醬汁仍然香濃惹味, 而且加入大量洋蔥和芫茜,香氣四溢, 雞件非常多,件件都很厚肉, 肉質嫩滑又入味,好味道! 雞煲還配上自家製響鈴和薯粉, 響鈴大大件,食落感覺不會太油膩或飽濟。 雞煲配薯粉是新添加的, 薯粉吸晒雞煲的醬汁,煙韌入味, 不愧是最完美的配搭! 唔夠喉仲可以任添呢! 食完雞煲,就到打邊爐時間啦! 先說湯底, 原來兩位以上便免費送原隻龍蝦湯底或花膠雞湯底, 上次試左原隻龍蝦湯底,今次就試下新口味的花膠雞湯底啦! 斤兩十足的花膠, 雖然沒有雞件係湯底裡面,但嚐起來香甜滋潤, 係未打邊爐前我地仲忍唔住飲左好多湯呢,讚! 海鮮拼盤 每天都有7至8款海鮮供應, 款式是視乎每日有咩新鮮海鮮而定,而份量是按人頭計的。 是日精選海鮮有鮑魚和蟶子皇, 鮑魚上桌時還是活的、會動的, 蟶子皇有一隻手掌咁長,彈牙好味! 店員好貼心地提示我們涮海鮮的適當時間, 鮑魚涮六分鐘,蟶子皇涮兩分鐘, 咁就唔會overcook啦! 時間剛剛好,真的很鮮甜味美! 其他海鮮如生蠔、脆鯇片、蝦、蜆、鮮魷魚都很新鮮, 各種海鮮配上香甜的花膠雞湯更能突顯出海鮮的原汁原味呢! 食完海鮮,便可以食其他火鍋配料了! 這碟是二人份量的安格斯肥牛, 牛肉肥瘦適中,牛味足,肉質軟腍, 惟這不屬於任食項目。 如果真的愛吃牛肉的話, 可以選擇點肥牛呢!肥牛是任食呀~ 其餘的火鍋配料還有各式丸類、餃子、腸類和蔬菜等, 之前有一種丸印有Minion的卡通芝士包, 可惜而家沒有了! 不過龍蝦沙律丸也不錯! 一咬下去,龍蝦沙律便爆曬出黎,值得一試! 值得一讚的是這裡還有小編最愛吃,但不常見的蟹籽丸和水晶包呢! 韮菜餃最令我一試難忘, 自家包製的餃子皮薄餡靚,真係好韮菜! 小編最愛多菜少肉,所以覺得不錯! 之前食過覺得餃子皮很容易散開,而家改善左呢! 整體來說, 「同人鍋」的食材、湯底都相當有水準,價格又合理。 食雞煲又食海鮮火鍋,一次過滿足曬兩個願望! 而家像「同人鍋」一樣有雞煲有海鮮火鍋任飲任食的店舖愈來愈多, 如何出奇制勝,倒是值得思量! 如果像同行增設甜品應該更完善, 或把所有任食配料都改為自行落單形式更好, 就不會浪費有些不吃的食物。 地址: 同人鍋 (尖沙咀) 尖沙咀山林道29-31廣利樓1樓及地下4A號舖 營業時間: 星期一至日 17:30-23:30