前排心血來潮想食避風塘炒蟹,男朋友就介紹之前同朋友食過既喜記蟹將軍.於是我就上openrice search下呢間餐廳有咩來頭同食評.個個食過呢度既避風塘炒蟹都有讚冇彈!掂啦!應該係信心保証!於是我地就膽粗粗係星期五晚位都唔book就咁走左上去.可能時間尚早,唔洗等位就入左去啦! 打開餐牌立刻鎖定要避風塘炒蟹!見人地圍圍都食,真係招牌菜喎!餐廳話蟹係用上越南肉蟹,每日空運到港架!所以隻隻都肥大肉厚!肉蟹分兩個重量:$20兩 (1斤2至1斤9)/ $25兩 (1斤10至2斤8).我地得兩個人食,叫左一個細size既蟹同咖哩煮辣螺(唔係好記得呢個叫咩名).叫炒蟹仲可以送多個小菜添!兩個人食三個餸夠晒啦! order完蟹之後,侍應會係出面揀好蟹再磅好幾重,再拎返黎比你睇,話比你知呢隻蟹幾重同幾錢,問你O唔OK?我地叫左隻細size都要$4xx.雖然係貴左D,不過一次半次冇所謂啦!最緊要好食!所以最好多D朋友一齊黎食,可以share. 隔左冇耐,我地隻蟹黎啦!好香好吸引呀!個D蒜蓉粒包住晒成隻蟹!未食都知得啦!即刻拎隻蟹鉗黎試下先!雖然個鉗冇炒到裂開,但係D味一樣可以穿過個殼入到去!好夠味呀!貴都抵呀!仲有個D蒜蓉粒,炸到好乾身,唔會好油淋淋!用黎送飯一流呀!(順帶一提,門口有水喉可以洗手好方便!) 食到咁上下,個螺又到啦!平時去酒家食就會用木竹簽,但係黎到呢度就梗係唔係用竹簽啦!一人一個鐵鉗,好似食法國田螺咁!哈哈!不過本人都係鍾意地茂D用竹簽!感覺好似有風味D!個咖哩煮辣螺可以選擇唔同既辣度.我地叫左小辣都已經好夠辣啦!不過就略嫌唔夠香. 兩個人食三個餸夠晒飽!好滿足呀! 地址:尖沙咀彌敦道iSquare國際廣場6樓602號鋪 電話: 2366 7565