想睇番西歐五國星馬畢業遊的行程,請睇行程篇 (27日景點行程分享,機票資料) ~今日的行程~ 5月27日:搭火車去威尼斯 Venice -> 彩色島 Burano -> 午:Trattoria da Romano (米芝蓮推介) -> 聖馬可廣場 Piazza San Marco -> 聖馬可鐘樓 St Mark's Campanile -> 嘆息橋 Bridge of Sighs -> 晚:Trovatore (意大利菜) 今日出發去水城 - 威尼斯Venice, 繼上一次由羅馬搭去佛羅倫斯, 我地今次又係搭Italo, 由Florence Santa Maria Novella火車站搭9:54am的火車去Venezia Santa Lucia火車站落車,預計12:00pm到達, 我地買左最平的Smart座位, 價錢每人係€29.5。 係佛羅倫斯見到呢間連鎖的Venchi雪糕店, 其實香港都有Venchi,但一直都未食過, 可惜當時晨咁早唔想食雪糕, 我地唯有留番遲d再遇到Venchi先食啦。 起身咩都未食,於是去左呢間Tentazioni Cafe買早餐上火車食! 地址:Piazza della Stazione 45, 50123, Florence, Italy。 兩件焗三文治,盛惠€9.4。 之前係法國巴黎買的傷風藥都食哂, 於是男友係火車站的藥房又買盒傷風藥, 男友話自己咳,店員又推薦佢買盒喉糖, 總共€16。 係火車上見到島上密集住好多屋仔, 我地就快到達威尼斯啦! 話說我地係威尼斯逗留的時間得20小時20分鐘(怪自己買火車飛無睇清楚時間), 所以我地要爭分奪秒, 我地打算係火車站寄存行李, 趁仲有太陽,狗衝去彩色島, 然後係火車站拎番行李先去酒店check in。 寄存行李的地方係一號月台隔離, 隊頭係藍白色長方形個個牌個度! 勁多人排隊呀。 威尼斯島上的交通都係搭水上巴士, 係我排寄存行李的時候, 男友就去買水上巴士的1 Day Ticket, 價錢係€20 一個人, 詳細資訊可以睇呢個網址。 男友買完水上巴士的船飛後, 我寄存行李條隊都無乜點郁過! 於是男友就發現有條Express的隊, 價錢係每件行李€12, 係普通隊的2倍價錢!(普通隊的詳細價錢睇呢個網) 見到有人頂唔順比多d錢轉去排express, 由於我地都非常趕時間, 所以都投向Express的懷抱, 去到Express係無人排隊咁濟,我地好快放低行李走人啦。 首先係火車站出面的Ferrovia碼頭搭路線5.2或者4.2的水上巴士去F.te Nove "D"碼頭 (約20分鐘), 然後行去F.te Nove "A"碼頭搭路線12的的水上巴士去Burano彩色島 (約42分鐘)! 水上巴士的坐位唔多, 無位的話就要企係甲板度啦。 1:15p.m. 我地搭緊路線12的的水上巴士去Burano彩色島啦。 ========================= 2:00p.m.,我地終於黎到彩色島啦, 呢度的屋仔比威尼斯主島鮮豔好多。 我地第一時間去醫醫肚先, 我地去左島上好多Blogger推薦的Trattoria da Romano, 聽聞係《米芝蓮指南》推介的餐廳黎,但就無拎到一至三星啦。 地址:Via S.Martino DX 221, 30012 Burano, Italy。 出名的餐廳果然係唔休做, 附近餐廳的職員係門口落力推銷客人入去食, 而呢間米芝蓮推介的餐廳就算你行入去, 都要等好耐先有人招呼你 (實在太多食客)。 我地等左陣,終於有人招呼,我地又坐左係室外, 叫左杯白酒飲。 當然會有籃麵包比你食啦, 有包裝的係麵包條。 Starter前菜叫左呢碟 Sarde in "saor" €15, 係常見的威尼斯菜黎, Sarde係沙甸魚咁解, 呢間餐廳特別在於將沙甸魚的肉整成糕狀, 隔離個d係醃左醋&白酒再煮過的洋蔥。 另一道前菜係Folpetti €15,英文係musky octopus,一種八爪魚黎, 係經典的威尼斯海鮮菜。 First Course叫左 Risotto di Gò da Romano €36 (二人的份量), Risotto di Gò亦都係傳統的威尼斯菜,而且係彩色島的漁民發明呢度菜架, Gò係指Ghiozzo(Goby fish) 蝦虎魚,所以呢碟菜我會譯做蝦虎魚意大利飯。 我地就係食左咁多啦, 另外開台費每人要€3, 總共比左€80。 ========================= 食完野就周圍影下相啦。 彩色島的屋全部都好矮, 間間都唔同顏色, 所以吸引左好多人特登黎影相(包括我)。 呢度都仲有好多居民係度生活, 雖然佢地d屋油得好靚, 但影相的同時,盡量唔好騷擾到佢地呀。 係佢地屋外影相都會隱約聽到屋內的電視聲。 每間屋都各有特色呀! 原來彩色島的居民想係佢地間屋油色係要同政府申請架, 因為呢度每間屋的顏色係有系統的, 唔可以胡亂油色架, 向政府申請左想油咩色之後,政府就會回覆你呢隻色可唔可以油架啦。 唔怪之得呢度d屋唔會撞色啦, 睇黎意大利政府係極力維護島上色彩繽紛的顏色! 呢度都有唔少的手信店, 但我地逗留時間唔耐,所以都無點樣行過。 影埋呢張相我地就搭船走啦, 當時接近4點半,勁多人呢個鐘數搭船走,所以上船都好迫下! ========================= 之後我地搭水上巴士番去火車站拎行李, 再搭去酒店check in。 去酒店個段見到威尼斯的建築都好有藝術感, 就好似呢個有對巨型的手捉住座樓。 水上巴士~ 兩隻馬糾纏住的巨型藝術品。 威尼斯d屋都起得好密集, 我地間酒店就係呢條巷入面。 終於搵到我地間酒店Ca' Pagan - Guest House, 我地事先係TripAdvisor做足功課先搵到間酒店, 下篇Blog會詳細做個review。 係酒店放低左行李之後我地就出發行去聖馬可廣場! 間唔中會見到威尼斯最具代表性的傳統划船 - 貢多拉Gondola, 價錢都要約300蚊港紙一個人坐半個鐘, 兩個人就要6舊水啦! 5:45pm 我地終於行到黎聖馬可廣場 Piazza San Marco。 我身後就係聖馬可大教堂 St Mark's Basilica, 係1094年建成, 係好出名的拜占庭式建築。 聖馬可廣場特別多鴿, 好多人都會餵野食吸引d鴿埋黎影相。 屋頂的雕塑刻得非常仔細。 之後我地就排隊上聖馬可鐘樓 St Mark's Campanile, 其實原本的鐘樓係1902年倒塌, 呢個鐘樓係根據舊鐘樓的設計,係1912年重建而成。 上鐘樓頂的入場卷要€8 一個人, 當時排左15分鐘終於有得上去啦。 比€8上黎我覺得係值得的, 因為可以飽覽成個威尼斯的市景。 聖馬可廣場。 威尼斯真係好靚, 建築物的屋頂的顏色大部分都係橙紅色。 而家岩岩好日落, 個天色非常靚。 聖馬可廣場對住海個邊。 可以望到聖喬治馬焦雷島 San Giorgio Maggiore & 朱代卡島 Giudecca。 聖馬可廣場的另一角度。 當時8:25pm 太陽就快落山啦。 咁岩遇著打鐘 (記得開聲聽), 無啦啦打鐘俾佢嚇親,同時都好震撼! 真係好值得比錢上鐘樓頂呀。 離開左鐘樓之後我地就行左黎聖馬可廣場隔離的嘆息橋Bridge of Sighs, 嘆息橋一邊係總督宮 Palazzo Ducale,另一邊係新監獄 Prigioni Nuove, 嘆息橋的名由英國詩人Lord Byron改的, 而且由來是咁的:當死囚係總督宮被宣判後,行呢條橋去監獄的時候望出去,慨嘆佢地最後一次望到威尼斯美麗的景色。 但係有人有以下三點的質疑: 1. 嘆息橋起好的時候,已經無死刑呢回事, 2. 總督宮的囚室都係小型罪犯, 3. 係橋上面唔係好望到出面的景。 究竟係咪詩人太過多愁善感呢?真係無從考究啦。 咁岩有架郵輪駛左黎威尼斯, 令我諗起尖沙咀。 ========================= This photo of Trovatore is courtesy of TripAdvisor 晚飯的時候, 我地就求其入左間聖馬可廣場附近TripAdvisor排名幾高的餐廳 - Trovatore, 一入去侍應的招呼超級好, 間餐廳外表無乜特別, 但係d service好似去左5星級酒店的餐廳。 地址:Castello-Calle Delle Rasse 4535, 30122 Venice, Italy 首先送左杯餐前酒。 然後送左碟小小的開胃菜。 餐廳的環境, 雖然無高級的裝修, 但呢度侍應的service好有禮貌、恭恭敬敬, 好似去左間五星級酒店食野咁。 我地開左支白酒,支酒會放係酒桶度保溫, 仲開左支礦泉水。 我地影左支礦泉水 €4.7, 但竟然無影到支Pinot grigio Stocco白酒 €16。 我地原本諗住每人叫一杯白酒飲就算, 但侍應話開支酒同每人叫一杯的價錢差唔多, 所以我地就開左支酒啦。 侍應開酒後仲會比我地試下味先! 前菜 Caprese con emulsione di basilico €12.5 我地想食d蔬菜,就叫左呢個意式芝士沙律 Caprese, 入面有水牛芝士+羅勒葉+蕃茄。 前菜 Rosellina di Manzo affumicato con rivisitazione di burrata dello chef €19 呢碟係煙燻牛肉+意大利Burrata芝士 海鮮類 First Course叫左 Spaghetti alla chitarra al nero di seppia €16 黎到意大利緊係要試番碟墨魚汁意粉啦, 係好食過香港食到的墨魚汁意粉,食完記得抹乾淨咀呀! 另一碟First Course叫左 Risotto alle “Castraure” con ristretta al porto €17 中文我會譯做雅枝竹意大利飯。 雅枝竹被人稱為"歐洲蔬菜王",佢盛產於歐洲南部,屬於菊科類植物。 其實佢係未熟的花蕾黎,味道先苦後甘甜味,含有大量的蛋白質及鐵質,而且低卡路里。 最後叫左甜品 Tiramisu in Coppa Martini €10 用Martini杯裝住的意大利芝士餅Tiramisu, 呢個Tiramisu好濕潤、好濃味、好好食! 食完之後餐廳送左餐後酒。 最後仲送左餐後曲奇添, 真係飽到一個點呀! 另外,開枱費每人€3, 收15%服務費, 總共食左€116.4。 服務態度好,又送餐前酒、小小的開胃菜、餐後酒、餐後曲奇, 黎左歐洲食左咁多餐, 真係第一次遇到五星級的服務! 食完野我地經過聖馬可廣場行番酒店, 見到好多人玩緊類似踢毽的活動, 因為呢度有人兜售發出藍色燈光的毽, 所以周不時都見到有人玩緊,仲踢到好高添。 聖馬可廣場的餐廳仲有Live的提琴表演,氣氛好好。 我地聽日出發去米蘭! Day 14 完~ 旅遊日期:2017年5月14日- 6月10日 ========================= 覺得呢篇blog幫到你, 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update! ========================= 《西歐五國星馬畢業遊》 行程篇 (27日景點行程分享,機票資料) Day1 (出發去倫敦,維也納轉機驚魂事件,奧地利航空) 酒店篇 (英國倫敦Paddington,Castleton Hotel) Day2 (白金漢宮,西敏寺,大笨鐘,Oxford Street,Fish&Chips,柏靈頓) 酒店篇 (英國倫敦,Conrad London St. James) Day3 (大英博物館,倫敦塔橋,Harrods,Burger&Lobster,Nandos) Day4 (Bicester Village戰利品分享,itsu英式日本快餐,Five Guys) Day5a (英國巨石陣Stonehenge,世界文化遺產) Day5b (九又四分之三月台,倫敦最好食的葡撻,印度菜) 酒店篇 (英國倫敦King's Cross,Crestfield Hotel) Day6 (倫敦去巴黎,羅浮宮,巴黎聖母院,愛情鎖橋) Day7 (凱旋門,聖心堂,香榭大道,巴黎鐵塔下睇夜景) Day8 (Palace of Versailles,係凡爾賽宮嘆下午茶) 酒店篇 (法國巴黎,Hotel R de Paris) Day9 (《Inception》電影拍攝場地-比爾阿克姆橋) 酒店篇 (睇到巴黎鐵塔的酒店Hôtel La Comtesse) Day10 (巴黎鐵塔,聖路易島的雪糕,Ryanair飛羅馬) 酒店篇 (羅馬Ciampino機場,Hotel Palacavicchi) Day11a (搭火車黑仔事件,梵蒂岡,羅馬許願池,萬神殿) Day11b (羅馬鬥獸場,古羅馬廣場,GROM雪糕) 酒店篇 (羅馬,Hotel Nord Nuova Roma) Day12 (佛羅倫斯,The Mall,聖母百花大教堂,領主廣場,T-bone牛排) Day13 (佛羅倫斯周邊打卡勝地:比薩斜塔&五漁村) 酒店篇 (佛羅倫斯民宿推介,Home Boutique Santa Maria Novella) Day14 (威尼斯,彩色島,聖馬可廣場) 酒店篇 (威尼斯,Ca' Pagan Guest House) Day15 (威尼斯不愉快事件,米蘭曲折之旅,米蘭大教堂,艾曼紐二世迴廊) 酒店篇 (米蘭,Hilton Milan) Day16 (米蘭去瑞士Grindelwald,瑞士火車pass要點揀?Domodossola退稅分享) 酒店篇 (瑞士山區Grindelwald,望到阿爾卑斯山的Hotel Lauberhorn) Day17 (玩轉瑞士少女峰!原來有咁多野好玩!) Day18 (瑞士Grindelwald玩刺激活動/行山的聖地 - 佛斯特 First) Day19 (瑞士Grindelwald享受一日慢活) Day20a (瑞士琉森,卡佩爾木橋,垂死獅子像,蘇黎世) Day20b (蘇黎世機場退稅,瑞士航空,Aspire Lounge)