上篇blog就介紹左我地係Mercure Maldives Kooddoo Resort住左三晚的水上屋,今次就同大家介紹下我地呢四日三夜係Resort島上面食左乜,我地買左的旅行套票係Full board,即係包哂早午晚三餐!建議大家起碼買Half board,即係包早晚餐,因為Kooddoo島上除左Resort外,係唔會有其他餐廳架,大家都係要依靠Resort的餐廳維生 (講到好似去左荒島咁 XD)。 Resort上面有兩間餐廳,分別係Resort中央的Alita Restaurant & Pool Bar,另外就係行遠少少的Sunset Bar (佢另一個名叫Vistas)。Alita係食自助餐的,而Vistas就叫套餐的,只提供午餐&晚餐。究竟係resort入面住3晚,得兩間餐廳係咪無啖好食架呢?今篇blog同大家分享下我地食左d乜啦。 Photo from https://media-cdn.tripadvisor.com/media/photo-o/0e/dc/3a/06/alita-restaurant.jpg首先介紹提供自助餐的Alita餐廳先啦。✶ Alita 早餐篇 ✶ Alita位於resort的中心點,對住resort的泳池。 呢間餐廳全日都係提供自助餐。 有室外&室內的座位,識坐就緊係坐室外啦。 可以望住馬爾代夫水天一色的靚景食早餐。 餐廳的自助早餐主要都係西式早餐。 不外乎腸仔、火腿、煙肉、薯角、包。 d薯角幾好食,拎完再拎。 第二日的早餐發現有薯餅&麥樂雞添。值得一提食早餐的時候,間唔中都會有職員都會同你傾下計,問下你d食物&resort o唔ok咁,都幾warm架。✶ Alita 午餐篇 ✶ 我地係Alita只係食左一次午餐,午餐的種類比早餐多d。 仲可以order d飲品添。 午餐都有甜品食。✶ Alita 晚餐篇 ✶ 晚上的Alita。 自助晚餐的食物感覺上油膩d。 有青口食。 我地叫左杯cocktail飲下。 當然少不了甜品啦。 有無人好似我咁,食自助餐會期待甜品多過d餸? 生果盤有紅毛丹拎,但呢度的紅毛丹都細細粒,d毛又好黑,好似香港食到的紅毛丹靚d。 第二晚Alita有show睇,所以我地都早d黎食野,霸室外的位。 夜晚坐戶外比室內更加有feel。 今晚有馬爾代夫人表演佢地的傳統舞蹈&音樂,佢地除左係鼓手前面跳之外,仲會周圍行黎行去咁跳,好特別的體驗。呢段Vlog有馬爾代夫舞的片段架。✶ Vistas 午餐篇 ✶ Vistas可以睇到一望無際的海景,另外,呢度可以叫一份前菜+一份主菜,我地覺得Vistas會比Alita的自助餐抵食,所以我地黎呢度食左3次午餐! 可能因為Vistas要行遠少少先去到,所以比Alita少人。 每人叫左杯Cocktail,男友叫左Whisky Sour,好Whisky的苦味,我叫左Blue Hawaiian,好椰汁味。 男友的前菜係Gambas Al Ajillo,中文的意思係香辣蒜蝦,男友覺得d汁好好味,酸味味咁。 我就健康d叫左Caesar Salad with Shrimps,隻蝦幾咸,好多芝士。男友覺得兩碟蝦都好新鮮好好食。 主菜方面,男友叫左Chicken Biryani,個印度薄餅Papadum好脆,配埋碟乳酪好好味,而個印度雞飯都唔錯。 我就叫左Crispy Chicken,d雞係用蠔油架,味道似乾炒牛河的味道。 我地係Vistas食第二次午餐。 前菜叫左Mezze,係4塊查左唔同中東style醬的烤餅黎。左上係Baba ghanoush:係用矮瓜蓉、芝麻醬、橄欖油等整成的醬。右上係Tabouleh:中文叫做塔布勒沙律,係用布格麥、番茜、蕃茄等整成。左下係Hummus:係用鷹嘴豆蓉,再加上芝麻醬、檸檬汁、蒜等整成。最後係Muhammara:係辣椒醬黎。 男友叫左Chorizo Al Vino,面頭有幾條面包,下面係用紅酒煮成的Chorizo西班牙辣肉腸。 主菜我地叫左Panini意大利三文治,揀左Roast Beef,入面有五成熟的牛肉、燒洋蔥、蕃茄、生菜等,仲有碟薯條。 再叫多杯野飲先。 餐廳露台有個位比人坐下。呢度下午五點會有餵小鯊魚的活動架,可惜我地日日都去左浮潛/潛水,所以無時間黎餵小鯊魚。 其實坐上去都驚驚地架,男友佢就驚佢會坐爛跌左落海。 我地係馬爾代夫最後一日的lunch都係黎Vistas食。 我的前菜係Mushroom Arancini,係蘑菇意大利飯波伴蕃茄醬。 男友的前菜係Mexican Nachos,粟米脆片配芝士、莎莎醬、墨西哥辣椒、酸忌廉等等。 我的主菜係Black Pepper Beef,牛肉炒烏冬配燈籠椒等。 男友的主菜係Caprese,係蕃茄+水牛芝士放係塊包上面焗,面頭再加左d羅勒醬,仲有碟薯條。✶ Vistas 晚餐篇 ✶ 其實Vista午餐同晚餐的menu都一樣,但晚飯的氣氛浪漫好多,我地今次坐左係Vista二樓的露台。 我地後面個台好似係興祝週年紀念,所以職員布置到成台花瓣,食食下職員仲會為佢地送上一扎玫瑰花添。 黎呢到至少都會飲一杯cocktail,menu上的cocktail都比我地飲哂啦。 男友的前菜係Fritto Misto,有炸蝦、炸魷魚、炸洋蔥、炸翠玉瓜,好熱氣呀,會配上Aioli醬,中文叫做大蒜蛋黃醬。我個盤係Formaggio Platter,係芝士拼盤黎,有碟印度酸辣醬比你點黎食。 主菜方面,我叫左Fresh From the Ocean,係是日精選的魚,然後有4種煮法比你揀,我就揀左Lemon and garlic,用檸檬&蒜去煎條魚,另外會有薯蓉&菜伴碟。 男友叫左Egg Noodles with Shrimps & Scallops,蝦帶子金邊粉。 Vistas的二樓有桌球台比你玩,食完飯可以係度玩番下。 係二樓望番去樓下,夜晚都無咩夜景好睇,日頭會靚勁多。 除左桌球,呢度仲可以借d遊戲黎玩,我地最後一日check out左之後,食完lunch就玩下Uno & 層層疊。 呢間餐廳好適合比人坐係度hea下呀。 日頭d陽光透入黎間餐廳,篤波係一流。 送上一張招積樣比大家。總括黎講,雖然Mercure Maldives Kooddoo Resort只有兩間餐廳,但食物種類都幾多,我地食足4日3夜都無重覆,而且d野食都幾正,大家唔洗擔心無啖好食。旅遊日期:2018年2月22日- 2018年2月27日 =========================覺得呢篇blog幫到你,記得like Facebook Page https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/收到個blog的最新update!=========================《去馬爾代夫嘆》Day1 (搭國泰去馬爾代夫,首都馬累Unima Grand酒店)Day2 (搭馬爾代夫航空內陸機去Kooddoo Island)Resort篇 (水上屋大解構,Mercure Maldives Kooddoo Resort)Resort篇 (係Resort小島上Full board有咩食 - Mercure Maldives Kooddoo Resort)Resort篇 (黎馬爾代夫有咩玩?- Mercure Maldives Kooddoo Resort)馬累機場delay8小時番香港 直航變曼谷轉機遭遇