上年6月我地就去左胡志明市,當時香港護照仲未可以申請越南電子簽證e-visa,所以我地就係網上搵中介agent幫手申請落地簽證啦!係今年的2月開始,香港特區護照可以申請越南e-visa啦 (詳情睇呢篇申請教學),但係如果你想用英國BNO護照去越南既話,就需要做落地簽證架啦!注:如果你去富國島(Phu Quoc Island),係免旅遊簽證架。 我地就搵左呢間vietnamimmigration.org中介agent,首先上佢的網站 https://www.vietnamimmigration.org,然後禁"Apply for Visa on Arrival Vietnam"。 呢一頁填番國藉、入境目的、簽證類型、入境關口、入境日期、出境日期、快證服務。Passport country佢係有得揀British National Overseas - BNO同埋British National Overseas既,我當時就揀左British National Overseas - BNO,我諗兩個選擇都應該一樣。最後一欄Express service俾你揀需唔需要整快證,佢最快可以揀15分鐘即批,當然價錢亦都非常可觀,要額外加USD$255。我當時揀左唔洗錢個個,即係第二個工作天的8:00pm(7:00pm為越南時間)前批核。我地係2018年5月8號凌晨2點半申請 (當時寫5月9號7:00pm香港時間前可批核),實際上佢係5月8號下午6點3就批核左啦!需時少於16個鐘,其實唔加錢都好快手! 下一頁就填返你既全名、性別、出生日期、護照號碼、護照到期日,Full Name方面,其實個網都有講全名既次序排位係冇所謂,最重要係你要填哂護照所顯示的全名!(個網都係email度提及全名既次序係唔重要的,The name order is not important. It is just required your Visa letter (or the eVisa Vietnam) includes all your surname, middle name and given name) 然後下一頁要填你既電郵,呢個電郵係用黎收落地簽證個封信,信入面會show你&其他申請人既姓名、姓別、出生日期、國籍、護照號碼。如果你唔想同其他人的資料放埋係同一封信,咁就要加錢整Confidential letter。假設你係兩個人或以上一齊申請既話可以揀Your group/Letter (USD$8),封信就只會出你地既資料。假如你想獨立一人一封信的話,就揀1 person/Letter (USD$6)。當時我地都覺得唔介意俾其他人睇我地的資料,就冇揀到Confidential letter,所以封信就會見到黎自唔同國家既申請人的資料 (我當時封信有18個申請人),發現最多都係香港人! 最後一步就係俾錢,我地咩都無加錢,所以只係USD$6。佢只有一個付款方式,就係用PayPal啦,PayPal相信大家都有用過,冇既話都唔洗怕,PayPal係可以就咁入信用卡資料,唔一定要開Account先俾到錢架! 正如頭先所講啦,我地凌晨2點半整,同日的下午6點3就收到呢封email喇!呢封email有三樣野要留意,Email附件有落地簽證的確認信,信上面會有你既姓名、姓別、出生日期、國藉、護照號碼,記得print出黎帶去越南,用黎證明你已經登記左落地簽證呀!(特別一提,信上的國藉會寫United Kingdom)Email附件仲有一份入境用既表格,記得要print出黎填&黐一張證件相!記得到時要帶落地簽證所需要的美金(USD$25)、落地簽證的確認信、入境表格,同埋兩張證件相。(加埋入境表格上面要黐的證件相,total其實要準備3張證件相!)當日我地搭國泰航空(Cathay Pacific)去胡志明市,Check in的時候,地勤會叫你出示visa的文件,唔知係咪個地勤係新人,佢見到我封確認信的國藉寫United Kingdom就以為我填錯,我解釋申請的時候填 BNO,但最後出左United Kingdom,於是地勤問佢隔離的同事,個同事就解釋比地勤知國藉寫United Kingdom係正常架,最後地勤就出boarding pass比我地啦。 到達胡志明市後,要去落地簽證Landing Visa的counter交落地簽證的確認信、入境表格&兩張證件相,然後等叫名,當時特區護照仲未可以申請電子簽證,所以非常多人係度等簽證,(而家申請落地簽證的人流比以前會少左)當時等左成9個字先叫我名,比USD$25就搞掂落地簽證啦,然後就可以去隔離排入境過關啦。 =========================覺得呢篇blog幫到你,記得like Facebook Page https://www.facebook.com/fatbjai.travel/follow Instagram: fabjai.tavelhttps://www.instagram.com/fatbjai.travel/收到個blog的最新update!=========================其他文章:越南 網上簽證e-Visa申請分享 (內附注意事項)越南 落地簽證申請分享 (適合BNO,內附到達機場領證過程)續領BNO分享 (Adult first time,無交副簽)