~今日的行程~ 12月30日:搭國泰航空去首爾 -> 午:平壤麵屋 -> 南山谷韓屋村 -> Lotte Mart -> 晚:香港飯店0410+ -> 宵夜:橋村炸雞 今次會去首爾玩5日, 同埋會係首爾過跨年倒數添! 我地今日會搭8:10am國泰航空去首爾, 機程係3個鐘25分鐘,12:35pm會到達首爾, 今次係首爾過跨年的機票都唔係好貴, 每人HKD$2808 (已連稅)。 班機咁早,我地晨早3點就起身執野啦! 指定動作黎Plaza Premium Lounge食下野先, [由於我有American Express個張國泰航空尊尚信用卡, 所以可以無限次免費入環亞機場貴賓候機室 Plaza Premium Lounge (按我申請)] 呢度有腸粉食,非常正。 食飽飽就準備去登機啦。 有DBS Black World Mastercard的話, 就可以係機場禁區的RELAY書店換領$15以下的雜誌一本, $15以上就補番差價就可以啦!(按我申請) 所以我地都唔好嘥,每人換左本雜誌。 我地去登機啦。 今日個天好似無乜雲~ 搭早機所以有早餐食。 頭先係lounge食左好多野, 所以我揀左粥食。 到達仁川國際機場啦, 怕凍的我希望呢5日係首爾唔會太凍啦。 ========================= 大約1:25pm (韓國快香港一個鐘架), 出到黎仁川國際機場的抵港大堂。 我地首先去ATM禁韓Won先,最後禁左₩600,000 (當時係等於HKD$4470.94)。 (p.s. 而家d韓Won跌左好多) 我地去程同回程都book左司機接送我地去酒店, 司機都係在韓的中國人黎, 一路駕駛一路覆WeChat, 所以都唔推薦大家幫襯。 我地呢四晚都住係位於東大門的KY-Heritage Hotel, 遲d我再寫篇blog介紹下~ ========================= 首爾的第一餐就去左酒店附近的平壤麵屋 (평양면옥), 平壤其實係北韓的首都黎, 店主繼承左平壤爺爺的麵店之後, 係南韓的首爾開左呢間平壤麵屋, 呢間鋪最出名就係食平壤冷麵,或者叫做水冷麵。 地址:207 Jangchungdan-ro, Jangchung-dong, Jung-gu, Seoul, South Korea 韓文地址:서울특별시 중구 장충단로 207 外面的落貨的位置, 行入去先見到餐廳真正的門口。 侍應比左碟醃製的配菜、泡菜、辣醬, 仲有一杯同水冷麵湯底一樣味的牛骨湯。 豬肉餃子,₩11,000。 餃子上的肉條好好味,口感鞋d, 而d餃子好大舊,入面的豬肉都好多。 水冷麵,₩11,000, d麵口感彈牙,d配料亦比溫冷麵多。 溫冷麵,₩11,000, 口感似普通湯麵,亦只有一塊牛肉+半舊蛋, 所以推薦大家水冷麵多過溫冷麵。 餐飲的座位都好多。 發現韓國的餐廳都係用呢種綠色的牙簽, 係用澱粉做的,變成廚餘後都容易變軟溶解, 原來係為左d豬食用廚餘之後,廚餘入面的牙簽唔會吉親佢地的器官。========================= 之後我地就係便利店買左兩張類似八達通的T-money卡, 特登揀左Line的公仔,兔兔&熊大。 然後我地就搭地鐵去忠武路站,參觀南山谷韓屋村 (남산골한옥마을), 入面有5間由首爾各地遷移到呢度,而且再重新修復的傳統韓屋, 呢度免費入場,留意星期一係休息架。 當時5點幾,個天已經開始天黑啦, 但呢度人流唔多,都好適合影相。 呢個韓屋好有中國的色彩。 呢個韓屋又有日式的感覺。 呢個係掛滿左願望的稻草樹? 呢度竟然有棵聖誕樹, 係被韓屋包圍的聖誕樹。 ========================= 之後我地就搭地鐵去首爾車站, 個度有間Lotte Mart 樂天超市。 買左一埋零食返香港: Lotte的益力多啫喱軟糖,₩1980,香港成日見,但係韓國先至捨得買黎食。 Market O的橙味Brownie,₩4180,係香港未見過橙味就買黎做手信。 Market O的原味Brownie,₩4180,男友話香港而家都唔係成日見有得賣,所以買左盒。 Haitai的蜜糖牛油薯片,₩3980 (6小包裝),₩2380 (130g),令人食唔停口的蜜糖牛油薯片! Orion的魚仔夾心蛋糕,₩4320,魚仔形狀的蛋糕,入面有煙韌的麻糬同紅豆餡,超級好食。 Dr.You的堅果仁朱古力能量棒(迷你版),₩1000,我覺得就麻麻地。 Only Price的紫菜,₩5000,有20包。 CJ Bibigo的石燒紫菜,₩8480,有24包,見到돌김呢個字就係代表個紫菜係石燒製成,值得一試 (另外包裝好薄身,慳好多行李盒)。 CJ Bibigo的紫菜脆片,₩1980,買左燒烤味、原咪、蜜糖粟米味,好脆又有紫菜的咸味。 總共買左₩63,700,係樂天超市就可以辦退稅,最後即時退到₩3,500。 ========================= 之後我地就返東大門行下街搵食啦。 我地去左呢間香港飯店0410+ (홍콩반점0410+), 係韓國的連鎖中餐廳, 地址:11 Jangchungdan-ro 13-gil, Gwanghui-dong, 韓文地址:서울특별시 중구 장충단로13길 11 (지하1층)。 雖然呢間餐廳叫做香港飯店, 但係佢地的炸醬麵係好出名, 而且店入面的裝修一d都唔似中餐廳呀。 我地叫左一碗炸醬麵(Double份量),₩5,000, 唔辣,但d肉條唔夠多。 亦有一d醃製蘿蔔同洋蔥的伴碟小食。 我地仲叫左碟煎餃子,₩4,000, 煎得好香,咬一啖就已經必哂d汁出黎。 係化妝品店Aritaum買左4支MODI的指甲油。 當時係冬天,買左4隻比較深色的指甲油, 左面瘦d個兩支,每支₩2,500, 右面肥d個兩支,每支₩3,500。 我地晚飯食咁少野, 就係為左買韓式炸雞做宵夜, 於是就黎左24小時營業的橋村炸雞 KyoChon (교촌치킨), 間店full哂,所以我地就買外賣番酒店食, 地址:464-6 Changsin-dong, Jongno-gu, Seoul, 韓文地址:서울특별시종로구창신동 464-6 2F。 外賣製作需時, 所以我地就去左橋村炸雞附近的興仁之門影下相, 其實佢就係東大門啦, 係1396年朝鮮王朝時代興建的城門黎。 當時等左35分鐘先有炸雞。 當時係晚上11點,我地返到酒店開餐啦, 我地買左蜜糖味的炸雞,₩18,000, 仲有一盒醃製蘿蔔粒&一罐蜜糖汽水。 男友覺得d炸雞唔係想像中咁好食, 而d蘿蔔粒非常酸。 旅遊日期:2017年12月30日- 2018年1月3日 ========================= 覺得呢篇blog幫到你, 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/收到個blog的最新update! ========================= 《去首爾玩》 Day1 (南山谷韓屋村,韓國必買零食,橋村炸雞,平壤麵屋)