~今日的行程~ 6月7日:搭馬印航空由新加坡去吉隆坡 -> 午:JP Teres (馬來西亞菜) -> Pavilion Kuala Lumpur 行街 -> 亞羅街 Jalan Alor -> 晚:黃亞華小食店 我地今日會搭馬印航空(Malindo Air)10:10am個班機由新加坡去馬來西亞的吉隆坡! 我地今日7點就check out酒店, 然後call Uber由Four Season Singapore搭去新加坡樟宜機場, 總共搭左SGD$19.9。 7:50am黎到樟宜機場啦, 我地係馬印航空寄存左行李之後就去退稅。 閘外(未過departure immigration)/閘內(過左departure immigration)都可以退稅架, 如果你想將退稅的產品拎去寄存行李, 咁你就要退左稅先, 先至拎去寄存行李啦, 因為退稅的時候,有機會要檢查退稅的產品架。 只要你係有Tax Free logo的店鋪買滿SGD$100,就可以退稅架啦, 退稅的步驟都好簡單: 準備你的護照、航班資料、退稅的產品、購買的收據、買野個張信用卡。 係eTRS kiosk 自助退稅機申請退稅。 退稅唔成功的話,就要去Customs Inspection counter比職員check你退稅的產品。 退稅成功的話,就可以揀拎錢的方式。揀退現金就要去閘內的Central Refund Counter度拎錢,揀退係信用卡的話,10日內就會收到錢架啦。 詳細資料可以睇呢個網。 我地係Sephora買左SGD$122野, 可以係eTRS kiosk 自助退稅機申請退稅。 SGD$122當中7%的稅係SGD$7.98, 扣除左服務費之後,我地退到SGD$5的現金。 退完稅我地就係閘內shopping啦, 閘內的鋪頭都係免稅,所以一般都會比外面平。 琴日我地係金沙買左TWG Tea 6粒Macaron黎試, 覺得好好食,於是我地係機場買番12粒Macaron, 由於機場係免稅,所以比琴日買平左少少, 大約係HKD$10.8 一粒。 當然唔少得要去新加坡好出名的班蘭蛋糕店 - Bengawan Solo買野啦, 由於我地之後去吉隆坡玩多3日先番香港, 所以今次唔買一大個班蘭蛋糕啦, 好彩佢有得一件件咁買。 我地買左綠色3件班蘭蛋糕,SGD$1.5一件, 啡色1件咖啡卷,SGD$1.2, 深啡色1件朱古力卷,SGD$1.2, 黃色1件瑞士卷,SGD$1.7, 仲有2舊Corn Kuen粟米椰汁糕,SGD$1.1一件, 1舊Jong Kong 班蘭椰汁糕,SGD$1.5。以上的價錢係包左稅架, 埋單個陣佢會減番7%的稅,所以總共係SGD$11.5。想睇番我地之前係Bengawan Solo買左乜, 可以睇呢個blog、呢個blog&呢個blog。 然後見到機場d化妝品好似幾平, 就買左2支唇膏, 一支係Chanel Rouge Allure #138 Fougueuse,SGD$42.6,HKD$245.2, 另一支係 Givenchy Le Rouge #N202 Rose Dressing,SGD$47,HKD$270.6。 之後想用埋手上的現金, 就買左Caudalie Moisturizing Toner,SGD$29.9,HKD$172。========================= 由於我有American Express個張國泰航空尊尚信用卡, 所以可以無限次免費入環亞機場貴賓候機室 Plaza Premium Lounge (按我申請), 於是我地就去T1的Plaza Premium Lounge啦。 位置:Level 3, Departure/Transit Lounge West, Terminal 1, Singapore Changi Airport 個Lounge可以望到出面的飛機。 香港有魚蛋粉, 新加坡就有叻沙食啦。 可口可樂係新加坡出的Heaven and Earth牌子, 係香港未見過就拎黎試下, 仲拎左d三文治食。 ========================= 食飽飽就準備上機啦。 馬印航空(Malindo Air)唔係廉航黎, 但價錢可以媲美廉航咁平呀。 我地係Expedia book 新加坡去吉隆坡+吉隆坡番香港, 都只係HKD$852(已連稅)。 10:00am已經上到飛機啦。 雖然機程只有一個鐘, 但係個座位都唔會好迫。 估唔到咁快就去Grad trip最後一站啦~ 估唔到咁短程都有蛋糕仔食! ========================= 我地入境&拎埋行李之後, 就去ATM度禁d馬幣出黎駛, 當時的匯率大約係1蚊港紙兌1.893蚊的馬幣。 我地call Uber去Shangri-La Kuala Lumpur, 搭左MYR$79.9。 去到香格里拉就check in先啦, 入住時間係7/6 - 10/6, 我地book的房型係Premier Room, 1 King Bed, 有Free Parking、Free Wi-Fi, 3晚的價錢係HKD$2,721.18,即係HKD$907.06一晚, 等我帶大家參觀下間房啦。 雖然話check in時間係2:00pm, 但我地1:15pm都可以上房啦 浴室有浴缸。 亦都有沖涼的位置。 睡床。 有張梳化櫈, 酒店仲準備左d生果。 窗外的景色。 有書枱、電影等等。 有Nespresso 的咖啡機&膠囊。 ========================= 係酒店hea左陣之後就出去食個午餐先。 酒店7分鐘的路程有個KL Monorail單軌列車站Bukit Nanas, 我地買車飛搭一個站去Raja Chulan, 價錢係MYR$1.5一個人。 同沖繩的單軌列車的月台都幾似。 落左車之後,行10分鐘黎到Grand Hyatt Kuala Lumpur, 其實Google Map話我地由酒店行過黎都只係12分鐘, 其實都只係想體驗下吉隆坡的單軌列車。 黎到Grand Hyatt我地就入去JP teres呢間餐廳, 地址:12 Jalan Pinang, Kuala Lumpur 50450, Malaysia。 Menu, 我地黎呢度就係食馬來西亞菜。 首先叫左碟沙嗲雞肉串燒,MYR$34.31。 我叫左杯話梅梳打的飲品,MYR$12.01。 男友叫左呢杯Kedondong Juice,MYR$18.01, Kedondong係馬來文黎,廣東話叫做鐵沙梨,又稱為沙梨果, 英文會叫做Ambarella,簡稱Ampula,學名係Spondias dulcis, 飲落去係酸的。 男友叫左碗Curry Laska 咖哩叻沙,MYR$36.02。 我叫左Nasi Ayam海南雞飯,MYR$41.17, 隻雞係燒雞黎。 呢度d位好好坐, 又有cushion。 最後要加10%服務費、7%稅,總共MYR$165。 ========================= 之後我地就去左Pavilion Kuala Lumpur (柏威年廣場) 度行街。 男友係澳洲牌子Cotton On旗下的Typo買左個袋仔,MYR$59, 上面寫住"Keeping my SHIT together", 用黎放佢d雜物, 事後發現香港的Typo有皮款,而且價錢都差唔多。 然後見到間馬來西亞牌子Padini Concept Store, 入面有Padini旗下唔同的牌子賣, d價錢非常親民! 個陣好似做緊買一送一的優惠, 就買左兩對鞋,每對MYR$40。 呢對黑色好襯好多。 仲買左條裙,只係MYR$19。 Day22係新加坡買的咳藥水,今日係Day25男友就已經食完, 所以係Caring Pharmacy買左Herbion Linkus Cough Syrup咳藥水,MYR$10.9。 呢度都有Sephora! 但我咩都無買到。 然後我地就call Grab番酒店放低野、休息下先,搭左MYR$7。========================= 晚餐的時候,我地又call Uber去亞羅街 Jalan Alor食野, 搭左MYR$1.67 (扣左優惠,原價係MYR$8.67), 好多人黎呢條亞羅街,搞到塞左好耐先可以落車。 亞羅街兩旁都係街邊檔,好多遊客黎食野。 我地行到亞羅街的街尾, 終於搵到呢間黃亞華小食店, 地址:No.1, 2, 7, 9 Jalan Alor, Off Bukit Bintang, Kuala Lumpur。 佢有好幾個鋪位連住, 所以好快就安排到位比我地坐。 Menu的第一版就列哂d招牌菜, 所以大家識嗌啦! 由於無mark到每碟野食的價錢, 以下的價錢都係上網搵番。 首先叫左碟馬來沙嗲串燒, 最少要嗌10串,有雞肉、牛肉、羊肉揀, 我地叫左5串雞、5串牛,MYR$10。 叫左碟炒通菜,約MYR$14。 叫左碟招牌福建炒,約MYR$10.5。 每人叫左杯吉仔酸梅,入面係有話梅架,MYR$3.5一杯。 黃亞華最出名的燒雞翼, 每份最少要叫2隻, 所以就嗌左2隻燒雞翼,MYR$6.6。 燒魔鬼魚,係按時價&重量計錢, 條魚個味道淡d,但咬落去的質地好鬆化, 同食開的魚的口感唔同,好好食。 5碟野+2杯野飲,總共食左MYR$85,超級抵食。 食完黃亞華想飲野,就黎左呢間野買蔗汁。 買左支檸檬蔗汁,MYR$5。 見到呢間椰子冰淇淋 Aroy Coconut Ice-cream就想試下, 佢係即開椰子即整架。 佢即開一舊細細的椰子, 然後將d椰子肉刮成絲, 跟住就放雪糕入去, 我地仲可以自助落d醬/裝飾試去, 價錢係MYR$11。 仲會送番杯椰子水比你飲添。 然後男友見到呢間我來也 Oloiya就想入去買豬肉乾啦。 佢買左金牌豬肉乾,210g的價錢係MYR$20.8。 d肉乾都係獨立包裝架! 之後我地就call Uber番酒店休息啦, 話說Uber有promo 呢程免費! 旅遊日期:2017年5月14日- 6月10日 ========================= 覺得呢篇blog幫到你, 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/ 收到個blog的最新update! ========================= 其他文章: 《西歐五國星馬畢業遊》 行程篇 (27日景點行程分享,機票資料) Day21 (點係香港機場hea遊4個鐘,新加坡酒店篇,Fragrance Hotel - Crystal) Day22 (新加坡酒店篇,Four Seasons Hotel Singapore,Grandma's新加坡菜,三巡海南雞) Day23 (聖淘沙,3D影相館,4D探險樂園,高速斜坡滑車,空中吊椅,亞洲最南點) Day24 (新加坡,Garden by the Bay,天天海南雞飯,小印度,哈芝巷) Day25 (樟宜機場退稅,馬印航空去吉隆坡,亞羅街,Shangri-La酒店分享) Day26 (Berjaya Times Square室內樂園,雙子塔,新峰肉骨茶) Day27 (吉隆坡影相打卡必去Kuala Lumpur City Gallery,茨廠街,保記沙河粉) Day28 (吉隆坡馬印航空番香港,退稅,吉隆坡Plaza Premium Lounge) 《去新加坡嘆》 去新加坡嘆 之 Day1a (樟宜機場,電話卡,兌錢) 去新加坡嘆 之 Day1b (聖淘沙,環球影城,Vivo City) 去新加坡嘆 之 Day2 (金沙購物中心,ION Orchard,牛車水,Maxwell Food Centre) 去新加坡嘆 之 Day3 (Merlion,牛車水寄明信片,Garden by the Bay,機場shopping) 去新加坡嘆 之 住宿篇 (Marina Bay Sands,無邊際泳池) 去新加坡嘆 之 住宿篇 (Ritz-carlton Millenia) 新加坡新地標 - Jewel 星耀樟宜+全世界機場內最高的瀡滑梯