~今日的行程~ 6月5日:早:亞坤 -> 聖淘沙 Sentosa -> Trick Eye Museum Singapore -> 午:Malaysian Food Street -> Skyline Luge Sentosa -> Southernmost Point of Continental Asia -> 4D Adventureland -> 牛車水 Chinatown -> 晚:Chinatown Food Street 想睇番西歐五國星馬畢業遊的行程,請睇行程篇 (27日景點行程分享,機票資料) 我地今日會去聖淘沙 Sentosa玩! 上次黎聖淘沙去左環球影城,詳情可以睇去新加坡嘆 之 Day1b (聖淘沙,環球影城,Vivo City), 所以我地今次就唔會去啦。 我地首先好似上次咁搭地鐵去Harbourfront 站, 個度有個商場叫做 Vivo City, Vivo City的B2有好多餐廳, 我地特登黎亞坤食早餐,因為我地上次黎新加坡竟然無食到! 地址:B2-26, Vivocity, Singapore 我地就叫左個Set A: Kaya Toast with Butter SGD$4.8, 入面就包左一杯凍奶茶(另加SGD$0.8)、Soft Boiled Eggs 半生熟蛋 (兩隻)& 牛油咖椰多士。 個半生熟蛋係加鼓油&胡椒粉,然後撈均黎食架。 跟餐得一碟Kaya Toast with Butter 牛油咖椰多士唔夠食, 散嗌叫左碟先,SGD$2.4。 價錢已經包左稅,總共食左SGD$8。食左個美味的亞坤早餐之後, 我地就上Vivo City的3樓搭Sentosa Express入聖淘沙! 可以係售票機度買飛啦。 又可以排counter買飛。 張飛每人SGD$4,包左聖淘沙的入場費以及可以無限次搭Sentosa Express。 Sentosa Express有4個站, 原來d站名改左少少, 分別係VivoCity Station -> Resorts World Station -> Imbiah Station -> Beach Station。 我地首先由VivoCity Station搭去Resorts World Station。 ========================= 好多人係Resorts World Station落車都係去環球影城, 而我地就去Trick Eye Museum Singapore,係一個3D影相館黎架, 當時的入場費係SGD$12.5,約HKD$72。 入場的時候會叫你dowload一個TrickEye的app, 用佢個app就可以影到實擬虛境AR的相&片啦, 等我同大家分享部分係Trick Eye影的相啦。 例如相入面的老虎就係AR黎架啦, 用肉眼其實係睇唔到, 要用個app先影到隻老虎架,而隻老虎仲識郁架添。 呢張相上面發光的Art of Love都係用左AR。 呢隻恐龍真係栩栩如生呀, 影出黎的片其實仲會有恐龍的叫聲&音樂聲添。 呢個3D影相館除左主打AR之外, 都會有一d利用左錯視法的作品架。 好岩情侶黎呢度影相呀! 其實呢個Trick Eye Museum Singapore每一個展品的空間唔係好大, 但影出黎的效果好似好大咁。 設計對白:快d黎救我呀~ 黎新加坡都有得玩Skydiving? 呢個畫面唔知點解會諗起成語動畫廊~ 仲會惡搞一d世界名畫, 例如呢張就係惡搞挪威畫家Edvard Munch的《The Scream 吶喊》。 當然唔少得會有新加坡的地標獅身魚尾像啦。 入面有好多展品不能盡錄, 大家部電話要預留d位先好黎影相呀。 ========================= 之後我地去左Universal Studio隔離個food court - Malaysian Food Street食野, 我地上次黎聖淘沙都有去Malaysian Food Street食野。 我地試下呢間檳城林兄弟炒粿條,SGD$8。 炒粿條係香港都會叫做炒貴刁, 但係馬拉的炒粿條係用豉油同辣椒醬黎炒的。 我地仲試左褟記瓦煲雞飯。 我地叫左煲regular size的瓦煲雞飯,SGD$9。 之後我地係八打靈再也土司及飲品度買野飲, 八打靈再也Petaling Jaya其實係馬來西亞的一個城市黎。 我地叫左杯Lime Juice with Plum,佢譯做桔子酸梅汁,SGD$3.5。 個Malaysian Food Street裝修成好似東南亞街邊的模樣咁。========================= 之後我地就搭Sentosa Express去Beach Station, 我地會去Skyline Luge Sentosa! 我地係Klook買左高速斜坡滑車(Luge)&空中吊椅體驗(Skyride), 當時的價錢係HKD$102一個人,包左2次空中吊椅(上山) & 2次斜坡滑車(落山)。 首先要搭空中吊椅(Skyride)上山先, 其實個吊椅都有少少恐怖, 始終隻腳都會伸出黎半天吊, 雖然有安全的措施,但都好驚大力郁會跌左落街呀。 上到山就排隊玩高速斜坡滑車(Luge)啦, 當時條隊勁多人、又曬又焗, 排左半個鐘有多終於有得玩! 上車之後職員會教你點控制架車, 開頭都有d掌握唔到點玩架! 之後會有唔同的路線比你揀, 記得同你的旅伴係排隊個陣諗好揀邊條路線, 廢時揀左唔同路線失散左呀! 玩完一次之後就坐番空中吊椅(Skyride)上山, 然後玩第二次高速斜坡滑車(Luge)係有快隊比你排架, 所以第二次排左10分鐘到就有得玩啦。 呢個斜坡滑車(Luge)都幾有玩Mario的感覺,玩兩次有d唔夠喉。 其實玩完聖淘沙的斜坡滑車(Luge)之後都好後悔係瑞士First無玩到Mountain Cart, 除左唔洗排長龍之外,First個度落山的賽道一定會刺激好多!========================= 玩完覺得好熱,就買左LiHO哩喝的荔枝金萱茶,SGD$3.5。 之後我地就搭Sentosa Beach Tram係Southernmost Point落車。 然後去Palawan Beach, 呢度有個Southernmost Point of Continental Asia,即係亞洲板塊的最南點。 呢張地圖就解釋呢個亞洲板塊最南點的小島係用一條吊橋連接住聖淘沙, 而聖淘沙就有一條橋連接住新加坡大陸, 而新加坡就有一條Singapore-Johore Causeway(新柔長堤)連接住馬來西亞半島同埋亞洲。 然後我地行呢條連接住聖淘沙&亞洲板塊最南點的吊橋啦。 呢條吊橋好有置身森林的感覺! 行完個吊橋,就會見到The Southernmost Point of Continental Asia的標示啦, 其實呢個亞洲板塊最南點的名字只係一個綽頭&吸引遊客, 新加坡、聖淘沙、亞洲板塊最南點都係3個島黎, 並不屬於亞洲板塊上面, 而且甚至乎聖淘沙的Tanjong Beach都比呢個亞洲板塊最南點位於更南的地方。 呢個小島的觀景搭望到的景色。 ========================= 之後我地搭番Sentosa Beach Tram出去Beach Station。 然後搭Sentosa Bus A 去Imbiah Lookout, 我地去Sentosa 4D Adventureland。 我地係Klook買左呢個4D Adventureland 3項設施無限次乘搭,HKD$158一個人。 1. Journey 2: The Mysterious Island The 4-D Experience 係一套約20分鐘的4D電影黎,內容係2012年The Rock主演的電影《地心探險記2:世外秘島》的情節,係個套電影的內容的濃縮版再加上4D的效果,都幾好睇! 2. Extreme Log Ride 係一個4D過山車黎,內容係化身一條樹木係激烈的河流入面歷險,我覺得個內容幾特別,亦都幾刺激。 3. Desperados 係一個4D互動射擊遊戲黎,d座位整到好似馬咁騎上去,然後d座位會搖動,好似騎緊馬咁,然後有支槍比你射擊d壞人。最後會有個計分排行榜,show邊個玩家玩得最勁! 我地去個陣得3個設施only,設施雖然唔新,但都係一個幾好玩的體驗黎! 寫blog的時候發現而家仲多左個Haunted Mine Ride 神秘刺激的礦坑4D列車, 睇落好似幾刺激! 我地玩緊Desperados,d座位整到好似馬咁騎上去,亦都有西部牛仔帽比你拎黎戴添。 呢個Desperados射擊遊戲我地玩左兩次! 玩完個座位會顯示你拎左幾多分。 最後有個排行榜,男友第一次玩拎左第5名,仲會影埋佢玩緊個樣添。 由於個畫面本身係3D,所以用肉眼睇/手機影會濛查查。 我地第二次玩得好少參加者,男友仲勇奪第一名添。 ========================= 玩完4D Adventureland之後,我地去左7仔買下野啦。 由於之前係瑞士買左杯Ben & Jerry's一試難忘, 所以係聖淘沙見到又忍唔住買番杯, 今次試的係Chocolate Chip Cookie Dough,SGD$5.9。 買左呢支全好Allswell牌Water Chestnut & Sugar Cane馬蹄甘蔗水,SGD$2.6。 仲買左呢支Pokka牌的茉莉綠茶,SGD$2.5。 ========================= 之後我地就離開聖淘沙, 搭地鐵去牛車水 ChinaTown, 係新加坡的唐人街。 我地係Chinatown站 Exit G出, 個度有個商場叫做Chinatown Point唐城坊, 一出 Exit G就係唐城坊的B1個層, 我地去個層的Fairprice 超級市場買野! 地址:133 New Bridge Road, #B1-01 Chinatown Point, Singapore 059413 黎新加坡必買的百勝廚叻沙拉麵,SGD$9.95,入面有4包。 連續N年都係The Ramen Rater’s Top Ten Instant Noodles的榜入面, 叻沙味好正,拉麵又好好咬! 之前有個朋友係新加坡買左呢個KOKA牌的星洲叻沙味公仔麵比我地食, 覺得隻味都好正,SGD$2.9,入面都係有4包,但價錢比百勝廚平好多。 我地今次都買左Ice Cool牌的椰子汁 & 烤椰子汁, 個人鐘意烤椰子汁多d,一罐SGD$1.4, 我地買左3罐再減SGD$0.95,平均一罐SGD$1.08。 Dilmah 錫蘭紅茶,SGD$5.25, 入面有成100包,不過唔係獨立包裝。 個陣生理期,所以試左呢個Sofy牌的M巾, 23CM有40塊,SGD$7.4。 之前男友係巴黎買左最右紫色個支AXE香體噴霧/止汗劑, 又係瑞士買左中間綠色個支AXE, 然後係Fairprice見到包裝幾乎一樣,但牌子名叫做LYNX的香體噴霧, 原來LYNX & AXE係同一個牌子黎,只係唔同地方會用唔同的名。 男友買左最左金色個支,SGD$5.35。 去左成個月旅行,洗面膏都用哂, 就買左呢支Loreal的White Perfect Milky Foam,SGD$11.9。 係超市買完野就去唐人街行下, 呢度一街都係賣手信。 之後我地行去Smith Street食晚飯, 佢另一個名叫做Chinatown Food Street, 唐人街食街! 條街左右兩邊係餐廳, 中間係食檔,好似food court咁,買完野食,條街有好多位比你坐。 我地行哂成條街,最後揀左呢間牛車水燒烤大蝦、海鮮。 我地叫左一個Set A,SGD$8, 一個Set B,SGD$12。 其實叫左兩碟都係燒烤野都幾熱氣! 我地去左呢間牛車水美食街 冷熱飲料 鮮果汁。 我地就買左椰青,SGD$4.5,甘蔗水,SGD$7。食完野我地就番酒店啦~ 旅遊日期:2017年5月14日- 6月10日 ========================= 覺得呢篇blog幫到你, 記得like Facebook Page https://www.facebook.com/fatbjai.travel/ follow Instagram: fabjai.tavel https://www.instagram.com/fatbjai.travel/ 收到個blog的最新update! ========================= 其他文章: 《西歐五國星馬畢業遊》 行程篇 (27日景點行程分享,機票資料) Day21 (點係香港機場hea遊4個鐘,新加坡酒店篇,Fragrance Hotel - Crystal) Day22 (新加坡酒店篇,Four Seasons Hotel Singapore,Grandma's新加坡菜,三巡海南雞) Day23 (聖淘沙,3D影相館,4D探險樂園,高速斜坡滑車,空中吊椅,亞洲最南點) Day24 (新加坡,Garden by the Bay,天天海南雞飯,小印度,哈芝巷) Day25 (樟宜機場退稅,馬印航空去吉隆坡,亞羅街,Shangri-La酒店分享) Day26 (Berjaya Times Square室內樂園,雙子塔,新峰肉骨茶) Day27 (吉隆坡影相打卡必去Kuala Lumpur City Gallery,茨廠街,保記沙河粉) Day28 (吉隆坡馬印航空番香港,退稅,吉隆坡Plaza Premium Lounge) 《去新加坡嘆》 去新加坡嘆 之 Day1a (樟宜機場,電話卡,兌錢) 去新加坡嘆 之 Day1b (聖淘沙,環球影城,Vivo City) 去新加坡嘆 之 Day2 (金沙購物中心,ION Orchard,牛車水,Maxwell Food Centre) 去新加坡嘆 之 Day3 (Merlion,牛車水寄明信片,Garden by the Bay,機場shopping) 去新加坡嘆 之 住宿篇 (Marina Bay Sands,無邊際泳池) 去新加坡嘆 之 住宿篇 (Ritz-carlton Millenia) 新加坡新地標 - Jewel 星耀樟宜+全世界機場內最高的瀡滑梯