~今日的行程~5月31日:佛斯特 First -> Bachalpsee湖 -> First Cliff Walk -> 午:First Mountain Restaurant -> First Flyer -> Trottibike-> 晚:Bistro Memory (芝士火鍋)想睇番西歐五國星馬畢業遊的行程,請睇行程篇 (27日景點行程分享,機票資料)係瑞士Grindelwald的第三日,我地會去 Grindelwald 一個好出名的行山地方 - First (佛斯特/費爾斯特),除左行山之外,First仲有好多活動玩架,例如滑翔傘、高空飛索、高卡車、滑板單車。 今日的天氣又好似好好咁,我地一身行山look由酒店行落山,行去First的登山纜車。 每日係Grindelwald都見到呢個景,真係心曠神怡呀。 大約行三個字就黎到搭First登山纜車的地方 - First Railway Valley Station,德文係Talstation Firstbahn。地址:3818 Grindelwald 呢張地圖展示左登山纜車的路線。 我地坐纜車啦。 呢度總共有4個站,包括係Grindelwald -> Bort -> Schreckfeld -> First。通常都會搭纜車去最高個個站First,最後會玩住First Flyer、Mountain Cart、Trottibike落山。 當時買左包含2個活動的Fun Package,我地揀左First Flyer 同埋 Trottibike,纜車 + First Flyer + Trottibike 原價係CHF$128,係呢篇Blog提及過,我地買左Swiss Half Fare Card,買呢個Fun Package都有半價架,最後比左CHF$64。大家可以去呢個網睇下而家的價錢。 係纜車度又可以欣賞艾格峰 Eiger。 纜車下有好多牛牛係度hea緊。 再上高d可以望到Grindelwald小鎮的屋仔。 我地就快上到First啦。========================= 上到黎海拔高度達2166米的First,個天氣好似180度轉變左,呢度烏雲密布,好大薄,而且周圍都滿布積雪。 我地會先去行山,目標係行去Bachalpsee湖,然後行First Cliff Walk,最後玩First Flyer (Flieger係德文黎)。 From Gmail Background Photo好多人黎到First都會行去呢個Bachalpsee湖,Google search呢個湖d相係非常之靚,呢張圖曾經係Gmail的精選的背景主題黎架,綠油油的山包住個湖 ,遠處就係一座座雪山並排住,湖入面係雪山的倒影! 我地出發行去Bachalpsee湖啦,希望個天氣會keep住變好啦! 有人砌左個小雪人,好可愛。 呢度插左支瑞士國旗,等我留個倩影先。 沿途的路都幾易行,但由於地下有積雪,會比較易滑。(見到有人著休閒的涼鞋黎行,真係好佩服!)行到一半的時候,前面一片烏雲,好似圖中咁見唔到遠處的前路,當時男友都想放棄掉頭,我就想堅持行,因為都有唔少人仲行緊,我地無理由放棄啦,我打算如果行到睇唔到路,先至掉頭啦。好好彩之後一直行,d烏雲都keep住同我地維持一段距離,我地都可以順利咁行到去Bachalpsee湖。雖然條路徑總括黎講都幾易行,都係平路為主,有d斜坡,但有一段仔的路,係行山崖邊,只夠一至兩個身位行,個段路幾危險,所以大家都要小心安全呀。 行左一個鐘多d,終於黎到Bachalpsee湖,當時都未溶哂d雪,所以我去到之前估計個湖都仲結緊冰,不出所料,個湖而家係結曬冰架。 未結冰的話,個湖係可以影到呢座施雷克峰Schreckhorn的倒影架,不過雪景又有另一番的靚。 影唔到施雷克峰Schreckhorn的倒影,唯有自拍下啦。 由於湖邊都好多積雪,湖邊溶溶地的雪溝埋d泥土真係好難行,所以行去唔同的位置影相都有d困難,好容易就會跣親,所以都要小心慢慢行呀。 湖邊有間小木屋,但小木屋附近好多人,都無影到相,我地同施雷克峰&Bachalpsee湖影下相就算啦。 影完相,我地就行返原路去纜車站附近啦。 見到有人帶埋隻狗仔黎行山。 佢好興奮咁跟住主人跑。 望住呢堆連綿不斷的冰山行山,疲倦的感覺都無哂。 好有群山在我腳下的感覺。 又行番黎瑞士國旗影相位,而家d雲少左,係度再影張相先。 我係度模仿緊《食神》入面,鵝頭食完爆漿瀨尿牛丸係沙灘跑的一幕,因為呢度實在係太靚,太詩情畫意啦。 見到呢度多人玩滑翔傘,係一排雪山之間玩滑翔傘一定係好正啦。========================= 我地準備行First Cliff Walk,開放時間請睇呢個網。 座橋係圍住個懸崖而建的,離遠望都覺得又長又恐怖。 最恐怖係。。。男友係我附近行,我係feel度條橋會微微咁震下郁下,真係咪話唔驚! 仲要係網狀通窿的底,可以睇到懸崖下面。(畏高的人士會覺得恐怖) 雖然First Cliff Walk咁恐怖,但都要扮下鎮定影張chok相。 然後我地就行到黎呢個由懸崖伸延出45米的觀景台。 係呢度影相真係有d腳震震呀。=========================行完First Cliff Walk,就有間food court形式的餐廳,我地就食個lunch定定驚先。 都係看圖揀菜式。 洋蔥汁香腸併瑞士薯餅 CHF$18.5。 煙燻香腸併薯仔沙律 CHF$15.5。=========================食完午飯抖左陣,我地又要挑戰自己的膽量,去玩First Flyer高空飛索。 This photo of Jungfrau Railways is courtesy of TripAdvisor首先要排隊上呢座懸崖邊的高台,排隊的時候職員會叫你填定張form,張form就係生死狀啦。 上到去坐係個吊椅度,纜好安全帶,然後度閘門打開就即刻飛出去啦。 最高時速達84公里,由First飛去Schreckfeld站。玩之前好驚,但一飛出去就覺得無想像中咁恐怖,仲覺得好爽添!========================= 黎到Schreckfeld站就可以坐Mountain Cart去Bort站,Mountain Cart有d似Mario Cart的車仔咁,我地當時覺得Mountain Cart普普通通,所以個Fun Package剩係買左First Flyer 同埋 Trottibike,跟住,我地會搭纜車去Bort站。(事後我地都後悔無玩到Mountain Cart,因為我地之後去左新加坡Sentosa,個度的Mountain Cart要排長龍玩,而且個賽道又短,又無First呢度揸落車咁正)========================= Trottibike (aka Scooter Bike) 係好似滑板咁的單車,揉合左滑板車同單車的原素,佢好似滑板車咁玩,單腳推動架車後,雙腳踏上滑板上平衡,但又好似單車咁有得煞制架。我地原本以為Trottibike好易玩,點知我地唔係好習慣點樣平衡架車,而且落山的坡度都幾大,我地開頭都踩下停下,推下車行,男友甚至乎想放棄,全程拖住架車行落山。但經過一番的嘗試,掌握到平衡感,拿捏到落斜的技巧,我地終於可以揸到好似單車咁暢順。 呢到好似《飄零燕》咁的一片翠綠的草地,搞到我忍唔住停車影相。 係呢度風景非常靚,一片綠油油的村莊。 呢度好多牛牛呀。 我地踩到番去Grindelwald的First 纜車站交車啦,發覺Trottibike非常好玩,衝落山的感覺好正,真係好想再玩多次呀。分享下我地玩Trottibike的小片段啦!=========================我地之後番酒店換件衫就出去食dinner啦, 餐廳門口。 黎到瑞士緊係要試下芝士火鍋Cheese Fondue啦,我地去左呢間有芝士火鍋食的Bistro Memory,地址:Heller Gastro AG, Dorfstrasse 133, Postfach 92, CH-3818 Grindelwald。 當時的芝士火鍋Menu。 我地叫左碟叫做Memory Swissness的瑞士薯餅, 瑞士薯餅配上瑞士思華力腸、煎蛋、Grindelwald的Mutschli芝士。 主角芝士火鍋,呢個係一人的份量 CHF$26,本身配左Gindelwald的麵包粒、薯仔,我地加左煙肉條CHF$4,所以總共係CHF$30。瑞士芝士火鍋同香港pizza hut食到的好唔同,呢度的芝士火鍋會有濃濃的酒味,原來瑞士傳統的芝士火鍋係會加上白酒架。 麵包粒蘸住濃郁的瑞士芝士真係好正呀。 叫左杯瑞士Interlaken的牌子Rugenbräu啤酒 CHF$4。 叫左杯Eigertee的野飲。 餐廳都可以望到艾格峰Eiger。 食完野我地又行番酒店,散散步。 比我地發現一隻喵星人。 不過佢好cool唔睬人。p.s. 番到酒店發現我隻腳曬左兩截色,以後都唔敢著會露肉的瑜珈褲去行山啦。Day18完~=========================覺得呢篇blog幫到你,記得like Facebook Page https://www.facebook.com/fatbjai.travel/follow Instagram https://www.instagram.com/fatbjai.travel/收到個blog的最新update!=========================《西歐五國星馬畢業遊》行程篇 (27日景點行程分享,機票資料)Day1 (出發去倫敦,維也納轉機驚魂事件,奧地利航空)酒店篇 (英國倫敦Paddington,Castleton Hotel)Day2 (白金漢宮,西敏寺,大笨鐘,Oxford Street,Fish&Chips,柏靈頓)酒店篇 (英國倫敦,Conrad London St. James)Day3 (大英博物館,倫敦塔橋,Harrods,Burger&Lobster,Nandos)Day4 (Bicester Village戰利品分享,itsu英式日本快餐,Five Guys)Day5a (英國巨石陣Stonehenge,世界文化遺產)Day5b (九又四分之三月台,倫敦最好食的葡撻,印度菜)酒店篇 (英國倫敦King's Cross,Crestfield Hotel)Day6 (倫敦去巴黎,羅浮宮,巴黎聖母院,愛情鎖橋)Day7 (凱旋門,聖心堂,香榭大道,巴黎鐵塔下睇夜景)Day8 (Palace of Versailles,係凡爾賽宮嘆下午茶)酒店篇 (法國巴黎,Hotel R de Paris)Day9 (《Inception》電影拍攝場地-比爾阿克姆橋)酒店篇 (睇到巴黎鐵塔的酒店Hôtel La Comtesse)Day10 (巴黎鐵塔,聖路易島的雪糕,Ryanair飛羅馬)酒店篇 (羅馬Ciampino機場,Hotel Palacavicchi)Day11a (搭火車黑仔事件,梵蒂岡,羅馬許願池,萬神殿)Day11b (羅馬鬥獸場,古羅馬廣場,GROM雪糕)酒店篇 (羅馬,Hotel Nord Nuova Roma)Day12 (佛羅倫斯,The Mall,聖母百花大教堂,領主廣場,T-bone牛排)Day13 (佛羅倫斯周邊打卡勝地:比薩斜塔&五漁村)酒店篇 (佛羅倫斯民宿推介,Home Boutique Santa Maria Novella)Day14 (威尼斯,彩色島,聖馬可廣場)酒店篇 (威尼斯,Ca' Pagan Guest House)Day15 (威尼斯不愉快事件,米蘭曲折之旅,米蘭大教堂,艾曼紐二世迴廊)酒店篇 (米蘭,Hilton Milan)Day16 (米蘭去瑞士Grindelwald,瑞士火車pass要點揀?Domodossola退稅分享)酒店篇 (瑞士山區Grindelwald,望到阿爾卑斯山的Hotel Lauberhorn)Day17 (玩轉瑞士少女峰!原來有咁多野好玩!)Day18 (瑞士Grindelwald玩刺激活動/行山的聖地 - 佛斯特 First)Day19 (瑞士Grindelwald享受一日慢活)Day20a (瑞士琉森,卡佩爾木橋,垂死獅子像,蘇黎世)Day20b (蘇黎世機場退稅,瑞士航空,Aspire Lounge)