~今日的行程~5月30日:搭少女峰鐵路去少女峰山坳站 Jungfraujoch -> 少女峰 Jungfrau -> 玩 Sledging & Snow Tubing 雪橇&滑雪胎 -> 午:Restaurant Crystal (望住少女峰食午餐) -> 晚:Coop超級市場想睇番西歐五國星馬畢業遊的行程,請睇行程篇 (27日景點行程分享,機票資料) 今日我地9點半起身係酒店望住艾格峰Eiger食早餐,(酒店review請睇呢篇blog)見今日天氣好似好好,所以決定今日出發去少女峰。 我地首先係Grindelwald 搭溫根阿爾卑斯鐵路去Kleine Scheidegg,然後係Kleine Scheidegg轉搭少女峰鐵路去Jungfraujoch。要去呢個網度買去少女峰的車飛。係呢篇Blog提及過,我地買左Swiss Half Fare Card,所以買火車飛同埋少女峰鐵路的飛都有半價,最後原價CHF$190來回Grindelwald同Jungfraujoch的車飛,半價後只需CHF$95,約HKD$777。 10:47am 我地出發去Kleine Scheidegg啦。呢段火車係屬於溫根阿爾卑斯鐵路 Wengernalp Railway,佢係世界上最長的連續齒軌鐵路 rack railway。 原本以為今日幾好天,抬頭發現d雲好似飄緊去雪山度!!!! 望番山腳下的屋仔,原來我地已經上到咁高啦! 開始見到鐵路旁有積雪。 窗外都係一片零落的雪。 搭左半個鐘,黎到海拔2061米高的Kleine Scheidegg站,我地係呢個站轉乘少女峰鐵路 Jungfrau Railway,去歐洲最高的火車站 - 少女峰山坳 Jungfraujoch。 黎到Kleine Scheidegg,雄偉的阿爾卑斯山已經係你眼前! 11:30am我地上車啦,咁岩有印度的旅遊團,所以成程都好多印度人! 張飛都會mark住你係用左半價架。 阿爾卑斯山d山峰離我地越黎越近! 亦都開始feel到越黎越凍,我都立即著番件厚褸先。 係呢篇blog提及過,少女峰鐵路的隧道段有兩個站,分別係Eigerwand同埋Eismeer,佢地都係興建係艾格峰 Eiger 入面。呢個Eismeer站入面有玻璃觀景窗,架火車都會係呢個站停5分鐘左右,比遊客行去窗度欣賞艾格峰冰河的遼闊視野。 望到呢一片雪山景,真係唔敢想像我地正置身係艾格峰入面。 靚到唔捨得離開,但時間有限,我地跑番去火車啦。 12:05pm 終於黎到全歐洲海拔最高的火車站Top of Europe - 少女峰山坳 Jungfraujoch,海拔3454米高。 上到黎少女峰除左近距離望下d雪山之外,呢度都有好多唔同的野睇&玩架,例如:⇛ Jungfrau Panorama播放少女峰360度的全景圖。⇛ Sphinx Observation Deck搭lift上108米,係觀景台欣賞阿爾卑斯山的景色。⇛ Snow Fun Park有Ski & Snowboard, Tyrolienne (Zipline), Snow tubing, Sledging等的冬季運動玩。*係5月至10月中先至開放,天氣惡劣可能會暫停開放。⇛ Ice Palace攝氏零下3度的冰宮。⇛ Plateau又係一個可以欣賞雪山的戶外平台,有得拎住瑞士國旗影相。⇛ Lindt Swiss Chocolate Heaven賣Lindt瑞士蓮朱古力的商店。=========================我地首先就搭lift上去Sphinx Observation Deck觀景台。 當時攝時0度左右,都凍凍地,但比想像中無咁凍。呢度有塊板介紹望到d咩景色。 面前呢個最近的山峰就係僧侣峰Mönch啦。 而我身後呢座就係少女峰Jungfrau啦。 望住呢一片雪景,諗起我地係法國、意大利仲係炎熱的夏天,隔左幾日就黎到瑞士上雪山,感覺好特別。 呢度都插左支瑞士國旗。 話說呢個觀景台都海拔3571米高,竟然有隻烏鴉(應該係)係度,呢度咁高咁凍,有咩比佢食呢? 影多幾張相我地就離開觀景台啦。=========================之後就去左我最期待的Snow Fun Park!呢度只係5月至10月中先至開放架,如果天氣惡劣的話,都會暫停開放! 一出黎Snow Fun Park,就係一個好空曠的戶外雪地。 最新的價錢表&活動請上呢個網。當時有4種價錢:1. Ski & Snowboard 滑雪 2. Tyrolienne (Zipline) 高空繩索3. Sledging / Snow Tubing 雪橇/滑雪胎4. One Day Pass 一日通行證玩曬以上的活動我地剩係玩左雪橇同埋滑雪胎,CHF$20任玩呢兩個活動,大約係HKD$158 (我覺得係瑞士最抵玩的活動)雪橇&滑雪胎都各玩左3至4次! 我地試左Snow Tubing 滑雪胎先。 Snow Tubing係坐住好似水泡的工具黎滑雪。Snow Tubing望落好似比雪橇低b,,但我覺得佢比雪橇好玩同埋刺激d,因為滑雪胎的滑道長d,而且玩到中途個水泡會自轉,可能最後會倒後滑落山! 滑完落山,就可以搭電梯上番去再玩過!話說當時有印度團黎左Snow Fun Park玩,印度人(特別係女性)唔識搭電梯, 次次搭親都有印度人搞到個電梯卡住左郁唔到!佢地意識唔到係自己令到個電梯郁唔到(佢地個水泡/雪橇卡住左條輸送帶),最後佢地會選擇徒步行上去,我地都懶得出聲解釋,心存不憤咁默默行上去。有次有個鬼佬都燥底左,忍唔住叫d印度人唔好令水泡/雪橇卡住條輸送帶,d印度人都係get唔到,結果都係徒步行番上去。 玩左兩三轉滑雪胎,我地就試下Sledging 雪橇啦。 個雪橇係可以坐兩個人架。 當然一個人坐係最好玩架啦。雪橇條滑度係一條直路,好快就瀡左落去架啦。玩的過程比Snow Tubing快。 玩完個雪橇會鏟左d雪上黎。 Ski & Snowboard 滑雪 除左普遍的滑雪板之外,仲有個好似單車的工具,可以坐住黎滑雪。 Tyrolienne (Zipline) 高空繩索,條索道幾長,但唔係好高。 天氣一時好好,一時就好多雲。=========================之後我地就去左Ice Palace。 Ice Palace顧名思義就係同冰有關的,呢度攝氏零下3度,仲凍過室外呀!我地首先要行一條都幾長的冰造的隧道。 呢條隧道高少少的人都會掂頂呀。 冰雕成的熊。 冰雕成的狗。 黎呢個Ice Palace必影的野!就係電影《冰河世紀 Ice Age》好鍾意橡果的小松鼠Scrat,佢冰封左係粒冰入面,非常搞笑。 呢度都有個Top of Europe的冰雕。 仲有d好矮好窄的冰洞添。 企鵝冰雕。=========================之後我地又出去室外,去左呢個Plateau。 又係一個可以欣賞雪山的戶外平台。 呢度同Sphinx Observation Deck有咩分別呢?就係有得拎住瑞士國旗影相啦,當然影埋背景座雪山就更好啦。 點影個背景都係好多人係度影緊相。=========================可能酒店的早餐食得幾飽下,我地成3點鐘先至食午餐! 我地去左呢個望到少女峰的餐廳 - Restaurant Crystal,地址:3823 Eigergletscher。 男朋友叫左杯Cappuccino 泡沫咖啡 CHF$5。(離開左意大利,早餐以外飲Cappuccino終於唔會受到白眼啦 [想知點解睇呢篇blog啦]) 我就叫左杯Latte Macchiato 鮮奶特濃咖啡 CHF$6。 呢度的代糖竟然係兩粒丸咁的形狀。 少女峰位於瑞士的德語區,所以食的野都好德國feel。Geschnetzeltes Kalbfleisch "Zürcher Art" Rösti und Gemüsegarnitur CHF$40.5,我叫的呢碟係蘇黎世的菜式黎,蘑菇忌廉醬配免治牛仔肉併瑞士薯餅。瑞士薯餅係由薯仔切絲而煎成,最初係伯恩州地區的農民的早餐。而好多瑞士人都認為瑞士薯餅係代表瑞士的國民美食。 Rindsfiletgulasch Stroganoff Rösti und Gemüsegarnitur CHF$42.5,男朋友呢碟係酸奶牛肉併煎薯絲。 雖然出面的天氣唔係好靚,但望住呢個雪景食野真係好唔真實呀。呢間餐廳唔收服務費,總共食左 CHF$94。========================= 食飽飽就行下街,呢度有間 Lindt Swiss Chocolate Heaven,係賣Lindt瑞士蓮朱古力的鋪頭黎。 呢度係少女峰最多人的地方,非常迫,所以影的相都特別手震。 CHF$45可以揀1kg的朱古力 (藍色袋係人地揀左的戰利品)。 呢度除左有香港常見的Lindor朱古力款式之外,仲有呢d好特別的朱古力禮盒, CHF$10.95。 最吸引我就係呢d一排排同一條條好多特別味的朱古力,有caramel brownie, crunchy nougat, strawberry cheesecake, cookies & cream。排裝CHF$2.5,條裝CHF$1.45。呢度的產品種類好齊全,多過超市同機場,價錢仲比超市同機場平!但當時咁多人又迫,好後悔我地無買到野!!!!!我地最後係蘇黎世機場先至買Lindt 貴好多!(蘇黎世機場d免稅店係好貴架!)=========================之後我地就行下d精品店。 少女峰的空氣都有得買?仲要幾舊水港紙!我都係即刻吸多幾啖空氣抵番先。 呢度仲有個日本的郵筒,應該係紀念富士山同少女峰結成姊妹20週年而放置的。=========================我地之後就決定離開呢個冰天雪地啦。 回程搭少女峰鐵路check飛的時候,職員會送粒朱古力比你食。火車上有電視播住少女峰的宣傳片段,突然間傳來一把熟悉的聲音,原來係呀Gem!佢著住一身紅色的服裝係少女峰唱歌, 最估唔到的係佢竟然唱廣東話歌!男朋友話首歌叫Someday I'll Fly (佢曾經係Gem的fans),只能說Gem不愧是宇宙巨Gem!成程歐洲trip,真係第一次聽到人地播的廣東話歌!(原諒我呆左一陣先醒起拍片,未能捕捉宇宙巨Gem的神韻)=========================然後我地就搭番去Grindelwald,係火車站附近的Coop超級市場買叮叮野食番酒店叮黎食。地址: Dorfstrasse 101, 3818 Grindelwald, Switzerland 我地買左3盒Coop超市自家品牌的叮叮野,第一盒係Hackfleischbällchen mit Kartoffelstock 肉丸薯蓉 CHF$6.8。 d肉丸雖然無Ikea個d咁正,但叮叮野黎講都好高質。 Bündner Spätzlipfanne CHF$5.5。瑞士格勞賓登州的菜式 - 炒德國雞蛋麵。 呢種德國雞蛋麵Spätzle的德文意思係小麻雀咁解,係德國南部、奧地利、匈牙利、瑞士都好常見的。 Risotto alla milanese CHF$5.95,米蘭意大利飯,仲有埋包芝士粉!之前米蘭的blog都講解過米蘭意大利飯的故事,大家可以睇番。 當然呢個叮叮飯緊係無我地係米蘭個碟咁好食啦,但配埋芝士粉真係好貼心! 見到琴日間洗衣鋪咁殘舊又多人,我地就買左盒Coop牌的洗衣粉想自己洗衫 CHF$7.95,呢盒已經係超市最細個盒,我地大後日就番香港,一定用唔哂呀。(最後我地幫襯左酒店的洗衫服務,但盒洗衣粉都有用黎洗下d私密的野!) 之前男友係巴黎買左最右紫色個支AXE香體噴霧/止汗劑,用左成個星期,男友都覺得好香,然後而家係Coop又發現到AXE,佢就買左中間綠色個支啦 CHF$4.65,計起上黎比巴黎買個支平左HKD$2。 仲買左盒阿華田的能量棒,一盒有6條 CHF$4.8,好好食呀!係香港見到阿華田的英文都係Ovaltine, 而係瑞士,阿華田會用佢的德文原名Ovomaltine。 話說Coop超市隔離有間Coop的「屈臣氏」,門口放左一個好大的玻璃兜,入面裝住Vichy的試用裝免費任人拎。係香港試用裝通常都係買野/ like facebook&登記個人資料先會送比你,估唔到瑞士係任人拎!Day17完~旅遊日期:2017年5月14日- 6月10日 =========================覺得呢篇blog幫到你,記得like Facebook Page https://www.facebook.com/fatbjai.travel/follow Instagram https://www.instagram.com/fatbjai.travel/收到個blog的最新update!=========================《西歐五國星馬畢業遊》行程篇 (27日景點行程分享,機票資料)Day1 (出發去倫敦,維也納轉機驚魂事件,奧地利航空)酒店篇 (英國倫敦Paddington,Castleton Hotel)Day2 (白金漢宮,西敏寺,大笨鐘,Oxford Street,Fish&Chips,柏靈頓)酒店篇 (英國倫敦,Conrad London St. James)Day3 (大英博物館,倫敦塔橋,Harrods,Burger&Lobster,Nandos)Day4 (Bicester Village戰利品分享,itsu英式日本快餐,Five Guys)Day5a (英國巨石陣Stonehenge,世界文化遺產)Day5b (九又四分之三月台,倫敦最好食的葡撻,印度菜)酒店篇 (英國倫敦King's Cross,Crestfield Hotel)Day6 (倫敦去巴黎,羅浮宮,巴黎聖母院,愛情鎖橋)Day7 (凱旋門,聖心堂,香榭大道,巴黎鐵塔下睇夜景)Day8 (Palace of Versailles,係凡爾賽宮嘆下午茶)酒店篇 (法國巴黎,Hotel R de Paris)Day9 (《Inception》電影拍攝場地-比爾阿克姆橋)酒店篇 (睇到巴黎鐵塔的酒店Hôtel La Comtesse)Day10 (巴黎鐵塔,聖路易島的雪糕,Ryanair飛羅馬)酒店篇 (羅馬Ciampino機場,Hotel Palacavicchi)Day11a (搭火車黑仔事件,梵蒂岡,羅馬許願池,萬神殿)Day11b (羅馬鬥獸場,古羅馬廣場,GROM雪糕)酒店篇 (羅馬,Hotel Nord Nuova Roma)Day12 (佛羅倫斯,The Mall,聖母百花大教堂,領主廣場,T-bone牛排)Day13 (佛羅倫斯周邊打卡勝地:比薩斜塔&五漁村)酒店篇 (佛羅倫斯民宿推介,Home Boutique Santa Maria Novella)Day14 (威尼斯,彩色島,聖馬可廣場)酒店篇 (威尼斯,Ca' Pagan Guest House)Day15 (威尼斯不愉快事件,米蘭曲折之旅,米蘭大教堂,艾曼紐二世迴廊)酒店篇 (米蘭,Hilton Milan)Day16 (米蘭去瑞士Grindelwald,瑞士火車pass要點揀?Domodossola退稅分享)酒店篇 (瑞士山區Grindelwald,望到阿爾卑斯山的Hotel Lauberhorn)Day17 (玩轉瑞士少女峰!原來有咁多野好玩!)Day18 (瑞士Grindelwald玩刺激活動/行山的聖地 - 佛斯特 First)Day19 (瑞士Grindelwald享受一日慢活)Day20a (瑞士琉森,卡佩爾木橋,垂死獅子像,蘇黎世)Day20b (蘇黎世機場退稅,瑞士航空,Aspire Lounge)