睇番西歐五國星馬畢業遊的行程,請睇行程篇 (27日景點行程分享,機票資料) 酒店review我通常係寫完遊記的blog先出的, 但由於間酒店房的景太正, 我不得不介紹左間酒店先呀! 我地係瑞士的4晚都住係Grindelwald呢間Hotel Lauberhorn, 地址:Obere Gletscherstrasse 41, Grindelwald, BE, 3818 Switzerland, 雖然佢距離Grindelwald的中心有段距離, 但由於間房可以近距離望到座阿爾卑斯山, 我地就決定就算間酒店遠d都要book啦! 上篇blog都提及過, 我地到達左Grindelwald火車站之後,就打電話比酒店, 然後就會有車接我地去酒店。 除此之外,可以搭121號巴士到Lauberhorn (車程5分鐘), 或者行25分鐘的山路到酒店。 我建議落山可以揀行路,因為可以欣賞到Grindelwald翠綠的山景, 返酒店上山的話先至搭121號巴士。 酒店送左Grindelwald的巴士pass, 搭巴士係免費架。 Hotel Lauberhorn的外貌。 我地係Expedia book呢間酒店的, 入住日期係29/5-2/6, 房型係Double Room Eiger view with Balcony, 係可以見到阿爾卑斯山脈的艾格峰, 另外,會包自助早餐、Wi-Fi、泊車。 4晚的價錢係CHF$640,(但book個陣Expedia只係收住CHF$20先) 另外,每人每晚都會收取CHF$4.2的稅, 用信用卡比錢又要比CHF$5費用, 所以加加埋埋要比CHF$678.6,總共係HKD$5604.36,即係平均HK$1401.09 一晚。 Reception要上一層, 食早餐的地方都係呢一層架。 呢間酒店唔好睇佢外表係用木造, 其實係有Lift搭架(圖中藍色)。 走廊有書櫃比旅客借閱。 我地間酒店房的門口。 打開門可以話係一眼望哂。 一入門口的左手面係廁所, 打開剩係得馬桶冇洗手盆。 而門口的右手面係淋浴間,竟然冇門只有窗簾! 睡床。 書枱、儲物櫃、洗手盆。 洗手盤放係睡房入面係咪好有趣呢? 感覺酒店好似將沖涼房的馬桶、沖涼企缸、洗手盆分拆係三個唔同地方。 但其實洗手盆放係睡床前面我係幾鐘意的, 因為我係一日經常想洗手的人黎。 洗手盆有張牌寫住「新鮮冰凍的水喉水係最好的解渴飲品,我地的水係直接黎自山上的泉水」, 即係打開水喉就直接可以飲到新鮮的雪山泉水!! 係香港買支天然礦泉水都要十幾蚊, 呢度係免費任飲,仲要係新鮮冰凍的! 間房望到的景色! 眼前呢座雪山就係阿爾卑斯山脈的艾格峰Eiger啦, 原來少女峰鐵路的隧道段興建係艾格峰入面架, 隧道段有兩個站,分別係Eigerwand同埋Eismeer。 窗邊有張長櫈, 放雜物一流呀。 出面有個露台。 有兩張櫈一張枱。 坐係露台度欣賞瑞士的山景真係好寫意。 瑞士而家呢種天氣好舒服。 唔會太凍唔會太熱,坐係露台度好舒適。 西歐的夏天日照好長, 我地可以係露台度一路望住個景、一路享受叮叮晚餐。 如果想同艾格峰影合照就會背光啦。 話說間房有盒Good Night Box 「晚安小盒子」, 去幫助旅客訓個好覺。 (請原諒我手震左) 入面有眼罩、耳塞、數獨、故事書、潤喉糖、朱古力, 張卡都寫上左每件物品的用途!(真係好貼心呀!) 另外,check in的時候都比左張注意事項我地, 特別注意房內&露台係唔可以煮野食, 而且為免影響其他人休息,唔好係晚上10點之後沖涼呀。 ========================= 房價包埋自助早餐, 我地每朝都會落黎食早餐。 餐廳的環境好舒適, 戶外都有位坐, 但朝早咁曬,我地都係揀室內的坐位。 d早餐都係西式。 黎到瑞士,早餐必定會沖杯阿華田, 阿華田其實係源自瑞士的伯恩Bern, 係香港見到阿華田的英文都係Ovaltine, 而係瑞士,阿華田會用佢的德文原名Ovomaltine。 餐廳窗外的景色。 好嘆的早餐景。 ========================= 酒店都有d休憩的空間比旅客坐下。 呢度係酒店的入口位, 有微波爐比人叮野食, 可以坐係度等d野食叮完。 呢度係reception/餐廳個層的休憩位置。 酒店門外都有位置比人relax下。 舒服到唔想離開呀。 仲有d沙袋放係度比人坐上去休息, 但而家咁曬係無人係度架。 ========================= 上篇blog提過我地想洗衫, 但係酒店附近個間洗衫鋪好殘舊,所以我地就放棄左啦。 最後我地就叫酒店幫我地洗, 呢袋衫洗+乾,總共係CHF$10, 同間洗衫鋪的價錢差唔多, 仲唔洗搬d衫去鋪頭度,又唔洗等。 但缺點係收衫的職員收漏左d衫!!! 我當時執衫的時候,發現有條牛仔褲唔見左, 然後去左酒店的洗衣房揾得番條褲。 但可惜我地離開左Grindelwald之後, 先發現我有件冷衫唔見左!!! 唉,當時都傷心左一刻, 所以大家要記低清楚自己拎左咩衫去洗, 洗完之後要數清楚d衫有無少左。 ========================= 上篇blog提過我會係瑞士寄postcard, 我地係Grindelwald火車站間郵局買左d郵票 (寄去香港的郵費係CHF$2), 係酒店寫完postcard之後, 酒店出面就有個郵筒仔比人寄postcard啦! 總括黎講, 呢間酒店係我地成個trip最喜愛的酒店之一, 每日訓醒就見到壯麗的阿爾卑斯山&綠油油的樹林, 簡直係夢寐以求的生活呀。 旅遊日期:2017年5月14日- 6月10日 ========================= 覺得呢篇blog幫到你, 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update! ========================= 《西歐五國星馬畢業遊》 行程篇 (27日景點行程分享,機票資料) Day1 (出發去倫敦,維也納轉機驚魂事件,奧地利航空) 酒店篇 (英國倫敦Paddington,Castleton Hotel) Day2 (白金漢宮,西敏寺,大笨鐘,Oxford Street,Fish&Chips,柏靈頓) 酒店篇 (英國倫敦,Conrad London St. James) Day3 (大英博物館,倫敦塔橋,Harrods,Burger&Lobster,Nandos) Day4 (Bicester Village戰利品分享,itsu英式日本快餐,Five Guys) Day5a (英國巨石陣Stonehenge,世界文化遺產) Day5b (九又四分之三月台,倫敦最好食的葡撻,印度菜) 酒店篇 (英國倫敦King's Cross,Crestfield Hotel) Day6 (倫敦去巴黎,羅浮宮,巴黎聖母院,愛情鎖橋) Day7 (凱旋門,聖心堂,香榭大道,巴黎鐵塔下睇夜景) Day8 (Palace of Versailles,係凡爾賽宮嘆下午茶) 酒店篇 (法國巴黎,Hotel R de Paris) Day9 (《Inception》電影拍攝場地-比爾阿克姆橋) 酒店篇 (睇到巴黎鐵塔的酒店Hôtel La Comtesse) Day10 (巴黎鐵塔,聖路易島的雪糕,Ryanair飛羅馬) 酒店篇 (羅馬Ciampino機場,Hotel Palacavicchi) Day11a (搭火車黑仔事件,梵蒂岡,羅馬許願池,萬神殿) Day11b (羅馬鬥獸場,古羅馬廣場,GROM雪糕) 酒店篇 (羅馬,Hotel Nord Nuova Roma) Day12 (佛羅倫斯,The Mall,聖母百花大教堂,領主廣場,T-bone牛排) Day13 (佛羅倫斯周邊打卡勝地:比薩斜塔&五漁村) 酒店篇 (佛羅倫斯民宿推介,Home Boutique Santa Maria Novella) Day14 (威尼斯,彩色島,聖馬可廣場) 酒店篇 (威尼斯,Ca' Pagan Guest House) Day15 (威尼斯不愉快事件,米蘭曲折之旅,米蘭大教堂,艾曼紐二世迴廊) 酒店篇 (米蘭,Hilton Milan) Day16 (米蘭去瑞士Grindelwald,瑞士火車pass要點揀?Domodossola退稅分享) 酒店篇 (瑞士山區Grindelwald,望到阿爾卑斯山的Hotel Lauberhorn) Day17 (玩轉瑞士少女峰!原來有咁多野好玩!) Day18 (瑞士Grindelwald玩刺激活動/行山的聖地 - 佛斯特 First) Day19 (瑞士Grindelwald享受一日慢活) Day20a (瑞士琉森,卡佩爾木橋,垂死獅子像,蘇黎世) Day20b (蘇黎世機場退稅,瑞士航空,Aspire Lounge)