西歐五國星馬畢業遊 Day15 (威尼斯不愉快事件,米蘭曲折之旅,米蘭大教堂,艾曼紐二世迴廊)

想睇番西歐五國星馬畢業遊的行程,請睇行程篇 (27日景點行程分享,機票資料)

~今日的行程~
5月28日:威尼斯搭火車去米蘭 Milan -> 午:Ristorante Caruso (意大利菜) -> 艾曼紐二世迴廊 Galleria Vittorio Emanuele II -> 米蘭大教堂 Duomo di Milano -> 晚:Cibiamo Pizzeria (外賣pizza) 

我地今日搭8:20am的火車去米蘭,
所以7:15am就要出門口搭水上巴士去Venezia Santa Lucia火車站,
晨咁早條街都無乜人呀。

 

當時要去S. Angelo碼頭先有船出火車站,
Ca’ Pagan酒店行大約5分鐘就會去到,
我地係S. Angelo碼頭搭路線1的水上巴士去Ferrovia碼頭 (約25分鐘)就去到火車站啦。
 
琴日去酒店的時候影得唔清楚呢對巨型的手捉住棟樓,
而家晨咁早,架水上巴士無咩人,所以可以搵個靚位影!
 
黎到火車站啦,仲有少少時間就買番個早餐上火車食先。
我就揀左呢d 叫做focaccia的麵包。 
而男友就揀左呢個法包夾住塊肉&菜。
我呢個focaccia包入面夾左火腿、蕃茄、一種叫埃文達Emmental芝士 €3.6。
男友個法包入面夾住塊火雞&菜 €4.8。
之前我地都係搭italo的火車,今次我地終於搭意大利國鐵Trenitalia
架車係4人對住坐,share一張台,鐘意social識新朋友的你,呢種火車就好岩你啦。
由Venezia Santa Lucia火車站搭8:20am的火車去Milano Centrale火車站落車,預計10:45pm到達,
我地買左Super Economy standard座位,
價錢每人係€19.9
 
—————————————————-
話說我係威尼斯Venezia Santa Lucia火車站遇到件不愉快的事情!
呢個火車站係我地去左咁多個地方最惡劣的,
正常候車月台範圍只係旅客先入到黎,
可能因為呢度進入月台時check飛唔嚴謹 (而且d職員視若無睹),
好多行李黨入左黎月台範圍!
佢地會企係每道火車門附近,
當拎住行李的旅客行近車門,
行李黨就會纏住你,話會幫你搬行李入火車入面,
佢地好明顯唔係職員,非常煩擾!
 
當時有個行李黨成員纏住我地,
我地全程唔理佢,
男友搬行李上車先 我隨後,
呢個人呃人不逐 趁我狼狽地搬行李上車的時候 ,
佢就坐係火車門的樓梯昅我裙底 (我當時著裙)!
我立即拿拿聲搬行李去我地個位,
費時同呢D呃人黨糾纏落去。
所以大家係Venezia Santa Lucia火車站要小心呢D行李黨!
—————————————————-
 
架車開左之後再見唔到d 行李黨,心情都好番d。
無聊的時候男友去左隔離卡買左杯咖啡飲 €1.5。
 
=========================
 
搭左2個半鐘車終於黎到米蘭Milan,
呢個Milano Centrale就係米蘭中央車站,
肉眼望落去個車站好大好靚。
我地今晚會住係Hilton Milan
下篇blog再詳細介紹下啦。
一黎到米蘭,發現佢同之前去的意大利城市:羅馬佛羅倫斯威尼斯都好唔同,
眼前的建築物絕大部分都係現代的建築,
係一個好現代化的城市。
(係羅馬&佛羅倫斯的市區,每行兩步都不難發現一個古建築物!)
 
當日係2017年的5月28號,
香港先岩岩有首間的共享單車公司Gobee.Bike
而米蘭就已經一街都係共享單車BikeMi
BikeMi早係2008年就成立啦,
所以發展得好完善。
 
係米蘭街頭經常會見到呢d單車站,
d單車要泊番係單車站的泊車位先可以解鎖,
所以唔會好似Gobee Bike/Ofo咁搞到一街單車亂咁泊。
 
除此之外,BikeMi有普通單車同電動單車揀,
當然電動單車就好踩d又貴d啦。
 
我地就緊係試下踩米蘭的共享單車啦!
呢度的共享單車一d都唔平,
有一個好處就唔洗比幾舊水的按金,
不過就要比訂閱費啦,有3種plan:一年 €36/ 一星期 €9/ 一日 €4.5,
我地剩係踩一日就比左€4.5啦 (未踩先比幾十蚊呀! ),
除此之外,仲要按你踩左幾耐再收錢。
Tariffe Seggiolino Eng Desk
以普通單車黎講,頭半個鐘係免費,所以你可以瘋狂踩半個鐘泊車,然後解鎖再踩半個鐘都係免費呀。
詳細價錢請睇呢個網啦。
 
話說我地想踩單車去Trattoria Casa Fontana – 23 Risotti餐廳食午餐,
大約係15分鐘的步行距離。
由於我地第一次踩BikeMi 共享單車,研究左好耐先拎到架車,
以下係我地搞左好耐的研究成果。
1. 要download BikeMi 個app,開account,比訂金。
2. 係單車站部機揀單車,然後得30秒去泊車位拎車。(我地唔識拎車成日都過時)
3. 拎車原來係大大力拎部車出黎,唔洗理車上的鎖匙。
 
當時正午12點幾,
曬左3個字先拎到部單車!
成功拎到車之後,
我地踩踩下見到警察封左某d路,
搞到我地踩下停下咁。
我地還車的時候,
又搞左好耐先還到車,
因為我架車泊入去車站 凸出黎的位歪左,
所以搞好耐都泊唔到架車 (事後發現其實好易就移番岩位)。
 
好啦,搞咁耐終於去到Trattoria Casa Fontana – 23 Risotti餐廳,
竟。然。無。開。
我地出發前已經睇左Google明明話開!!!
(應該係因為警察封路所以關門)
我地真係好黑仔。。。。(所謂禍不單行,黑仔的事又點止一兩樣!)
 
由於附近都無乜餐廳,
於是我地就搭地鐵去米蘭大教堂個邊搵野食。
 
我地諗住搭地鐵去Duomo個站,
點知地鐵skip左Duomo個站,
(我地聽唔明意大利文所以唔知點解唔停Duomo個站)
之後我就提議搭番轉頭睇下會點,
點知都係skip左Duomo個站!!
咁我地唯有係Montenapoleone站即刻落車,
肚餓到求其去間餐廳食野。
 
一出地鐵就見到呢間Ristorante Caruso
就入左去醫肚先,
事後發現佢係間酒店Grand Hotel et de Milan入面的餐廳黎。
地址:Piazzetta Croce Rossa, 20121 Milan, Italy。
間餐廳的佈置都好舒服,
好適合hea下傾下計,
我地每人叫左杯Prosecco氣泡酒sparkling wine  €6 杯,
仲開左支Valverde水 €5.5。
 
話說個陣咁岩有個朋友都係米蘭,
佢同我講原來米蘭大教堂個邊有單車比賽,
仲提我教堂個度會超級多人!
(終於明點解地鐵會飛站啦!)

咁都比我地係米蘭遇著單車比賽封路封地鐵站,真係黑仔。

由於好似好多日都無食菜,
我就加左沙律吧 €18.5。
餐廳送左每人一塊pizza仔做開胃菜。
仲有唔少得的一籃子麵包啦。
奔波左成朝,終於好好地坐低食下野,
填補心中的不憤。
Risotto Milano €18.5。
黎米蘭一定要試米蘭意大利飯
佢特別在於d飯係煮到黃色咁,
而點解會係黃色呢?其實有好多唔同的故事版本,
其中一個係:一位米蘭大教堂的工人有日同老闆鬧交,
於是個工人就係老闆的婚禮,特登係d米度加番紅花Saffron,然後煮成黃色的飯,
點知煮出黎的意大利飯又竟然好好食,
之後佢地就繼續用呢個方法煮意大利飯啦。
Risotto Asparagi €18.5,
呢個係露筍意大利飯,
露筍係一個好常見的意大利飯配搭。
最後餐廳又送左d飯後曲奇比我地食。
 
另外,每人會收取€3 開枱費,
今餐總共食左€79.5。
 
食完野我地向住米蘭大教堂的方向進發啦,
我地都開始見到單車比賽的賽道。
賽道兩旁有好多人圍觀。
話說由於條馬路變左做單車賽道,
想過對面街係唔容易的!
去度米蘭大教堂附近越黎越多人,
明明米蘭大教堂就係我地面前,
但因為單車比賽,
我地唔可以直接過去米蘭大教堂。
所謂遠在天邊,近在眼前,
我地離遠影下個教堂先。
於是乎就行下艾曼紐二世迴廊Galleria Vittorio Emanuele II先,
佢個名係用黎紀念意大利第一個國王 – 艾曼紐二世
佢係意大利最古老而且仲賣緊野的商店街黎架。
好多人都會黎到呢個迴廊的中央位置影相,
呢度多人影相,我點影都影唔曬成個地下,
所以自拍算啦。
係呢度望番上個玻璃圓頂又係好靚。 
呢個迴廊的設計都非常精緻。
 
 
琴日朝早我地係佛羅倫斯見到呢間連鎖的Venchi雪糕店,
但無食到,而家熱辣辣緊係買番支試下,
但係好細支呀,要成€5.5。
 
由於我地唔可以直接行去米蘭大教堂,
於是我地就要兜大圈先去到啦。
終於近距離見到米蘭大教堂 Duomo di Milano
佢係意大利最大的教堂,亦都係世界第四大教堂。
由1386年開始建興,1965年建成,總共用左六個世紀去起呢個教堂,
所以佢的包建築風格含左哥德式、新古典式&新哥德式。
 
然後我地係附近周圍行下,
見到呢個聖嘉祿堂San Carlo al Corso都幾特別就影低啦。
Sephora幫朋友&自己買左呢支Giorgio Armani Power Fabric 粉底液,€47.9。
當時大約係HKD$411,香港個陣係賣緊HKD$510,平左成舊水呀。
仲幫朋友買左呢支Make Up For Ever Step 1 Skin Equalizer 妝前乳,€37.5。
大約等於HKD$322,香港個陣係賣緊HKD$370,平左$48呀。
 
之後我地番酒店個Lounge食下野,
酒店樓下成日都有電車經過,如果有多d時間都想坐下呢d電車遊覽下米蘭呀。
呢架電車比較現代d。
 
之後我地去左Milano Centrale火車站的超級市場Sapori & Dintorni Conad買下野。
地址:Piazza Duca d’Aosta, 20124 Milano MI, Italy。
買左4盒Beretta牌的Salamini迷你莎樂美腸,
一盒可以分兩份架,
都幾juicy好好食,1盒 €1.99。
 
http://www.notcot.com/archives/2012/09/pocket-espresso-to-go.php
http://www.msadventuresinitaly.com/blog/2009/06/10/introducing-ferrero-pocket-espresso-to-go-the-summer-pocket-coffee/
買左7盒金沙個牌子Ferrero出的Pocket Expresso to Go,
佢1盒有3粒Expresso咖啡,€2.69。
細細粒,插個飲管仔就可以即刻當咖啡飲啦,
口感係杰身,類似溶左的朱古力咁,
我地就覺得個味道&口感麻麻地啦。
 
意大利好出名的牙膏牌子Marvis,
呢隻紫色包裝係Jasmin Mint 茉莉花薄菏味,
好清新。
呢隻係Amarelli Licorice 黑色甘草薄菏味,
呢個牌子的牙膏都好杰身,
唔會咁易係牙刷度跌落街。
一支要€4.99,約HKD$43,
前排發現香港colourmix只係賣HKD$32!
 
 
跟住我地係火車站類似food court的Cibiamo Pizzeria買d pizza返酒店食。
地址:Piazza Duca D’aosta | 2 Piano, Edificio Stazione Centrale, Stazione Centrale, 20125 Milan, Italy
我地都唔記得叫左咩pizza啦。

仲買左呢個圓錐體咁的粉團。
總共只係食左€9.5。

聽朝我地就出發去瑞士啦!

旅遊日期:2017年5月14日- 6月10日

=========================

覺得呢篇blog幫到你,
記得like Facebook Page  https://www.facebook.com/fatbjai.travel/
follow Instagram https://www.instagram.com/fatbjai.travel/
收到個blog的最新update!

=========================

《西歐五國星馬畢業遊》
行程篇 (27日景點行程分享,機票資料)
Day1 (出發去倫敦,維也納轉機驚魂事件,奧地利航空)
酒店篇 (英國倫敦Paddington,Castleton Hotel)
Day2 (白金漢宮,西敏寺,大笨鐘,Oxford Street,Fish&Chips,柏靈頓)
酒店篇 (英國倫敦,Conrad London St. James)
Day3 (大英博物館,倫敦塔橋,Harrods,Burger&Lobster,Nandos)
Day4 (Bicester Village戰利品分享,itsu英式日本快餐,Five Guys)
Day5a (英國巨石陣Stonehenge,世界文化遺產)
Day5b (九又四分之三月台,倫敦最好食的葡撻,印度菜)
酒店篇 (英國倫敦King’s Cross,Crestfield Hotel)

Day6 (倫敦去巴黎,羅浮宮,巴黎聖母院,愛情鎖橋)
Day7 (凱旋門,聖心堂,香榭大道,巴黎鐵塔下睇夜景)Day8 (Palace of Versailles,係凡爾賽宮嘆下午茶)
酒店篇 (法國巴黎,Hotel R de Paris)
Day9 (《Inception》電影拍攝場地-比爾阿克姆橋)
酒店篇 (睇到巴黎鐵塔的酒店Hôtel La Comtesse)
Day10 (巴黎鐵塔,聖路易島的雪糕,Ryanair飛羅馬)

酒店篇 (羅馬Ciampino機場,Hotel Palacavicchi)
Day11a (搭火車黑仔事件,梵蒂岡,羅馬許願池,萬神殿)
Day11b (羅馬鬥獸場,古羅馬廣場,GROM雪糕)
酒店篇 (羅馬,Hotel Nord Nuova Roma)

Day12 (佛羅倫斯,The Mall,聖母百花大教堂,領主廣場,T-bone牛排)
Day13 (佛羅倫斯周邊打卡勝地:比薩斜塔&五漁村)
酒店篇 (佛羅倫斯民宿推介,Home Boutique Santa Maria Novella)

Day14 (威尼斯,彩色島,聖馬可廣場)
酒店篇 (威尼斯,Ca’ Pagan Guest House)

Day15 (威尼斯不愉快事件,米蘭曲折之旅,米蘭大教堂,艾曼紐二世迴廊)

This entry was posted in 意大利 and tagged , , , , , , , , , . Bookmark the permalink.