想睇番西歐五國星馬畢業遊的行程,請睇行程篇 (27日景點行程分享,機票資料) ~今日的行程~ 5月24日:梵蒂岡 Vatican City -> 羅馬許願池 Trevi Fountain -> 午:Pizza in Trevi -> 萬神殿 Pantheon -> 羅馬鬥獸場 Colosseum -> Roma Termini火車站行下 -> 晚:Gran Caffe' Del Passeggero 上回講到我地搭Ryanair航空飛去羅馬的Ciampino Airport, 係機場附近的Hotel Palacavicchi住左一晚之後, 我地朝早係酒店食個早餐就搭酒店shuttle去Ciampino火車站, 然後搭火車去羅馬市區Roma Termini火車站。 黑仔的事情將要發生啦!!!! 我地去到Ciampino火車站已經10:00am, 去到岩岩走左架火車, 下一班去Roma Termini火車站要等9個字! 我地唯有係火車站等下啦.... 到左10:45am,火車都仲未見影, 10分鐘之後,終於有架火車駛入黎, 我地上左車之後搵左個靚位, 呢個時候廣播就叫乘客落車, 我地呢架火車係位於1號月台, 廣播就叫車上的乘客轉搭4號月台的火車, 而呢個火車站只係得樓梯, 去其他月台都要拎住d行李落樓梯再上樓梯! 去到4號月台之後, 架車已經full哂 插針都插唔入, 成大班人係4號月台唔知點算好的時候, 有個車長叫人過去1號月台搭車, 然後成班人就狗衝番去1號月台(又要拖gip上上落落樓梯), 我地去到1號月台的時候架火車竟然開走左!!!!!!! 心諗....係咪玩我地呀? ! 之後我地google睇到下班火車係4號月台開, 於是我地番去4號月台等(我地究竟行左幾多次,搬到手都痛) 最後架車竟然係係2號月台出現!!!!! (足足搬左4轉!原本係1號月台->4號月台->1號月台->4號月台->2號月台) 終於上到架成功開出的火車,真係謝天謝地! 最初架火車係10:43am準時開出的話, 預計10:59am就可以到達Roma Termini火車站, 大約可以係11:15am前到達我地今晚住的Nord Nuova Roma酒店, 可惜我地最後遲左一個鐘,12:15am先到達酒店。 我地放低行李係酒店就拿拿聲出發啦, 羅馬的地鐵都係興買一程搭一程嘅, 單程飛均一價都係€1.5。 (係售票機買飛個陣,D乞丐會捕住你乞錢,大家小心財物啊!) 我地首先出發去另一個國家, 就係世界上最細的國家,亦位於意大利入面的國中國 -梵蒂岡! 我地由Termini站搭地鐵去Ottaviano站。 ========================= 落左車之後沿住藍色點點就會去到梵蒂岡的入口。 由於時間的關係我地好可惜地無機會去梵蒂岡博物館Vatican Museums, 我地將來再有機會黎梵蒂岡先參觀啦! 大家見到圖中馬路對面D城牆圍住的就係梵蒂岡啦, 可以見到聖伯多祿大教堂St. Peter's Basilica的圓尖頂。 行左10分鐘, 終於入到黎梵蒂岡, 呢度就係聖伯多祿廣場St. Peter's Square啦。 原本我地放棄去梵蒂岡博物館,諗住入去聖伯多祿大教堂參觀, 點知非常多人, 太陽仲非常猛烈, 於是我地就放棄入去啦。 我地只好離遠望下聖伯多祿大教堂啦。 聖伯多祿大教堂其實係世界上最大的教堂黎架。 然後我地見到呢度有個流動郵局, 梵蒂岡寄明信片去亞洲郵費竟然要€2.3, (巴黎寄明信片去亞洲只係€1.3炸), 於是我地自己寄postcard比自己算啦, 明信片每張€0.5,價錢反而合理。 呢度竟然教人點寫明信片。 流動郵局外就有個郵筒比人寄信, 梵蒂岡的郵筒係黃色架! 我地無咁多時間排博物館&教堂, 就只好周圍行下影下相啦。 再黎多張聖伯多祿廣場! 發現旅客服務中心外的郵筒更加靚。 我地行近聖伯多祿大教堂影下相。 著住橙藍色衫的就係瑞士近衛隊Pontifical Swiss Guard, 好多人會特登黎影瑞士近衛隊, 其實佢地係負責教宗的人身安全,但係唔屬於梵蒂岡的軍隊。 影多張聖伯多祿大教堂,我地就離開梵蒂岡啦。 ========================= 我地離開梵蒂岡, 沿路上好多餐廳&手信的店, 我地係間QP Pascucci餐廳買左支gelato €4, 即係義式雪糕,特別之處係d雪糕所含有的空氣比普通雪糕低, 所以雪糕的密度會較高。 我地就去番Ottaviano站搭地鐵去Barberini站, 然後沿住藍色點點去羅馬許願池 Trevi Fountain。 沿路欣賞下羅馬的建築, 鮮色的牆+木窗框,好有度假的感覺。 終於行到黎羅馬許願池 Trevi Fountain, 中文亦都譯為特里維噴泉/特雷維噴泉, 係唔少經典電影的拍攝地點,例如La Dolce Vita (1960), Three Coins in the Fountain (1954)& Roman Holiday (1953)。 羅馬許願池個area其實唔大, 但勁多遊客係度影相, 當時好曬,好辛苦黎到池邊搵到個有利位置, 池水好冰涼呀, 最後我地用左€0.03掉落許願池度許願添。 當時都接近3點, 我地係羅馬許願池附近的Pizza in Trevi餐廳買左塊Pizza al taglio, Pizza al taglio係源自羅馬,係指D pizza切成一塊塊長方型咁黎賣, 通常都會磅一磅個重量,斷kg咁賣,比人外賣食的。 我地買左塊Pizza Amatriciana with Bacon Onion and Black Pepper €6.5, Amatriciana係一種來自意大利Amatrice鎮的傳統的醬。 地址:Fontana di Trevi, Via di San Vincenzo, 30-30A, Rome, Italy 行行下見到個好華麗的建築物, Google發現佢叫做維托里亞諾Altare della Patria,英文係Altar of the Fatherland, 係用黎紀念統一義大利的第一位國王Victor Emmanuel II 維托里奧·埃馬努埃萊二世。 我地去左Carrefour家樂福超級市場買左支檸檬可樂, 價值€1.03,可樂的物價係貴過香港呀。 之後我地就行到黎萬神殿 Pantheon, 係免費入場, 佢係126年建造, 係古羅馬時期的宗教建築,而家係一座教堂。 (萬神殿前面有人cosplay成古羅馬人,聽講同佢地影完相,會問你拎錢架!) 萬神殿由於接近一千九百年的歷史, 無我地去過的教堂咁富麗堂皇, 感覺比其他教堂顯得暗啞失色。 萬神廟的穹頂,個個都比呢個穹頂吸引住。 萬神殿內都有好多畫、雕塑, 入面唔係好大,好快就睇完。 萬神殿門口有個噴泉,叫做Fontana del Pantheon。 羅馬市區真係周圍都咁多人呀。 我地下篇繼續Day11的羅馬精華遊~ 旅遊日期:2017年5月14日- 6月10日 ========================= 覺得呢篇blog幫到你, 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update! ========================= 《西歐五國星馬畢業遊》 行程篇 (27日景點行程分享,機票資料) Day1 (出發去倫敦,維也納轉機驚魂事件,奧地利航空) 酒店篇 (英國倫敦Paddington,Castleton Hotel) Day2 (白金漢宮,西敏寺,大笨鐘,Oxford Street,Fish&Chips,柏靈頓) 酒店篇 (英國倫敦,Conrad London St. James) Day3 (大英博物館,倫敦塔橋,Harrods,Burger&Lobster,Nandos) Day4 (Bicester Village戰利品分享,itsu英式日本快餐,Five Guys) Day5a (英國巨石陣Stonehenge,世界文化遺產) Day5b (九又四分之三月台,倫敦最好食的葡撻,印度菜) 酒店篇 (英國倫敦King's Cross,Crestfield Hotel) Day6 (倫敦去巴黎,羅浮宮,巴黎聖母院,愛情鎖橋) Day7 (凱旋門,聖心堂,香榭大道,巴黎鐵塔下睇夜景) Day8 (Palace of Versailles,係凡爾賽宮嘆下午茶) 酒店篇 (法國巴黎,Hotel R de Paris) Day9 (《Inception》電影拍攝場地-比爾阿克姆橋) 酒店篇 (睇到巴黎鐵塔的酒店Hôtel La Comtesse) Day10 (巴黎鐵塔,聖路易島的雪糕,Ryanair飛羅馬) 酒店篇 (羅馬Ciampino機場,Hotel Palacavicchi) Day11a (搭火車黑仔事件,梵蒂岡,羅馬許願池,萬神殿) Day11b (羅馬鬥獸場,古羅馬廣場,GROM雪糕) 酒店篇 (羅馬,Hotel Nord Nuova Roma) Day12 (佛羅倫斯,The Mall,聖母百花大教堂,領主廣場,T-bone牛排) Day13 (佛羅倫斯周邊打卡勝地:比薩斜塔&五漁村) 酒店篇 (佛羅倫斯民宿推介,Home Boutique Santa Maria Novella) Day14 (威尼斯,彩色島,聖馬可廣場) 酒店篇 (威尼斯,Ca' Pagan Guest House) Day15 (威尼斯不愉快事件,米蘭曲折之旅,米蘭大教堂,艾曼紐二世迴廊) 酒店篇 (米蘭,Hilton Milan) Day16 (米蘭去瑞士Grindelwald,瑞士火車pass要點揀?Domodossola退稅分享) 酒店篇 (瑞士山區Grindelwald,望到阿爾卑斯山的Hotel Lauberhorn) Day17 (玩轉瑞士少女峰!原來有咁多野好玩!) Day18 (瑞士Grindelwald玩刺激活動/行山的聖地 - 佛斯特 First) Day19 (瑞士Grindelwald享受一日慢活) Day20a (瑞士琉森,卡佩爾木橋,垂死獅子像,蘇黎世) Day20b (蘇黎世機場退稅,瑞士航空,Aspire Lounge)