去首爾玩 Day3 (江村鐵道單車,南怡島,陳玉華一隻雞)


~今日的行程~
1月1日:江村玩鐵道單車 -> 南怡島 ->  午:南怡島掃街 -> 晚:陳玉華老奶奶元祖一隻雞

今日我地會去江村玩鐵道單車,
同埋去南怡島

我地係Klook book左江村鐵道自行車體驗
2人座當時的價錢係$207,
扣左優惠碼&積分,比左$186.1。我地首先搭地鐵去金裕貞站,
然後係1號出口步行4分鐘就到達Rail Park

再行遠少少就黎到售票處換飛啦。

當時凍到影相都out focus添。

呢度有d小食檔,
由於上一場仲未玩完,
我地就食少少野先啦。
我地係呢檔買左d野食。
買左呢個芝士熱狗+一杯檸檬可樂,₩6500。
芝士條,₩3000。
食完野,我地就去集合啦。
工作人員就講解點樣玩&有咩要注意。
上車後,工作人員都好樂意幫你影相。
我地終於出發啦,
記得同前面架車保持適當的距離,
唔係就撞車架啦。
沿路的風景都好靚,
加埋d雪景,真係幾浪漫架,
不過呢度郊外真係好鬼凍呀。
見到河邊有塊情侶的剪影嗎?
途中會經過幾個山洞,
入面會有浪漫的燈光,
播放住抒情的韓文歌。
十分推薦大家冬天黎呢度。
最後呢個山洞的燈光好似去左夜場咁,
仲播放住Psy的Gentleman同埋Gangnam Style,
我地都變到好high呀。
6km的鐵道單車就玩完啦,
然後就轉坐小火車離開啦。

我地頭先搭的小火車啦。
搭完小火車後,
再轉坐一架shuttle bus返金裕貞站。

金裕貞站的設計好靚,
原來係一座韓屋黎架。
凍到傻左,係自動售賣機買左罐熱朱古力飲,₩700。
之後我地就搭地鐵去加平站。
=========================

去到加平站,我地就搭的士去加平碼頭,搭左₩4000。
我地出發坐船去南怡島啦,
呢個島發展成一個「小國家」,稱為「南怡島共和國 Naminara Republic」,
仲設計左護照、貨幣、郵票等等添,
連碼頭的入口都叫做入境Immigration!
南怡島的入場費係₩13,000,
費用已包括船費。
2001年的韓國電視劇《冬季戀歌》係南怡島取景後,
呢度就變左一個景遊熱點啦。

呢度掛上左一連串的白燈,
吸引左好多人係度影相。
呢度仲掛左好多唔同國家的旗幟,
比我地發現到有香港的旗呀。
當時係3點半,
個天開始日落啦。

南怡島竟然有鴕鳥。

佢地個樣都好可愛!
我地然後行去少人d的湖邊影相。
呢度一片雪景,好浪漫呢。
當時接近4點,
我地仲未食午餐,
南怡島上好多小食攤檔,
於是我地就掃街啦。

 呢條腸 ₩2500,無咩特別,普通腸仔咁。

然後見到呢檔有好似關東煮的魚蛋賣。
我地買左一串,₩2000,
食完d魚蛋,有暖暖的湯飲,好正,
魚腐最好食。
呢度的餐廳的設計都好古色古香。
我地比呢間的魚糕棒吸引左,₩3000。
接住落黎就去左呢間買小食。
我地買左最上個個年糕條。
 

₩2000一條,普通無乜味。

發現呢度有好多赤裸裸的雕塑。

難道以前南怡島上的居民係唔著衫?

還有一個媽媽為孩子哺乳的巨型石像。

呢度無掛白色的燈,
但係兩旁筆直的樹,
都好適合影相呀。

結哂冰的湖。
影完相,男友又想食野啦。
呢個叫做호떡Hotteok的韓國糖餅,₩1500,
係韓國好受歡迎的街頭小食黎架,
我地揀左紅豆餡,好好味,
男友覺得係所有小食之中最正。
呢度有孔雀呀。
頭先都提及過,
南怡島設計左佢地的護照、貨幣、郵票,
南怡島的貨幣真係可以係島上使用架,
郵票都真係可以用黎寄野。
而護照就分為三種:

  • Blue Passport:一年內無限次免費入南怡島共和國
  • Dual Passport:一年內無限次免費入南怡島共和國&位於濟洲的探羅羅共和國 (Tamnara Republic)
  • Gold Passport:文化藝術貢獻者先擁有的護照

我買左一張南怡島共和國的郵票留念,₩3000。

=========================

離開左南怡島後,
我地就返東大門食晚飯,
今晚就黎左陳玉華老奶奶元祖一隻雞 (진옥화할매원조닭한마리)。
地址:18 Jong-ro 40ga-gil, Jongno 5(o).6(yuk)ga-dong, Jongno-gu, Seoul
韓文地址:서울특별시 종로구 종로40가길 18 (종로5가) 
侍應會幫你將d雞剪成一舊舊,
d雞都幾嫩幼,除左雞胸就鞋d。
呢間陳玉華一隻雞係遊客必黎的餐廳,
座無虛席,坐得好迫。
唔少得有泡菜做伴碟小食。
我地加左年糕,
口感煙軔得黎又幾淋,好好味。

食完d雞之後,就可以加飯落去,
變成湯飯,但係好咸呀。
調味料有醬油、白醋、芥末。
仲有好香唔太辣的辣醬,
男友覺得d雞加左呢d調味料都好正。
=========================
食到咁咸就買番罐野飲啦。
呢罐식혜,中文叫做食醯,₩800,
係韓國好受歡迎的傳統凍飲,
佢係將白米或者糯米蒸熟,然後加入麥芽酵母水黎發酵而製成。
我覺得佢好甜,
入面有d浸淋左的米粒,咬唔開的。

我地今晚打算買燒酒番酒店飲,
7仔有好多唔同的牌子,
我地揀左fresh個款,希望無咁濃,₩1660。

仲買左呢支好可愛的蕉奶,₩1300。
飲住燒酒食琴日買的士多啤梨,
雖然呢個燒酒寫住fresh,但都仲係好濃,
好彩d士多啤梨又甜又多汁姐。

旅遊日期:2017年12月30日- 2018年1月3日

=========================

覺得呢篇blog幫到你,
記得like Facebook Page  https://www.facebook.com/fatbjai.travel/
follow Instagram: fabjai.tavel
https://www.instagram.com/fatbjai.travel/
收到個blog的最新update!
Posted in 南韓 | Tagged , , , , , , , | Leave a comment

越南 網上簽證e-Visa申請分享 (內附注意事項)

 

話說7月1有三日假期,
我地去左快閃3日河內
係今年的2月越南就推出左網上簽證(e-Visa)俾香港特區護照用,
唔使好似上次去胡志明市咁要搵網上Agent幫手搞落地簽證喇!

注1:BNO係無得申請網上簽證(e-Visa),要搵網上Agent幫手搞落地簽證。
注2:如果你去富國島(Phu Quoc Island),係免旅遊簽證架。

入到去就會見到呢個畫面,
大致上都唔使理,
tick一tick個格仔,然後禁Next就得。
(接圖放大)
黎到呢個畫面就要填你既個人資料同埋旅行資料。
特別要留意既係Full Name,係先填名後填姓
即係你姓陳叫大文就要填Tai Man Chan,
唔好跟左佢護照Sample講既填法呀!
禁完Review會出呢個Dialog,最好Cap低!
確認所有資料正確就禁Payment。
黎到呢步就拎出你既信用卡準備俾錢。
輸入你既信用卡資料。
 
留意番越南用信用卡俾錢係要收手續費既,
所以佢會收USD$0.96 (VND$22,465)手續費。
俾完錢發現佢係以越南盾過數既,
所以最後佢係收左我VND$605,965 (等於HKD$207.05)。
俾完錢出呢句”Successful payment!”就成功啦,
咁就要去email check下。
收到呢個email就即係成功俾錢,
好心急既話就可以用個Registration code去https://evisa.xuatnhapcanh.gov.vn/tra-cuu-thi-thuc check下status。
直到收到呢個email就表示你既e-Visa應該準備好啦!
https://evisa.xuatnhapcanh.gov.vn/tra-cuu-thi-thuc 呢度就可以download e-Visa。
入到去填返上次收到既Registration code同你d資料。

跟住禁個綠色箭咀就download到架啦,
記得旅行要print出黎呀,黑白或彩色打印都可以架。

當時我地係6月2號凌晨1點整既,
我既e-Visa就係6月6號下午3點半發出,
而男友既e-Visa就係6月8號夜晚7點發出,
都相差成兩日多d!話說男友張e-Visa既full name係先填名後填姓,例如Tai Man Chan,
佢申請完之後就叫我試下先填姓後填名,例如Chan Tai Man。

我地當日係搭越南航空 Vietnam Airlines
地勤會叫你出示e-Visa黎睇,
而我個張係先填姓後填名,例如Chan Tai Man咁,
地勤就話正確係要填Tai Man Chan,
於是佢就打比越南航空問下比唔比我上機,
過左幾分鐘後,越南航空的回覆係可以上機,
但佢地唔擔保河內機場的入境處職員比唔比你入境。

去到河內的時候,
入境的過程都好順利,
可以話係虛驚一場,
但大家記得申請e-Visa的時候,最好都要先填名後填姓,例如Tai Man Chan。


=========================

覺得呢篇blog幫到你,
記得like Facebook Page  https://www.facebook.com/fatbjai.travel/
follow Instagram: fabjai.tavel
https://www.instagram.com/fatbjai.travel/
收到個blog的最新update!
=========================
Posted in 越南 | Tagged , , , , , , , , | Leave a comment

去首爾玩 Day2 (建大Common Ground,梨大火飯,馬場洞食韓牛,樂天世界塔倒數)


~今日的行程~
12月31日:東大門設計廣場DDP -> 建大貨櫃 Common Ground -> 早:로봇김밥 (紫菜飯卷) -> 馬場洞家畜產品市場 -> 午:韓牛燒肉 -> 梨花女子大學 -> 晚:火飯 -> 樂天世界塔下倒數

我地住的酒店KY-Heritage Hotel隔離就係東大門設計廣場DDP
佢係2014年建成,
由著名的伊拉克裔英國建築師Zaha Hadid設計。
(好多人打卡的香港理工大學創新樓V Core都係Zaha Hadid設計架!)
仲有一個好巨型的人像係度添。
當時凍到個地下都結冰呀。=========================

之後我地就搭地鐵去建大站,
呢度有個文青打卡勝地Common Ground,又稱為建大貨櫃
Common Ground除左打卡之外,
其實係一個文青商場,
入面都係賣一D潮流服飾。
當時仲掛左個白色聖誕樹係度,好靚呀。
好多女仔都係貨櫃前面影相。
而我就搵到D紅色的貨櫃影相。

另一個角度的Common Ground
呢個位係最多人影相架。=========================

我地係Common Ground附近搵野食,
黎左圖入面右手面個間連鎖店로봇김밥
意思係Robot Gimbab,即係機械人韓式紫菜飯卷咁解。
地址:68 Dongil-ro 20-gil, Jayang 4(sa)-dong, Gwangjin-gu, Seoul
韓文地址:서울특별시 광진구 자양4동 동일로20길 68
店入面的畫都用左韓文去畫,
好特別呀。

呢間店的紫菜飯卷標榜使用100%玄米、無添加、低脂、低鹽、使用韓國的肉類&泡菜。
左面係阿拉斯加芝士紫菜飯卷,₩4,500,
濃郁的芝士好正,
右面係煙熏雞胸肉沙律紫菜飯卷,₩4,200,
有種好特別的煙熏味,
第一件覺得麻麻地,食食下就接受到陣味啦。=========================

 
 

之後我地搭地鐵去馬場站,
行大約15分鐘就黎到馬場洞家畜產品市場 (마장동 축산물시장),
呢度最出名就係食韓牛啦!
原本以為馬場洞會聚集左好多人黎食牛,
點知今日的人流完全唔多,
最後我地揀左呢間鋪頭買牛。
呢間鋪有清楚的menu寫左有咩種類的韓牛可以買,
每款牛肉都有圖,件牛肉屬於牛的邊個部位都會寫清楚,
仲會有韓、中、英三種語言標示每款牛肉的名添,
我地最後買左左面個頁的西冷牛扒 1++霜降肉生牛肉
總共係₩85,000,當時等於HKD$633。
我地買完緊係即場食啦,
店員就帶我地過去附近的一間樓上的餐廳。
呢間餐廳係採用炭燒的韓燒爐。
店員放左好多伴碟的小食,
左下角的沙律係好好食架。
最左個塊就係西冷牛扒 1++ Ribeye Roll,價錢係100g ₩10,000,唔記得各買左幾多gram啦,
西冷牛扒 1++ 肉質幾淋,但牛味唔夠勁,男友覺得佢比貴d的霜降肉好食,

右面個幾塊係霜降肉 Beef Ribs Kkossal (Boneless Chuck Short Rib),價錢係100g ₩15,000,
霜降肉有根,肉質淋,味道好正, 但牛味都係唔夠勁。

呢個就係生牛肉 Korean Beef Tartare啦,
生牛肉撈左生雞蛋&調味料的味道好正,
白色一條條的係香甜多汁的雪梨,
夾埋生牛肉一齊食超好味,
不過生牛肉口感有d軔。
呢度的服務都唔錯,
店員有時會幫你燒牛肉。
係度堂食每人要比₩5,000,
我覺得係值得的。=========================

食完韓牛就行番去地鐵站,
途中經過一間叫做가락공판장的超級市場。
我地買左一盒士多啤梨,₩8,900。
韓國的士多啤梨非常甜,又多汁。=========================

之後我地就搭地鐵去梨花女子大學,簡稱梨大
係1886年建校,
係韓國第一間女子大學。
梨大咁靚的校園,
亦都係首爾好多女仔都會參觀的打卡熱點!
當時大約接近4點,
個天已經開始日落啦,
梨大冬天凋零的感覺,再加上日落的金黃色,真係好靚呀。梨大附近好多女裝店,
旺中的價錢,但係韓國的款式,
我都買到滿載而歸呀。

跟住見到街上有d小食的攤檔,
我地就幫襯左圖中鬼佬身後呢檔啦。
我地買左一個雞蛋糕,₩1000,
原來雞蛋糕係韓國冬天好常見的街頭小食黎架,
我覺得呢個雞蛋糕好甜好好味,個雞蛋同埋個蛋糕都好好食。
我地行多陣街就黎左呢間好出名的火飯(불밥)
深受遊客&梨大學生的歡迎,
係黎到梨大呢一區必食的餐廳。
地址:60-51 Daehyeon-dong, Seodaemun-gu, Seoul
韓文地址:서울 서대문구 이화여대8길 11
火飯有魷魚、雞肉、豬肉揀,仲可以加芝士添,
我地就揀左芝士豬肉,仲加埋年糕添,
兩人的份量總共₩17,000 (最少要嗌兩人份量架)。

爐入面除左豬肉、年糕之外,
仲有粉絲、椰菜等等,
另外仲有碗鋪滿紫菜的白飯,
碗飯係我地食完個火鍋之後,店員加入火爐入面炒的。
係等緊火爐滾的時候,
店員就上左熱辣辣的蒸蛋。
d豬肉終於煮熟左啦。
之後店員會加大量的芝士,
然後我地就可以開餐啦。
我地食哂火鍋入面d餸之後,
店員都會將碗白飯倒入個爐,
然後炒成圖中的火飯啦。總括黎講,
火飯都幾辣,
好可惜我地無揀到辣度,其實有大中細3種辣度選擇,
d雞肉幾好食。
最後落飯去炒,d紫菜味好出,
溝埋火鍋本身的汁好好味。

=========================

食完飯之後,
我地就返東大門的酒店放低d戰利品,
返酒店之前我地又黎左東大門設計廣場DDP
原來呢度有個溜冰場,
四周插滿燈飾的樹,
好浪漫呀。

今朝睇左DDP的外面,
而家就行下入面的地方,
都有好多影相打卡的位置呀。=========================

係酒店休息左一陣,
我地就決定搭地鐵去蠶室站,
係首爾2017年新起的地標樂天世界塔 Lotte World Tower度倒數迎接2018,
可以話係見證到樂天世界塔第一次倒數的時刻呀。
我地當時11:30pm去到,
但都好易搵到個靚位近距離見到座塔。
座塔倒數之後就會有煙花放添架。

雖然聽唔明韓文,
但好彩樂天世界塔都會有倒數的時間,
我地唔識講韓文,我地唯有嗌英文啦,
座塔放煙花都好靚呀,
倒數完我地就返酒店啦。

聽日我地會去江村玩鐵道自行車,
同埋去南怡島

旅遊日期:2017年12月30日- 2018年1月3日

=========================

覺得呢篇blog幫到你,
記得like Facebook Page  https://www.facebook.com/fatbjai.travel/
follow Instagram: fabjai.tavel
https://www.instagram.com/fatbjai.travel/
收到個blog的最新update!

=========================

 

《去首爾玩》
Day1 (南山谷韓屋村,韓國必買零食,橋村炸雞,平壤麵屋)
Day2 (建大Common Ground,梨大火飯,馬場洞食韓牛,樂天世界塔倒數)

Posted in 南韓 | Tagged , , , , , , , , , , , , , , , , | Leave a comment