韓國篇:陳玉華一隻雞 – 拜會馳名雞店

無論睇旅遊書,還是問谷歌大神,抑或請地膽朋友介紹,總離不開陳玉華的名字,看來我是要會一會佢。

交通蠻方便的,在東大門站9號出口直行,見到Zen Cafe轉入後巷就是,沒有傳聞中咁難搵。

坦白講,若不是為了吃陳玉華一隻雞,今趟首爾之行,一心逛弘大建大這等潮地的我,是沒打算去東大門的。

你可以好傳統咁盤腿席地而坐,或者揀正常枱椅,任君選擇。

泡菜和開水是自助的,悉隨尊便。

基本上是不用點餐,甫坐低,店員便將一鍋雞送來。材料好簡單,就係一隻雞,少許蔥段,以及薯仔,係咁多。呷啖湯,味道是偏淡口,滲出點點蒜味。

之後,店員會幫助,以純熟的手法,三兩下手勢將雞肉剪開。雞湯滾起後,可以起動。據說是採用35天的童子雞,所以肉質很嫩,即使雞胸亦不會粗嚡。的確,湯一直的滾,雞肉也不會變韌。馬鈴薯跟這雞湯又幾夾喎!

可追加的配料其實不多,只有年糕、薯仔、麵條和米飯,而且只接受一次點餐。

來了份麵條,煙煙韌韌的口感討我歡心,伴以辣勁十足的辣醬同吃,堅正。

愈食愈熱,必須來罐冰凍的可樂,作急救之用。

冬天吃這東西,相信會好滋味,但人客應該會多十倍。

This entry was posted in 南韓 and tagged , , , , , , . Bookmark the permalink.