開 Party 梗係愈多人愈開心,但人少少去 Party Room 都一樣可以好多嘢玩!今次我 依莉詩 就同 大仁 一家喺觀塘 Party Room Dreamer 開咗個少型派對,8個人就可以有間私人房間,仲可以喺 Common Area 玩盡 10大遊戲設施,可以話私隱與娛樂並重! $188 任玩設施 4小時 觀塘呢間 Party Room 佔地超過4000呎,最多可容納140人,分為 4間房同 Common Area 遊戲區。每人最低消費 $188 /4小時,加 $20可以任飲飲品,而 $279就是連到會 + 飲品,價錢未算特別平,不過勝在多嘢玩!Common Area 除咗大部份 Party Room 都有嘅 board games、飛鏢、美式桌球外,最正就係有個大海洋主題波波池,可以扮美人魚打卡!仲有部 6人對決嘅濕身巨浪划艇機,輸咗就會被倒水,緊張刺激!而入Party Room 內都需要脫鞋,有唔同大細嘅膠拖鞋畀大家著,廁所亦喺場內,整體都算乾淨。 必玩 1) 海洋波波池 扮美人魚夢幻打卡 一入到去最吸引到我嘅就係呢個超大海洋主題波波池,粉藍色同透明波波打造成海洋,加埋天花嘅波波吊燈同煙花牆紙,非常夢幻,仲可以免費借用美人魚尾,坐喺巨型貝殼型擺設上面影相添!而波波池旁邊都有軟凳圍住,小朋友喺度玩,大人們都可以坐喺旁邊吹水。無論放電定打卡都兼顧到! ▲ 波波池嘅燈光顏色可以隨時改變,想影靚相話咁易! 必玩 2) 濕身划艇機 3對3激鬥 要數到最刺激嘅遊戲一定係濕身划艇機,3對3鬥踩划艇機,其中一組最先踩夠分數,水槽嘅水就會傾瀉去另一組。因為只會見到對方嘅分數,又睇唔到自己幾多分,啲水唔倒落嚟,都唔知自己輸定贏,超級刺激! ▲ 踩慢啲都隨時淋成落湯雞,好有獎門人嘅 Feel!好彩場地有提供雨褸同拖鞋,就算被水淋完都唔怕沾濕衫褲。萬一濕咗都有風筒可以用,所以大家都可以放心玩! 必玩 3) VR體感遊戲機 置身虛擬世界 記得早幾年玩 VR Game 都幾貴,就算單人玩都係逐鋪收費,估唔到而家普及到嚟 Party Room 就可以任玩!場地用嘅係 HTC Vive 畫質都算有保證,而且有部大電視喺前面,旁觀嘅人都知中間嘅人玩緊乜。遊戲方面都有10幾款,簡單嘅由劈生果到滑雪都有,大人細路都啱玩! 必玩 4) Atari Pong Table 簡單對決 復古嘅 Atari Pong Table 亦係一大賣點,遊戲將最原始雅達利乒乓變成為實體機,一人扭動一邊遙控杆對打,看似無聊,但就玩下一鋪玩下一鋪,一邊傾計都唔錯㗎! 必玩 5) 街機任打 無限續命 除咗 Atari Pong Table ,呢度仲有部街機畀大家大顯身手!紅極一時嘅「街霸」同「戰神」等遊戲都有,絕對係 80後嘅青春回憶!以前入機舖玩要$1一局,輸咗就要入錢續Game,而家可以無限續命,攻頂話咁易! 必玩 6) 美式桌球 一展身手 講到聯誼,不少得場地中間嘅美式桌球枱。雖然我哋都唔識篤波,不過借呢個機會學下都好! 必玩 7) 幻彩乒乓機 融入酒吧氣氛 夾公仔機旁邊有一張乒乓波枱,但唔係打乒乓波咁簡單,係畀大家玩一個小遊戲,大家要互拋乒乓波到對方嘅杯入面,而枱中間有 LED 燈顯示唔同圖案,熄燈之後充滿迷幻氣氛,好似落咗酒吧一樣呢! 必玩 8) 飛鏢機 大考眼界 當然飛鏢亦係一個聯誼必備活動,呢度都有一部飛鏢機畀最多4人同時玩,考考眼界!男士們都喺時候大展身手喇! 必玩 9) 充氣彈床 放電恩物 如果包晒全場的話,仲可以要求場地開一條充氣彈床瀡滑梯畀小朋友放電添!家長們就可以自己去玩自己鍾意嘅嘢啦! 必玩 10) 夾公仔機 愈夾愈上癮 今期流行夾公仔,呢度都有一部夾公仔機,只要 Like Dreamer Facebook 專頁就可以得到 2個代幣,夾到嘅公仔仲可以帶返屋企添!呢款機可以「二收」按理都唔太難夾,不過我哋一行人夾咗無數次,最後先有阿太夾到一隻咋! 最少 8人包房 唱K打牌高私隱 好多時啲 Party Room 多嘢玩嘅都要包全場先享受到啲設施,但人少又包唔到場,只能 book 啲細房仔無嘢玩。而今次呢度就顧及到唔同人數嘅需要。8位起可以包房,60位起可以包場,就算唔多人都可以享受到啲設施,又有私人空間食嘢、傾計,仲有自動麻雀枱同電視。單單係唱卡拉OK同打機都有排玩啦! ▲ 有多款 Switch 遊戲可以借用,而且有齊4個手掣,可以 4 players 齊齊玩 Mario Party 或者 Over Cook 2啦! Dreamer 電話: 63891286 / 9323 6892☎ 地址:九龍牛頭角鴻圖道28號 5樓全層(牛頭角港鐵站B6出口) 費用: 每位HK$188/4hrs or $279/4hrs 連到會+飲品 (加時每人+$50/每小時);大小同價,三歲以下免費 更多一日遊路線! 屯門後花園偽日本打卡路線!藍地水塘+龍門居夜市|周末好去處|一日拍拖行程 鴨脷洲漁村風情半日遊!食盡老香港情懷 – 船河、大排檔、糕點小食 長洲休閒一天遊 – 賞櫻、行小店、睇日落 長洲 1.5 日單車美食懶人包!食盡 7大小食 + 張保仔洞探險 港版小清境 – 塔門一日遊!食海膽炒飯 + 大草地放風箏 由黃大仙走到九龍城! 半日遊深度體驗香港傳統文化 情侶放閃必去!精選 10大假日輕鬆好去處 (上集) 情侶放閃必去!精選 10大假日輕鬆好去處 (下集) 睇更多拍拖好去處! FB page: 依莉詩生活 美食 IG: ErieDiary 打卡 IG:ErieDiaryhk 網址:ErieDiary.hk YouTube:ErieDiary