上回祖迪帶我哋去紅磡掃街,今次嚟個 round 2,帶我 依莉詩 同 大仁 一家去土瓜灣繼續食!同樣係腸粉同雞蛋仔,但就各有特色,真係唔食過,唔知分別呢! 1) 食得養顏健康 - 足料花膠魚肚粥 咪以為小食就一定唔健康,呢間開咗 3個月嘅森煌美食就主打健康飲食,全店小食不但唔加味精同雞粉,就連腸粉嘅醬都特別選用芝麻醬,比起花生醬更有益。而控食又養顏就非花膠魚肚粥莫屬,$25大大碗,入面就有好多花膠同魚肚,足料養顏!魷魚亦都好厚身彈牙,超有驚喜!飲品方便就有21款養生花茶,冬天飲暖笠笠,好啱又胃食又要健康嘅女士們呢! ▲ 即煎雞扒飯 $33 喺小食店食飯,多數都會諗起頹飯,幾十蚊醫飽個肚就算,估唔到店長會極力推介即煎雞扒飯。果然又真係大件夾抵食!大大塊雞扒即叫即煎,外皮脆、肉質嫩滑,好似食緊酒樓炸子雞咁正!啲汁都好特別,黑糖鼓油汁甜甜哋,少少似咖喱,撈飯好開胃。 ▲ 花膠魚肚粥 $25 花膠含有豐富膠原蛋白就係人都知,但小食店都食到就好出奇!粥底標榜無雞粉同味精,但食落好鮮又唔腥,而且仲有好多舊魚肚同花膠,又綿又有膠質,真材實料! ▲ 黑芝麻醬腸粉 $10/5條 腸粉就買圍都有得食,呢度嘅醬以自家製芝麻醬代替一般用嘅花生醬。白芝麻醬香口,黑芝麻醬細滑微甜,花椒芝麻醬甜中帶少少辣,好食又健康。 ▲ 養生花茶 $12 飲品方便仲有 21款養生花茶可以選擇,桂圓杞子玫瑰茶養血美肌、人參從寶茶安神,仲有檸檬荷葉茶可以修身。一杯可以翻沖幾次,記得帶私伙樽去買呀! 森煌美食 地址:土瓜灣馬頭角道51號 2) 傳統麵廠出品 - 濃郁米香腸粉 食完特別醬汁嘅腸粉,喺時候食啲傳統腸粉。蝦記麵廠前舖後工場,麵廠堅持60年不變。除咗蝦子麵,最有趣係門口有腸粉、燒賣、粉果賣。腸粉比一般食開嘅較重米味,濃郁米香,就算唔點醬料一樣好食。 ▲ 腸粉 $9/4條、粉果 $4/1個 腸粉比一般食開嘅較重米味,而且嫩滑彈口。濃郁米香,就算唔點醬料一樣好食。 蝦記麵廠 地址:馬頭涌譚公道69號 3) 即叫即整 - 脆卜卜雞蛋仔 雞蛋仔通街都係,不過有誠意嘅愈嚟愈少。629 雞蛋仔算係少有足料又創新嘅雞蛋仔。呢間店幾年前喺新蒲崗開店,最近嚟土瓜灣開分店,一樣即叫即整,雞蛋仔內脆外軟,粒粒都軟綿綿㗎! ▲ 阿里山烏龍茶蛋蛋 $20 烏龍茶味好出,食落淡淡清香,雞蛋仔粒粒飽滿,內脆外軟。 ▲ 紅莓朱古力粒粒蛋蛋 $24 比起單純內脆外軟,紅莓朱古力粒粒雞蛋仔多咗份口感。每一粒都有酸酸嘅經莓同甜度適中嘅朱古力粒,有咬口之餘,味道亦好刺激。 ▲ 每粒雞蛋仔都有好多朱古力粒呢! 629雞蛋仔 地址:土瓜灣道 317號捷通大廈地下 5A鋪 4) 細細的甜品店 - 老闆心機出品 走到入橫街,有間細細又唔起眼,而且只做外賣嘅甜品店。入面只有黃糖雞蛋仔、水蜜桃窩挑、梳乎厘班戟 同 蜜糖吐司配豆腐花 4款甜品。甜品選用來貨較高,但較健康嘅黃糖代替白砂糖。坦白講,質素未必係最好,但老闆一腳踏,仍然笑住做甜品,已經相當難得。 ▲ 蜜糖吐司配豆腐花 $25 厚厚嘅多士烤都好香脆,記得連埋豆腐花一齊食,唔係小心整損上顎呀! ▲ 梳乎厘班戟 $29 可能因為用黃糖做,班戟比較硬身,質地似馬拉糕,所以應該叫厚班戟呢!如果鍾意食實淨班戟多過空氣感嘅朋友可以一試。 甜甜味 地址:土瓜灣美景街28a號 區外人是否需要潮聖? 沙中線未起好,交通無紅磡咁方便,要由紅磡行成半個鐘或者搭小巴先到,要專登嚟「搵食」都唔容易。食肆選擇都幾多,出名就有大閘蟹放題等等,而小食勝在夠平,同埋人情味特別豐富。間間小食店嘅老闆都好熱情,又talk得,最緊要係唔介意我哋成班人去搞亂擋,仲好有心機同我哋講解有咩推介! 各區美食精選! 地膽帶路!土瓜灣街頭小食 – 足料花膠魚肚粥 + 濃香米香腸粉 地膽推介!$150 掃盡 5大紅磡街頭小食 - 混醬班戟麵條 + 超大粒手製芋圓 死場不再!10間平民食肆進駐荃灣新 Food Court – 嫩滑手撕雞腸粉 x 醒胃麻辣串 粉色系呃 like 甜品團!食盡荃灣 3大潮食店 – 玫瑰士多啤梨窩夫 X 山形縣白桃厚班戟 大坑 2大呃 Like 甜品! 粉色棉花糖燒 x 彩虹沖繩鹽刨冰 5萬呎水產市場登陸黃埔!九號水產 4大食店率先睇 – 蟹痴必掃北海道皇帝蟹 旺角 1日 4餐,由朝食到晚!青檸烏冬係劣食?韓系日式吉列牛一定正? 銅鑼灣 SOGO 地庫重開!5大人氣日本過江龍進駐 必食香脆海鮮煎餅 + 鹿兒島彈牙魚餅 元朗 4大人氣食店!必食北海道布丁燒 X 啖啖肉無骨雞翼包 屯門潮食集中地!紅橋 4大不得不吃的小食+主菜+甜品 睇更多拍拖好去處! FB: 依莉“詩”生活 IG: ErieDiary 網址:ErieDiary.hk YouTube:Diary Erie