早晨!世界 第二日朝早決定整個愛心早餐比阿盧嘆下 由於四眼叔叔對水泵一事耿耿於懷 除咗贈送燒烤用品仲比我地遲一小時check out 由原本2點改為3點 所以我地可以自然醒慢嘆早餐同執行李 醒神過醒神早餐既愛心早餐 烘麵包,煙肉,蒜蓉焗豬扒(當然要好好善用每一個設施) 加多杯雀巢咖啡 完滿咗我地係露營車既旅程第一個清晨 洗乾淨碗碟執好行李就離開營地了 下次一定會再黎! 上番停車場既4號巴士站頭 去我地今晚既落腳點梅窩銀礦灣酒店 大約30 mins車程係梅窩街巿落 行大約5 mins就去到酒店 面對住沙灘既酒店外面環境不錯 酒店大堂迫滿人 職員工作效率比較緩慢 等咗大概15 mins先到我check in 銀礦灣酒店比較舊 聽講新翼嗰邊翻新過 所以寧願比多啲錢upgrade到新翼 最後安排到一間位於地下既房間 有一個不能出入既「露台」面對住一幅石牆既景觀 霉到差不多爛既牆紙 一陣焗臭味...... 但由於時間不早仲有地方去既關係 放低行裝就出去了 點擊圖片放大 +8 夾岩時間行去梅窩街市撘1號巴士去大澳 香港威尼斯 聽個名真係把炮 由站頭坐到站尾司機就當正頭D飛秋名山咁 入到大澳已經5點幾 一落車同我想像,網上描述既完全唔同 舖頭10間有9間冇開 唔好話搵隱姑茶果定炭燒雞蛋仔 大大粒魚旦同豆腐花就食到 幸好都比我地覓到一檔伯伯賣茶果,糯米滋黎滿足一下 一路行一路聞到居民既飯香味 終於⋯終於比我搵到一間有開舖既炭燒雞蛋仔 「唔該一底雞蛋仔」「最後嗰底賣咗喇 閂門喇」除咗無奈我都唔知可以有咩反應 唯有繼續行 終於⋯終於決定搵間餐廳食晚飯 隨住一對男女入餐廳「唔該2位」「唔好意思 要閂門喇」除咗無奈我感到憤怒 明明岩先有人入點解要拒我地於門外 呢個時候我對大澳既失望已經去到極點 再見大澳 再見香港威尼斯 永別! 點擊圖片放大 坐上嗰架奪命巴士瞓一覺番到梅窩 番酒店前係碼頭附近買糧食同食晚飯 今晚阿盧想去熟食巿場大排檔食海鮮 化悲憤為食量 嗌個3餸1湯套餐 原本對呢餐冇抱咩期望 但呢到既蜆真係不得不讚 唔同平時食既鼻屎蜆 肉厚新鮮又入味 正! 番到酒店房感覺真係好唔掂所以要求轉房 誰不知轉咗間尾房比我地 今次真係憤怒了 原因訂酒店時已經強調唔要尾房 只好再要求轉房 幸好有得轉否則我寧願冒夜番屋企(誰叫我超迷信) 房間係用阿盧生日優惠會送蛋糕 要自己憑單去餐廳換 12點正點起蠟燭唱起生日歌 祝你生日快樂 親愛的