4/7/2016 #Sintra, Portugal #Cabo da Roca, Portugal #Cascais, Portugal 諗住去西葡既就會發現葡萄牙網上資料極少, 連想洗錢買本中文旅遊書都冇, 我都係有限資料無限探險. 去完終於知道d人話葡萄牙靚過西班牙係真架! 今日由葡萄牙首都里斯本去出名有彩色城堡既Sintra同附近一日遊 Train: Rossio(Lisbon) -> Sintra (~40min) 首先響Rossio Train Station 1/F售票處買Train & Bus 1 Day Travelcard, 價值€15.5, 包哂今日提到既火車同巴士. 去Sintra既火車大約25-35分鐘一班, 朝早繁忙時間都幾多人, 想有位坐要早d上車 點擊圖片放大 落車建議你九秒九出站轉右直衝去巴士站等434號巴士, 因為基本上九成九人都係搭呢架車, 我快步行成功霸咗個頭位輕鬆上車有位坐, 目測行得最慢既要等3架車…. 15分鐘一班….而且係一架企滿人上秋名山既車, 搵個位坐會舒服好多 434號巴士路經大部份景點, 但由於時間有限, 今日精選Palácio da Pena同Castelo dos Mouros 景點飛建議上網買定,唔使排隊之餘仲有5%off!!! !!! 由於Sintra係山區, 係好大風好寒, 講緊7月響里斯本著緊背心短褲, 但去到陰天係薄pullover長牛仔褲都寒, 好彩響里斯本撞到有香港人同我講真係好凍, 凍到病, 如果唔係肯定中伏 !!! Bus 434 Sintra Estação (Sintra Train Station) -> Palácio da Pena 點擊圖片放大 +4 唔係好遠, 搭一陣就到. 由於已經有飛, 可以直接入去. 閘口仲要上山先到城堡, 都唔難行, 亦都可以揀€3接駁巴士點擊圖片放大 天陰仲有小雨難免有d失望, 仲要冇帶遮! 點知絕望中有驚喜, 響個平台影影下相有人歡呼, 原來有雲海!!! 真係可遇不可求呀! 點擊圖片放大 睇咗好耐雲海就入室內, 室內其實都係普通皇宮, 可以留意下有d你以為係雕哂花既牆其實係好3D既畫 點擊圖片放大 +3 Pena皇宮張飛其實係連成個Park of Pena, 係成個郊野公園咁大, 山頂有個十字架. 不過天雨路滑冇帶遮, 兼著住對同溜冰鞋冇分別既NB, 加上冇時間就走喇. 跟著去Castelo dos Mouros. Pena出大門口轉左行幾分鐘就到Castelo dos Mouros既巴士站喇, 心水清既你可能發現係行返轉頭, 係呀! 因為架巴士係單程循環線, 行返轉頭走既時候咪易d上到車! 去到巴士站再要經過道城門咁既野行入去, 沿途有靚好多繡球花. Castelo dos Mouros雖然叫Castle, 但其實係似長城, 個建築本身唔係重點, 係上去睇風景. 點擊圖片放大 +3 今日有雲海既代價就係能見度可以低至1米… 一路行d霧散一散時可以見到山下面另一個出名景點Palácio Nacional de Sintra, 認住兩個白色雪糕筒就係喇 好努力咁響呢個幻景中行上最高點, 同一大班世界各地黎既人坐響塔頂度等霧散, 等左好耐最期待既畫面終於出現了! 雲海中的Pena Castle! 呢種仙境可遇不可求吧! 點擊圖片放大 +3 Bus 434 Castelo dos Mouros -> Sintra Estação (Sintra Train Station) 落車向反方向行去Bus 403巴士站, 有時間或者肚餓都可以睇定班次再響Sintra市區行下 Bus 403 Sintra Estação (Sintra Train Station) -> Cabo da Roca (~35min) 大概35分鐘車程就到歐亞大陸最西點Cabo da Roca羅卡角, 落車睇定幾點有車走去Cascais, 因為車比較疏 都係影相睇風景, 天氣好係好靚的, 走時搭車要睇清楚, 一樣係403巴士有一半返Sintra, 一半去Cascais 點擊圖片放大 +5 Bus 403 Cabo da Roca -> Cascais (~30min) Cascais唔算係出名旅遊點, 但係驚喜地靚. 有個小沙灘, 悠閒渡假風既小鎮, 好舒服好鍾意, 坐露天嘆隻葡撻真係一絕, 鍾意食埋晚飯都仲得點擊圖片放大 +5 Train: Cascais -> Cais do Sodré (Lisbon) (~40min) 一路沿坐海邊行, 風景好靚, 沿途都有幾多靚建築, 鍾意可以落車睇下. 最後會經過Belem返里斯本Cais do Sodré, 可以順便去Time Out Mercado da Ribeira美食廣場參觀下食下野 追夢‧闖蕩‧看世界 https://www.facebook.com/DreamsAroundWorld https://blog.ulifestyle.com.hk/blogger/dreamsaroundworld/