觀塘特色上海菜館

有時我都會去吓啲傳統老店食飯,因為我覺得好多舊式老店人情味濃,老板同客人會有多啲交流,今次我嚟嘅呢間上海榮華川菜館接近40年歷史,佢嘅門面同一般茶餐廳嘅設計無異,店內亦掛咗好多舊香港嘅圖畫,別具懷舊風味。

而餐廳都貼有好多用字創新嘅揮春,接近收銀位置仲有個飛標,加上現代元素作點綴,令人感覺到佢係緊隨時代變遷不斷創新。

老板娘誠意推介餐廳嘅招牌菜—回鍋肉,我覺得辣度適中,啲肉切到好薄,又唔會太肥,而且味道非常開胃。

呢碟溜肥腸出邊真係比較少見,所以我貪得意就叫嚟試吓:D 佢個賣相第一眼睇同個回鍋肉真係好似,哈哈! 啲豬腸好有咬口,完全冇腥味,仲好好送飯!

食中餐就緊係要飲返個靚湯喇,今次就加咗$25叫個雲吞雞湯,個湯飲落唔多味精,雞肉都好嫩滑,個雲吞皮似係自家製作,好薄好滑,食落唔會好粉。

食飽飽,飲返個呢八寶茶消滯簡直一流,老板娘好有耐性咁教我正確嘅飲茶姿勢,我哋仲有講有笑咁係度研究結婚奉茶同埋生幾多個仔女最好,哈哈,老板娘真係好好人呀!

上海榮華川菜館

地址﹕觀塘崇仁街15號地下

 

Instagram: miki.dreamland

Facebook: miki’s dreamland

This entry was posted in 中國菜, 九龍, 健康養生, 米芝蓮餐廳/廚師, 香港 and tagged , , , , , , , , , , , , , , . Bookmark the permalink.