澳牛(澳洲牛奶公司)這個名字,對香港人來說絕不陌生。 假若你忽然告訴身邊朋友你想去食澳牛,通常會得到一個回應: 「你有乜事咁睇唔開呀?」 澳牛的伙記哥哥仔和叔叔,配合招牌式的「光速餐」,大概已經深入民心,但仔細想想,香港茶餐廳賣的不就是快靚正嗎?有乜問題? 懷孕以來每次經過佐敦,都想到澳牛的香滑炒蛋和燉奶,奈何身邊有位廣東話不大靈光的頭大大,每次點餐要花上好幾百萬秒去細閱餐牌猶豫不決,總令我卻步⋯⋯ 眼見孕期接近尾聲(坐月的監獄生活將至),實在按捺不住要在麻糬出生前一嚐澳牛。 下決心帶著頭大大一起去,到埗前提醒了他要決定好餐飲,點餐的部分留給我(我絕對是個超級配合澳牛風格的好顧客),就這樣去排隊了! 門口帶位的叔叔望了我的巨肚一眼, 「嘩,最多要你等一分鐘!」 講得出做得到,半分鐘後已經指示我們去四人卡位入座。 途中有一洗碗姐姐推著一桶水杯出來,職業病的我立即笑著讓路,此時帶位叔叔粗聲粗氣叫阿姐姐讓我先行, 「你粗身大細梗係你行先啦,佢唔讓你我都幫你擋住呀!」 語調仍然咁粗,但係聽得出關心。 坐低極速落單: 「兩份茶餐,煎蛋炒蛋各一,意粉通粉各一,方包多士各一」 服務效率依舊,十幾廿秒間餐點已送到枱面,頭大大不禁問:「廚房應該是在不停的煮吧?」(我心諗:食啦你仲講咁多) 此時有四人入座後面卡位,其中一人望了我一眼,問伙記叔叔:「乜唔係二人位黎架咩?」 「四人位黎架!呢d係大肚婆福利!」 坦白講,澳牛的卡位每邊只夠兩個正常身材成年人坐,如果硬要塞一個孕婦一個成人在一邊,實在有點殘忍。 吃光茶餐後伙記哥哥仔邊收碟邊問「飲乜野?」 「熱奶茶、凍奶茶少甜少冰,加熱燉奶燉蛋各一」 雖然你唔催我唔俾壓力我,但我仍然跟足效率落單。(花輪同學style撥一下頭髮) 那碗燉奶實在不得了, 真心,好食的燉奶在香港已經好難買到好難食得到,真後悔自己當初沒在孕期初期開始日日來食燉奶! 離座行出門口,沿途各叔叔哥哥仔溫馨提示小心地滑慢慢行。 就算澳牛伙記粗聲粗氣又點? 我都係咁鍾意食,因為呢班係真性情真男人。 更多分享和更新,請至: 呆丸媳婦行李箱on Facebook www.facebook.com/daiwanwife 呆丸媳婦行李箱on UBlog https://blog.ulifestyle.com.hk/blogger/daiwanwife 呆丸媳婦行李箱on 痞客邦 http://daiwanwife.pixnet.net/blog 活動邀請或邀文,請聯絡呆丸媳婦行李箱 Email Daiwanwife@gmail.com