cstayhungry日日食,日日同你分享美食,follow instagram: cstayhungry 啦! -------------------------------------------------------- 咖啡經常飲,番工番學前飲,「隊」咖啡頂眼瞓。老實講,平時放假都會盡量制止自己飲,免得浪費quota... 近排好興3D拉花 (其實我興趣不大),飲咖啡就好似變到為咗面頭層泡咁,影到幅靚相就收貨。 近日喺Instagram認識到Green Door Coffee,令到我有少少改觀,咖啡其實唔係用嚟「隊」,更加唔需要花巧。 星期五,膽粗粗走上Green Door搵Antony (老闆),叫佢教我咩係精品咖啡,破戒放假飲咖啡,仲要飲咁多! -------------------------------------------------------- 鋪仔細細,大概只容納到15人,走簡約風。 (另一位老闆,亦係咖啡烘焙師) 我表明對咖啡零認識,老闆就先俾我試一杯latte,只有普通拉花,無任何花巧,腳踏實地我鍾意。 果然,同連鎖店出品有好大分別,有少少炭燒味,感覺好rich,就算凍咗,都唔會酸。 Waffles都唔錯,水果新鮮,如果唔用普通紅色罐唧cream就好了。製作需時,要俾啲耐性。 雖然我一坐低就講到明唔鍾意酸味重嘅咖啡,但老闆堅持想我試呢杯精品咖啡,即管試下啦。 坦白講,真係好酸,酸到唔似咖啡哈哈,但離奇地,又幾好飲喎! 原來試咖啡都要好似試紅酒咁,要索啖氣入口,含啖咖啡一陣。 咁啱有人嚟學拉花,我順便偷師,heeheeee。 點擊圖片放大 +2 (三層,頂嗰層係油脂圈crema) -------------------------------------------------------- 一路飲,一路上堂。老闆講,我盡量聽,記得幾多得幾多哈哈。 嘗試下抛書包,答錯只怪我記性差同領悟力低.... Q: 咖啡係咪一定苦? A: 唔係。好大部份嘅咖啡都唔苦,坊間 (例如Starbucks) 點解要做到咖啡苦好大可能係佢地慳錢,溝奶溝糖溝水後,客人仲會飲到咖啡味 (苦味) Q: 咁咖啡點會苦呢? A: 咖啡沖出嚟頭25-30ml係精萃 (大概等於1 shot),最好飲,如果過度extract就會有其他唔好味嘅物質出咗嚟。 Q: 咖啡應該係咩味? A: 首先要知道,咖啡係嚟自coffee berries,自然真正嘅咖啡大多會有果香味,可能係酸,可能係甜,亦可能係苦。呢啲味道全部都係天然organic,而唔係加奶加糖先有。 (咖啡果皮) Q: 靚嘅咖啡豆係點? A: 應該係「瓦」色,表面唔應該有油。咖啡豆好似其他植物(例如粟米)咁有油分,如果炒過龍,啲油脂(crema)就會預先走咗出嚟,到磨成咖啡粉沖成咖啡後,crema就會無咗,杯咖啡可能變得苦。另外,咖啡粉係會變味,頭幾日可能會似黑加侖子,過幾日可能會似藍莓,再過多幾日又唔同。 (如果我拋錯書包,請原諒我...) -------------------------------------------------------- 同老闆傾咗接近三個鐘,感受到一份熱誠同夢想,一份我以為只屬於後生仔嘅passion (errrr老闆應該都算中年人士)。 為咗教客人咖啡文化,堅持唔用skimmed milk,堅持賺少啲都要品質好,堅持只賣拍得住咖啡質素嘅食物,真心欣賞。 有興趣去飲杯精品咖啡嘅朋友,可以問下老闆鋪名嘅由來,可能會得到一個意想不到嘅答案 :) Green Door Coffee 地址: 尖沙咀嘉蘭圍三號地下G3號舖 營業時間: 每日12nn-8pm -------------------------------------------------------- Food blog on instagram: cstayhungry Email: cstayhungry@gmail.com 歡迎任何試食及合作活動,多多指教!