2015年上一課咖啡課 有性格的Green Door精品咖啡

cstayhungry日日食,日日同你分享美食,follow instagram: cstayhungry 啦!

——————————————————–

 

咖啡經常飲,番工番學前飲,「隊」咖啡頂眼瞓。老實講,平時放假都會盡量制止自己飲,免得浪費quota…

近排好興3D拉花 (其實我興趣不大),飲咖啡就好似變到為咗面頭層泡咁,影到幅靚相就收貨。

近日喺Instagram認識到Green Door Coffee,令到我有少少改觀,咖啡其實唔係用嚟「隊」,更加唔需要花巧。

星期五,膽粗粗走上Green Door搵Antony (老闆),叫佢教我咩係精品咖啡,破戒放假飲咖啡,仲要飲咁多!

——————————————————–

 

鋪仔細細,大概只容納到15人,走簡約風。

IMG_6785

 

IMG_6788

(另一位老闆,亦係咖啡烘焙師)

 

我表明對咖啡零認識,老闆就先俾我試一杯latte,只有普通拉花,無任何花巧,腳踏實地我鍾意。

IMG_6759

果然,同連鎖店出品有好大分別,有少少炭燒味,感覺好rich,就算凍咗,都唔會酸。

 

Waffles都唔錯,水果新鮮,如果唔用普通紅色罐唧cream就好了。製作需時,要俾啲耐性。

IMG_6765

 

雖然我一坐低就講到明唔鍾意酸味重嘅咖啡,但老闆堅持想我試呢杯精品咖啡,即管試下啦。

IMG_6770

坦白講,真係好酸,酸到唔似咖啡哈哈,但離奇地,又幾好飲喎!

原來試咖啡都要好似試紅酒咁,要索啖氣入口,含啖咖啡一陣。

 

咁啱有人嚟學拉花,我順便偷師,heeheeee。

IMG_6779

 

IMG_6782

 

IMG_6762

 

IMG_6776

(三層,頂嗰層係油脂圈crema)

 

——————————————————–

一路飲,一路上堂。老闆講,我盡量聽,記得幾多得幾多哈哈。

嘗試下抛書包,答錯只怪我記性差同領悟力低….

 

Q: 咖啡係咪一定苦?

A: 唔係。好大部份嘅咖啡都唔苦,坊間 (例如Starbucks) 點解要做到咖啡苦好大可能係佢地慳錢,溝奶溝糖溝水後,客人仲會飲到咖啡味 (苦味)

 

Q: 咁咖啡點會苦呢?

A: 咖啡沖出嚟頭25-30ml係精萃 (大概等於1 shot),最好飲,如果過度extract就會有其他唔好味嘅物質出咗嚟。

IMG_6774

 

Q: 咖啡應該係咩味?

A: 首先要知道,咖啡係嚟自coffee berries,自然真正嘅咖啡大多會有果香味,可能係酸,可能係甜,亦可能係苦。呢啲味道全部都係天然organic,而唔係加奶加糖先有。

IMG_6752

(咖啡果皮)

 

Q: 靚嘅咖啡豆係點?

A: 應該係「瓦」色,表面唔應該有油。咖啡豆好似其他植物(例如粟米)咁有油分,如果炒過龍,啲油脂(crema)就會預先走咗出嚟,到磨成咖啡粉沖成咖啡後,crema就會無咗,杯咖啡可能變得苦。另外,咖啡粉係會變味,頭幾日可能會似黑加侖子,過幾日可能會似藍莓,再過多幾日又唔同。

(如果我拋錯書包,請原諒我…)

 

——————————————————–

同老闆傾咗接近三個鐘,感受到一份熱誠同夢想,一份我以為只屬於後生仔嘅passion (errrr老闆應該都算中年人士)。

為咗教客人咖啡文化,堅持唔用skimmed milk,堅持賺少啲都要品質好,堅持只賣拍得住咖啡質素嘅食物,真心欣賞。

有興趣去飲杯精品咖啡嘅朋友,可以問下老闆鋪名嘅由來,可能會得到一個意想不到嘅答案 :)

IMG_6789

 

Green Door Coffee

地址: 尖沙咀嘉蘭圍三號地下G3號舖

營業時間: 每日12nn-8pm

——————————————————–

Food blog on instagram: cstayhungry

Email: cstayhungry@gmail.com

歡迎任何試食及合作活動,多多指教!