銅鑼灣登龍街尋「辣」 冬天愈辣愈過癮

cstayhungry日日食,日日同你分享美食,follow instagram: cstayhungry 啦!

———————————————————————————————

唔熟港島區嘅朋友可能未必知登龍街係邊,其實相當易搵,一出銅鑼灣港鐵站時代廣場出口行幾分鐘就到 (鵝頸橋隔離)。因為工作關係,近幾年時不時都會去登龍街食飯,朋友問我銅鑼灣有咩食,我一定叫佢地去登龍街,港式、中、日、意、韓、越南、泰國菜等等等等,應有盡有,唔單止數量多,仲要有質素,出名嘅餐廳有Jamie’s Italian、豚王、BBQ 7080等等。港女雖然都鐘意去以上餐廳,但今次以「辣」為題,決定要介紹兩間唔係好多人識嘅小店,小店萬歲!

 

1.麵館皇
開業一段時間,但我一直留意唔到佢嘅存在,直至上星期日放工後,我同企鵝大人先發現到。(間鋪絕對顯眼,係我個人問題!) 當日得14度,手腳長期冰冷嘅我一定要食啲辣保暖。

雖然凍,但俾menu上嘅麻醬雞絲冷麵吸引,啊,死就死啦最多咪凍!

未食已經聞到濃郁嘅麻醬味(香過花生醬),其實有啲似雞絲粉皮,用咗大量青瓜撈麵,感覺清新唔會太膩,唔怪得係招牌菜,不過略嫌麵身有啲硬!

 

香港 銅鑼灣 登龍街 小店 辣 麵館皇 麻醬雞絲冷麵

 

食冷麵咁凍,要食番個湯麵balance番,所以我地點咗個麻辣牛展灌湯刀削麵。原先仲以為灌湯係雞湯(唔好問我點解,我諗起罐裝雞湯),上菜聞到陣味先知……..原來係有藥材,藥膳嚟架喂,好特別!!!

唔使怕,藥材味唔濃,非常易入口,但藥材起到作用啊(我諗),好似食完人參雞湯咁,個胃同手腳都暖哂!

 

香港 銅鑼灣 登龍街 小店 辣 麵館皇 刀削麵

 

刀削麵人手搓、人手削,肥嘟嘟,好飽!

 

香港 銅鑼灣 登龍街 小店 辣 麵館皇 刀削麵

 

「辣」出場!牛展牛肉味濃,唔羶,辣一定要另上(我食得辣都食到條脷痺咗),辣椒油做底,點兩下就夠唔好多,如果唔係會蓋過咗牛肉嘅味道!建議唔好將辣椒油浸落湯,唔好破壞咗個藥材湯,分開食超正!

 

香港 銅鑼灣 登龍街 小店 辣 麵館皇 牛展 牛肉 辣椒油 藥材湯

 

除咗麵之外,仲嗌多咗兩個小食:小炸雲吞同豆腐,炸雲吞有十粒,足料﹗而豆腐就不過不失啦!一定要encore個灌湯刀削麵,下次要食口水雞,見到隔離枱有一大隻雞脾……(葡萄)

 

香港 銅鑼灣 登龍街 小店 辣 麵館皇 小炸雲吞 豆腐

香港 銅鑼灣 登龍街 小店 辣 麵館皇 小炸雲吞 豆腐

 

點解張單個地址唔係銅鑼灣嘅?

 

香港 銅鑼灣 登龍街 小店 辣 麵館皇

 

價錢: 平均每人$60 (連凍飲)

 

2. 新記車仔麵

去車仔麵店唔一定要嗌碗麵堂食嘅,嗌碗外賣淨餸都好過癮!去開銅鑼灣或者鍾意食車仔麵嘅人應該都識新記,佢出名在個辣汁,唔係講笑,真係辣到飛起。我第一次食唔知頭唔知路落咗好多,成碗麵食唔到。

如果唔敢試招牌辣汁可以試咖哩汁,低幾個level,不過都足以令人出哂汗,好爽!星期六、日等小巴入赤柱大排長龍不妨買碗take away邊食邊等!

 

香港 銅鑼灣 登龍街 小店 辣 新記車仔麵 車仔麵 咖哩汁

 

價錢: 平均每人$50 (連凍飲)

 

題外話: 如果要比較service嘅話,簡直係天同地……

麵館皇老闆/侍應態度超好,有講有笑,仲會搞下爛gag同介紹有咩好食。

而新記呢…張點麵紙畫得衰啲都會俾阿姐鬧……

 

————————————————————————————

Food blog on instagram: cstayhungry

Email: cstayhungry@gmail.com

歡迎任何試食及合作活動,多多指教!