28 Sep 2015… Wrocław 今日唔趕時間, 十點幾先出動, 我地住嘅地方附近都算方便, 對面已經有 supermarket~~ 今日嘅第一站係 Katedrze św. Marii Magdaleny & Mostek Czarownic (瑪利亞瑪達肋納堂 & 女巫橋), 女巫橋其實就喺教堂入面, 要俾 PLN5 買飛上去嘅~~ 我地完全唔知原來咁高.... hahaaa... 點擊圖片放大 +4 早餐都未食, 我地就要上 N 層嘅樓梯... 仲要條樓梯係一個個窿望到下面嗰隻... 同埋感覺上唔多人上, 因為好似冇乜人打理, 有 D 塵同蜘蛛網咁.... 終於上到去喇~~ 條橋其實冇特別, 不過個景都幾靚~~~ 點擊圖片放大 +4 我地影完一輪相之後就返落去參觀教堂~~ 喱間教堂以紅磚同白色為主, 簡樸得黎都幾靚~~ 點擊圖片放大 +9 教堂出面有 D 檔攤賣嘢, 多數係 D 手織品, 我喺度買咗幾條 handmade 嘅冷披肩, 其實唔平, 不過確係冇乜見過嘅款~~ 點擊圖片放大 喱個城市周圍都幾靚, 好多店嘅門面或者 display 都好有心思, 建築物仲有唔少 graffiti 架~~ 點擊圖片放大 係時候食 lunch 喇~~ 我地去書仔介紹嘅一間平民食堂: Miś SC. Bar mleczny (小熊奶吧), 我地去到搵個位坐低, 就研究下點樣買嘢食~~ 同一般嘅快餐店一樣, 係先去買飛, 再去排隊拎嘢食~~ 但係喱度用英文溝通有 D 問題, 所以 Onlee 同 Lala 去攞嘢食嗰邊用電話影咗 D 嘢食相, 再去收銀嗰邊 show 俾佢睇我地想買咩~~ hahaa 點擊圖片放大 +3 我地叫咗一個湯, 一碟餃子, 一碟豬扒+薯蓉, 一個唔知咩飯有 D 汁咁嘅 (甜嘅)..., 仲有一碟類似 "沙翁"~~ 整體上係好味嘅, 係個飯一般~~ 我地仲 encore 咗個豬扒+薯蓉 tim~~ 不過真係幾平~~ 唔怪得 keep 住都咁多人啦~~ 點擊圖片放大 +5 Wrocław 喱個城市最出名嘅就係小矮人喇~~ 喱 D 小矮人遍佈成個城市, 其實真係唔知一共有幾多個, 因為網上由百幾個到四百個都有人講, 實在冇辦法證實.... 小矮人嘅由來, 網上資料話每一個雕像都係對 Orange Alternative 嘅一種致意, 1980 年代起源於 Wrocław 嘅反蘇聯運動將小矮人作為佢嘅標誌, 並推翻咗波蘭嘅共產主義政權~~ 我地見到嘅第一個小矮人終於出現喇~~ 哈哈~~ 真係幾得意, 突然喺街邊發現~~ 之後陸續喺街上都見到唔同造型嘅小矮人, 我地冇特登去搵, 最終只係有緣見到十幾個咋~~ 點擊圖片放大 +6 繼續行, 沿途都有 D 靚 building~~ 去到 Market Hall/ Hala Targowa (市雜大廳/ 舊街市), 外牆維修緊, 入面其實係一個有兩層嘅街市, 下層主要賣乾貨~~ 點擊圖片放大 +14 之後再行去 Most Piaskowy (沙橋), 係一條紅色嘅橋, 旁邊就係奧得河 (Odra), 河上面仲有船仔 tim~~ 我地喺沙橋度玩咗陣, 就繼續向 Most Tumski (杜吾斯基橋/ 千鎖橋) 進發~~ 點擊圖片放大 +6 好快就到喇~~ 係一條粉藍色嘅橋, 上面扣咗好多好多鎖~~ 旁邊仍然係奧得河~~ 今日勁好天, 藍天白雲, 條橋加埋條河再加埋個天, 堅靚!! 點擊圖片放大 +8 行過條橋就係 Ostrów Tumski (教堂島) 喇~~ 喱一帶嘅建築物都好靚, 尤其係 Katedra św. Jana Chrzciciela/ Cathedral of St. John the Baptist (聖洗約翰堂), 離遠已經見到喱座有兩個尖頂嘅教堂, 確係好搶眼~~ 教堂入面我個人就覺得冇特別~~ 不過教堂外圍就成座都好靚~~ 點擊圖片放大 +24 我地喺教堂島再 hea 咗一陣就走喇~~ 之後慢慢行返出市中心嘅 Market Square/ Rynek we Wrocławiu (中央集市廣場), 喱度 D building 好密質質, 好似一堆堆咁, 好 colourful, Ratusz (市政廳) 外觀都幾特別~~ 我地去埋郵局寄 postcard, 郵局入面嘅郵筒上面都有個小矮人呀~~ 點擊圖片放大 +11 行完我地就返 apartment 對面嘅超市買咗 D 嘢食返去, 準備今晚喺五星級的家煮嘢食~~ 我地買咗現成嘅燒雞, 自己煮咗茄汁腸仔長通粉, 仲有磨菇+椰菜~~ 多到食唔晒呢..... 點擊圖片放大 今餐係喺波蘭嘅最後一餐喇~~ 聽朝我地會飛返過俄羅斯嘅聖彼得堡繼續旅程~~ 波蘭喱個地方比想像中吸引~~ 感覺同其他歐洲地方有 D 唔同, 幾個城市我都鍾意啊~~ 物價又唔貴, D 人普遍都好 nice~~ 真心推介!!!