執筆時我已經喺香港工作,仲要啱啱過咗天鴿十號風球!趁多一日風假再次寫番旅遊網址啦。(其實私底下已經被催blog咁滯!) 喺北歐呢,聖誕節大部份旅遊景點都休息。當地人一般都參加聖誕崇拜或者直接出城玩(之後稍作介紹。)咁喺斯德哥爾摩,好在有兩個景點開放:Skansen同埋ABBA博物館!前者係戶外版嘅歷史博物館;後者就唔使多講啦,ABBA啲歌歷久常新,大人細路都啱聽,唔老餅㗎! 第一站:Skansen 地址:Djurgårdsslätten 49-51, 115 21 Stockholm, Sweden 網站:http://www.skansen.se/en/ Skansen作為一個戶外歷史博物館呢,可以睇到瑞典人以前嘅生活㗎。嗰度都有好多手作同埋聖誕食品賣添㗎。由市中心搭7號叮叮或者67號巴士向東南方向出發就得啦。Stockholm Pass唔包Skansen入場費喔。(每人100 SEK,碌卡得啦) 玻璃廠 舊式舖頭 呢個仲正:1930年嘅舖頭同美加同期光猛好多,可以類比1950-60年香港嘅感覺 瑞典版嘅「開門七件事」;係埋好有港式涼茶舖嘅感覺呢? 室內市集 瑞典未到四點就已經天黑!當時喺多倫多住頂盡都係五點天黑嘛,所以都要少少時間適應。入黑時啲嘢收緊檔啦... Stängt(讀音同Mustang押韻;解「閂門」) 去完Skansen就先行入番去市中心啦,後來醒起ABBA博物館喺7號叮叮沿線(仲要係同一條街!),所以再跳番上去啦。呢個就係有三日或七日通嘅好處:亂搭都得,因為交通錢包哂! 7號叮叮 第二站:ABBA博物館 地址:Djurgårdsvägen 68, 115 21 Stockholm, Sweden 網站:http://www.abbathemuseum.com/ 如果網友係ABBA嘅粉絲呢,你一定要去睇啦。 點擊圖片放大 +4 呢個幾好玩:自己玩mixer,再對比當時錄音嘅混音... 邊個想做第五個ABBA成員? XDDDD ABBA的確有嚟過多倫多開show...不過係1979年,我都未出世 後記:斯德哥爾摩聖誕雜影 話說我哋朝早出發去教會參加聖誕崇拜(今次去Hillsong教會。基督徒網友特別番英文教會唔使我多作介紹啦),本來去佢平時聚會嘅地方,但係聖誕崇拜去另一個類似電影院嘅地方!好在有4G LTE同導航幫手。 呢度就舉行傳統聖誕崇拜 Hillsong教會貴為國際教會,崇拜方式梗係冇咁拘謹啦。事奉人員(除咗牧師傳道)都可以牛記咁上。 小朋友唱詩 連奉獻都可以用電話俾錢!究竟金融科技(FinTech)幾時可以喺香港同加拿大普及到呢個程度呢? 一般嚟講,講道會用瑞典文,但有會眾翻譯耳機輔助。點知我哋嚟遲咗,唔夠派!好在有當地人現場為我哋翻譯到英文呢。 聖誕假期間有薑餅屋展覽,不過嗰時我哋已經喺挪威... 頭先講到搭67號巴士去Skansen... 隔離就係Karlapan地鐵站 亂入住宅區嘅地舖,真係同香港嗰啲類似 Nordiska Kompaniet祝大家聖誕快樂 傳統蠟燭擺設;右邊同Saint Lucy有關㗎 乜舖都閂(但係街頭又唔算好寒) Sergels torg對出嘅商業大廈,別有一番風味 平安夜食咗聖誕大餐,爆budget都值,聖誕節就食得平少少啦。有墨西哥嘢食添! 販賣機有三文治餅賣,每件12 SEK;對比喺香港七仔或OK求其買個蛋糕仔都咁上下價 下一篇就係斯德哥爾摩真係周圍走,狂去博物館,用盡Stockholm Pass!敬請留意! 後記:由於回港工作嘅關係,的確少咗出外去旅行,但係我都盡量更新吓呢個網誌,同埋係臉書專頁post吓相(雖然都係手機相)交流下!